Kenshiler astanasyndaǵy burynǵy Lenın, qazirgi Abaı kóshesindegi №58-shi úıdiń qabyrǵasyna memleket jáne qoǵam qaıratkeri Álimhan Ermekovke eskertkish taqta ornatyldy, dep habarlaıdy Egemen.kz
Qazaq memlekettiginiń qalyptasýyna ólsheýsiz úles qosqan tarıhı tulǵa bul úıde ómiriniń sońyna deıin turǵan bolatyn.
"Rýhanı jańǵyrý" baǵdarlamasynyń "Týǵan jer" arnaıy jobasyn júzege asyrý aıasynda iske asqan bul sharýaǵa Arqa tósindegi tehnıkalyq bilimniń qarashańyraǵy – Elbasy qabyrǵasynda bilim alǵan Qaraǵandy memlekettik tehnıkalyq ýnıversıteti bastamashy boldy.
Eskertkish taqtanyń saltanatty ashylý rásiminde Qaraǵandy qalasynyń ákimi Ermaǵambet Bólekpaev quttyqtaý sóz sóıledi. Al QarMTÝ-dyń rektory Marat Ibatov ǵulama ǵalymnyń 1955 jyldan zeınet demalysyna shyqqanǵa deıin qazirgi Qaraǵandy memlekettik tehnıkalyq ýnıversıtetiniń joǵary matematıka kafedrasynda eńbek etkenin atap ótti.
– Kelesi jyly Álimhan Ábeýulynyń týǵanyna 130 jyl tolýyna oraı, ýnıversıtetimizde memorıaldyq taqta ornatý, ataýly aýdıtorııa ashý, halyqaralyq ǵylymı konferensııa uıymdastyrý, stýdentter arasyndaǵy matematıkalyq olımpıada ótkizý syndy is-sharalardy josparlap otyrmyz. Sonymen qatar, Tomsk polıtehnıkalyq ýnıversıtetinde de Álimhan Ermekovke arnalǵan memorıaldyq taqta ornatý josparda bar. О́ıtkeni, ol kisi 1923 jyly atalǵan ýnıversıtetti támamdap, taý-ken ınjeneri dıplomyn jáne geologııalyq barlaýshy mamandyǵyn alǵan, – dedi ol.
Sondaı-aq, eskertkish taqtanyń ashylýynda, Álimhan Ermekovtiń shákirti, tehnıka ǵylymdarynyń kandıdaty, QarMTÝ-dyń dosenti Ibadolla Arystan, ólketanýshy, alash tarıhynyń zertteýshisi Tuńǵyshbaı Muqanov jáne basqalar sóz sóılep, tarıhı tulǵanyń qazaq memlekettiliginiń qalyptasýyna sińirgen eńbegine búgingi kún turǵysynan baǵa berdi.
Saltanatty rásimniń sońynda Álimhan Ermekovtiń nemeresi Oleg Maǵaýııauly ıgilikti iske bastamashy bolǵan, úles qosqan barsha zamattarǵa áýlet atynan alǵys aıtty. Sonymen birge ol ataqty atasynyń Qaraǵandy qalasynda turǵan kezeńi týrasynda mazmundy esteligimen bólisti.
– Atam Lenındik saıasatqa qarsy shyqqany úshin 58-baptyń 8-tarmaǵy boıynsha «halyq jaýy» retinde aıyptaldy. Sovet ókimeti oǵan qasaqana Lenın kóshesindegi 58-shi úıdiń 8-shi páterin berdi. Sondaǵy túpki maqsaty kimge qarsy shyqqanyn, qandaı bap, qaı tarmaqpen sottalǵanyn esinen máńgi shyǵarmasyn degen surqııa saıasatty sezdirý edi. Biraq, bul muqatý atamdy moıyta almady. Ol kisi ómiriniń sońyna deıin eńsesin tik ustap, eline adal qyzmet etti, – dep tebirendi Ermekovtiń nemeresi.
Eske salsaq, qazirgi ýaqytta Maryadi education bilim berý kompanııasyna jetekshilik etetin Oleg Maǵaýııauly otbasymen Ulybrıtanııada turyp jatyr.