Qazirgi kezde kóp turǵyndardyń poshta qyzmetine kóńili tolmaıdy. Ásirese, shalǵaı aýyldardaǵy áleýmettiń deni jazylǵan gazet-jýrnaldarynyń ýaqytynda kelmeıtinin aıtyp jıi shaǵymdanady. Jýrnalıst retinde aýdan, aýyldarǵa baryp, turǵyndarmen kezdeskende de kópshiliktiń aıtatyndary sol.
Rasynda da aqshasyn tólep, jazylǵan soń árkim de ózi alatyn basylymdy der kezinde oqyǵysy keledi. Búginde ınternettiń zamany desek te, áli kúnge deıin aǵa býyn ókilderi kez kelgen jańalyqty saıttardan emes, gazetterden oqıdy. Alaıda keı jaǵdaıda onyń ózi de múmkin bolmaı otyr. Bul rette kópshilik poshta qyzmetiniń jumysyn synǵa alyp jatady. Oqyrmannyń bazynasy oryndy da.
Jýyrda ǵana Shý qalasyndaǵy «Qosqudyq» aýdanynyń turǵyny Dýman Qııashuly esimdi oqyrman gazettiń úıine ýaqtyly kelmeıtinin aıtyp, redaksııaǵa hat jazǵan bolatyn. Sol hatynda ol «Qosqudyq» aýdanyndaǵy poshta qyzmetiniń nasharlyǵyn, tipti jumys istemeıtindigin aıtqan. «Qaıbir jyldary sizderdiń redaksııa gazet baǵasynyń jarty qunyn tasymaldaýshy uıym alatynyn jazǵan bolatyn. Al endi gazetti taratyp berýge kelgende «Qazposhta» bólimshesi nemquraıdylyq tanytyp otyr. Biraz jyl buryn aptasyna bir ret taratty. Keıinirek aıyna úsh ret ákeletin edi. Sońǵy kezde gazetterdi aılap ákelmeıdi. Poshtaǵa sebebin bilýge barǵan saıyn kvıtansııany tekserip, «jetkizip beremiz» degen sózden ári aspaıdy. Aıtatyndary – «aılyq az, bizge eshkim jumysqa kelmeıdi» degen sóz. Tipten «gazetke ne úshin jazylasyń?» degendi de shyǵardy. Sonda sol qyzmetker aılyqty ne úshin alatynyn bilmegeni me?.. Bara bergen soń, jaqynda poshta qyzmetkeri 2,5 aılyq gazetterimizdi alyp keldi. Gazet-jýrnal jylyna bir ret alatyn otyn-sý emes qoı. Aıta berseń poshtanyń kemshilikteri jeterlik», deıdi ol.
Shynynda da, turǵynnyń bazynasy oryndy. Eger shynymen jazylǵan basylymdaryn ýaqytynda ala almaı otyrsa, kim de bolsyn shaǵymdanady. Máseleniń anyq-qanyǵyn bilmekke áýeli Shý aýdandyq poshta torabynyń basshysy Anarhan Sraıylovaǵa habarlastyq. Ol «Qosqudyq» aýdanyndaǵy poshta bólimshesi tańerteńgi saǵat 10:00-den 15:00-ge deıin ǵana jumys isteıtinin, 4 hat tasýshynyń bar ekenin aıtty. «Jalpy, aýdan boıynsha 20 bólimshe bar. Shý qalasynda 4 bólimshe jumys isteıdi. Biraq bizge beısenbi kúni shyǵatyn gazet-jýrnaldar senbi kúni bir-aq keledi. Bizdiń qyzmetkerler ony jazylǵan kisilerdiń úılerine jetkizip beredi», deıdi Anarhan Sraıylova. Iаǵnı, beısenbi kúni shyqqan kez kelgen gazet Taraz qalasynan Shý qalasyna eki kúnnen keıin ǵana jetedi. Oqyrmannyń shaǵymy osy jerden bastalady. Gazet-jýrnaldyń keshigýi, turǵyndardyń qolyna der kezinde tımeýi máselesiniń birinshi sebebi.
Biraq tıisti basshylardyń sózinshe, munyń birneshe sebebi bar bolyp shyqty. Áıtpese, poshta qyzmetkerleri kez kelgen basylymdy ýaqytynda árbir úıge taratýǵa múddeli ekenin jetkizdi. «Qazposhta» aksıonerlik qoǵamy Jambyl oblystyq fılıaly poshta, logıstıka jáne óndiris bóliminiń basshysy Gúlmaǵıza Kervenevanyń aıtýynsha, oblystyń Moıynqum, Shý, Qordaı sııaqty shalǵaı aýdandaryndaǵy aýyldarǵa respýblıkalyq «Egemen Qazaqstan» gazetin kúnbe-kún jetkizý, taratý múmkinshiligi joq eken. Bólim basshysy onyń sebebin atalǵan basylymnyń oblysqa taraıtyn taralymy Shymkent qalasynda basylatynymen túsindirdi. Bul respýblıkalyq «Kazahstanskaıa pravda» gazetine de qatysty. Tipti shalǵaı aýdandardy aıtpaǵannyń ózinde, oblys ortalyǵynan asa qashyq emes T.Rysqulov, Merki aýdandarynda da mundaı másele bar eken. Naqty aıtqanda, gazetter bul jaqqa da ýaqytynda barmaıdy. Qos aýdan toǵyz joldyń torabynda tursa da jaıy osyndaı. «Atalǵan gazetter aýdandarǵa marshrýttar shyqqanǵa deıin, ıaǵnı túngi saǵat 2:00-ge deıin kelip jetken aralyqta shalǵaı aýyldarǵa taratylady. Al Taraz qalasy boıynsha jáne Jambyl, Talas, Sarysý, Baızaq, Jýaly aýdandaryna qarasty aýyldarǵa gazetter kelip jetken kúni taratylady. Oblystyq gazetter Taraz qalasynyń ózinde basylatyndyqtan, olarǵa qatysty mundaı másele joq», deıdi ol. Sondaı-aq, bólim basshysynyń aıtýynsha, keıbir redaksııalardyń ózi gazetterdi baspahanaǵa keshiktirip jiberedi eken. Sodan da gazet oqyrman qolyna kesh tıedi. Al «Qazposhta» AQ Jambyl oblystyq fılıaly qyzmetterdi úılestirý bóliminiń basshysy Janat Áshirimbet búginde oblys boıynsha 106 myń 248 dana gazet-jýrnal taratylatynyn jetkizdi.
«Jambyl oblysy boıynsha 238 qurylymdyq bólimshe bar. Sonyń ishinde Taraz qalasy boıynsha 36, al aýdandar boıynsha 202 bólimshe halyqqa qolaıly qyzmet kórsetedi. 2018 jyldan bastap «Qazposhta» aksıonerlik qoǵamy seriktestik jelini damytýdy belsendi túrde bastady. Qazirgi ýaqytta oblysta 43 seriktes bólimshe ashyldy. Olardyń kópshiligi aýdandarda ornalasqan. «Qazposhta» qyzmetin usyna otyryp, kásipkerler ózderiniń bar kásibine qosymsha tabys alýǵa múmkindik alady. Bizdiń seriktestik jelimiz belsendi túrde ósip keledi jáne aı saıyn «Qazposhta» brendimen birlesip jumys jasaǵysy keletin shaǵyn-orta bıznes ókilderiniń sany artyp keledi», deıdi «Qazposhta» AQ Jambyl oblystyq fılıalynyń dırektory Dıdar Abdýhalıuly. Turǵyndardyń saýalyna poshta basshylarynyń jaýaby osyndaı. Olar qaı kezde de oqyrmandarǵa jazylǵan gazet-jýrnaldaryn ýaqytynda taratýǵa kúsh salyp kele jatqanyn aıtady. Tek álgindeı máseleler ǵana aýdan, aýyldardaǵy turǵyndarǵa basylymdardyń ýaqytynda jetýine kedergi keltiredi eken.
Jambyl oblysy