Ahýal turaqty, alaıda bosańsýǵa bolmaıdy

Oblystyq Qoǵamdyq den­saý­lyq basqarmasynyń basshysy Marat Pashımovtyń aıtýynsha, óńirdegi medısınalyq mekeme­lerde ókpeni jasandy tynystandyrý apparattarynyń sany 178-den 332-ge deıin artyp, ósim 46,4% bolǵan. Al ottegi stansasynyń sany 2 ese artyp, 8-ge jetip otyr. Sondaı-aq 80 birlik oksıgenasııa apparaty satyp alyndy. Ot­tegi konsentratorlarynyń sany 890 birlikke jetip, ósim 95%-dy qurady. Ottegi núkteleriniń sany 9,7 esege artyp, 205-ten 2005 núktege deıin ulǵaıdy. Bıyl oblystyq bıýdjet esebinen 1 kompıýterlik tomograf pen 3 san­dyq rentgen apparattary orna­tyldy.

Sonymen qatar oblystaǵy medısınalyq uıymdardyń pýlsoksımetrmen qamtamasyz etilýi 190-nan 3 879-ǵa deıin jetip, 95,1%-ǵa artqan. Koronavırýs ın­fek­sııasynyń ekinshi tolqy­ny­na daıyndyq maqsatynda oblystyń medısınalyq uıymdary dárilik zattarmen tolyq qamtamasyz etilgen. Eki aılyq qor qalyp­tas­tyrylǵan. Oblys boıynsha qazirgi tańda bir adam korona­vı­rýspen stasıonarlyq em qa­byl­daýda, al ambýlatorııalyq jaǵdaıda em qabyldaýshylar – 18. Qarym-qatynasta bolǵan 116 adam – medısınalyq baqylaýda. Ázirge Túrkistan oblysyndaǵy epı­demııalyq ahýal turaqty, blok-beket­ter qoıylmaıdy.

Degenmen óńirde jeke azamat­tar­dyń toı-merekelerdi atap ótýi ty­­ıylar emes. Osy oraıda oblystyń bas sanıtarlyq dárigeri Nurbek Nyshanov pandemııa ýaqytynda oblys tur­ǵyn­da­ryn jalpyǵa ortaq tártipti saqtaýǵa shaqyrdy.

«Jańadan qabyldanǵan qaý­ly­ǵa sáıkes, 3 qarashadan bas­tap oblys aýmaǵyndaǵy mal bazarlary sanıtarııalyq-dezınfeksııalyq re­­jim­di kúsheıtip, 30%-dan asyrmaı tol­tyrýmen, aptanyń jumys kúnderi jumys isteýine ruqsat etildi. Túrkistan obly­sy boıynsha 31 mal bazary bar. Infokazakhstan saıtyna mal bazarlardan ashylýǵa 16 ótinish tústi, onyń 7-ýi qaralyp, tórteýine jumys isteýge ruqsat berildi (Qazyǵurt, Ordabasy, Keles, Tólebı), 3-ýi qaıtaryldy, 9 ótinish qaralýda», deıdi oblystyń bas sanıtarlyq dárigeri.

Jalpy, indettiń taralýyna qarsy kúres sharalarynyń aıasynda óńirdegi densaýlyq saqtaý mekemeleriniń materıaldyq-teh­nıkalyq bazasy jańartylýda. Mysaly, jýyrda oblystyń shal­ǵaı aýyldary 12 jyljymaly medısınalyq keshenmen, jedel járdem stansasynyń parki 13 reanımobılmen tolyqty. Oblystyq jedel-járdem qyz­metin jyl sońyna deıin 122 avtokólikpen jabdyqtaý kóz­delgen. Bul medısınalyq jedel-járdem qyzmeti parkin 96%-ǵa jańartýǵa múmkindik beredi. Al shalǵaı aýdandar jyljymaly medısınalyq keshenmen tolyq qamtamasyz etilip otyr. Kóshpeli aýrýhana aýdan ortalyǵynan 100-200 shaqyrym jerdegi aýyldarǵa baryp, tur­ǵyn­darǵa qyzmet kórsetetin bolady. Bul óz kezeginde aýyl tur­ǵyndarynyń medısınalyq qyz­metterge qoljetimdigin art­tyrary anyq. Zamanaýı medısınalyq keshen flıý­rografııa, ýl­tra­dy­bys­tyq apparat, zertteýlerge arnalǵan analızatorlar, oftalmoskop, glıýkometr jáne taǵy basqa quraldarmen jabdyqtalǵan. Dárigerler azamattardy to­lyq tekserý­den ótkizip, aýrý­­dy der ke­zin­­de anyq­taı ala­dy. Barlyq emdeý mekemelerinde dári-dármektiń 2-3 aı­lyq qory qam­­ta­­masyz etilgen.

О́ńirdiń qala, aýdan­darynda da medısınalyq mekemelerdiń búgingi talapqa saı bolýy, qajetti jabdyq, dári-dármekpen tolyq qamtamasyz etilýi – basty nazarda. Dárigerlerdiń alańsyz jumys isteýine, bul oraıda eńbeginiń adal baǵalanýyna da erekshe mán berilýde. Mysaly, «Áleýmettik medısınalyq saqtandyrý qo­ry» KeAQ Túrkistan oblysy boıynsha fılıaly korona­vı­rýs ınfeksııasynyń aldyn alýǵa, dıagnostıkalaýǵa, em­deýge, epıdemııaǵa qarsy is-sha­ra­­larǵa qa­tys­qan medısına qyz­met­ker­le­rine ústemeaqy tóleýge 12,7 mlrd teńge bólgen. Qor fılıaly medısınalyq qyz­met kórsetý sapasyn mo­nı­to­rıngteý bóliminiń bas sarap­shysy A.Ibragımovanyń máli­me­­tinshe, bıyldyń naýryz-qyr­kúıek aılary aralyǵynda 9,3 mlrd teńge tólengen. Onyń ishin­de epıdemııaǵa qarsy is-shara­larǵa tartylǵan me­dı­sına qyzmetkerleriniń ús­teme­aqysy 6,6 mlrd teńge bolyp otyr. Sondaı-aq naýqastardy pro­vızorlyq jáne karantındik sta­sıo­narlarǵa emdeý­­­ge jatqyzýdy qarjylandyrýǵa 1,8 mlrd teńge jumsalǵan. Oblys boıynsha 395 mobıldi brıgada qyzmet kórsetedi. Qor brıgadanyń árbir shaqyrýǵa shyqqany úshin 5 400 teńge aqy tóleıdi.

Al Túrkistan qalalyq or­ta­lyq aýrýhanasynyń bas dá­ri­geri, medısına ǵy­lym­da­ry­nyń kandıdaty Janbolat Dildábekov epıdemııaǵa qarsy is-sharalarǵa tartylǵan medısına qyz­met­ker­­leri ishinen koronavırýs ın­fek­sııasyn juqtyrǵan 11 mamanǵa, onyń ishinde 8 dárigerge memlekettik ál­eýmettik saqtandyrý qorynan 2 mln teńge bir rettik tólemaqy tólengenin aıtady. Onyń aıtýynsha, qazirgi tańda aýrýhana medısınalyq qural-jabdyq­tar­men tolyq qam­tyl­ǵan. Túrkistan qalasyndaǵy «Iаssy» shaǵyn aýdanynda 200 tó­sek­tik oryndy modýldik tıptegi juq­paly aýrýlar aýrýhanasynyń jańa ǵımaratynyń qurylysy bas­tal­dy. Dári-dármekter, dezınfek­sııa­lyq zattar men jeke qorǵanysh kıim­deriniń eki aılyq qory qoıma­ǵa jetkizildi. Sondaı-aq qalalyq ákim­­diktiń qoldaýymen ottegi beke­ti iske qosyldy. Jalpy, aýrýhana óziniń kezekpen jáne kezekten tys túsken naýqastaryna joǵary tehnologııalyq qyzmetter kórsetip keledi.

Aýrýhanalarǵa qaıy­rym­dy­lyq kómek kórsetý­shiler áli de kóp. Jýyrda Shardara aýdandyq ortalyq aýrýhanasyna jomart jandardyń demeýshiligimen 10 ottegi konsentratory tabys­tal­dy. Igi iske yqpal bolǵan «ICC» maqta óńdeý kompanııa­­­sy Qazyǵurt jáne Tólebı aýdandyq ortalyq aýrýhanalaryna da ottegi konsentratorlaryn tartý etken. Koronavırýs ınfeksııa­sy­men kúreste asa qajetti dúnıeni qabyldap alǵan aýdandyq aýrý­ha­nanyń bas dárigeri Nurjan Nóse­rov demeýshilerge búkil ujy­my atynan alǵysyn bildirdi. Jalpy Shardara aýdandyq aýrýhanada ottegi konsentratorlarynyń sany 40-qa jetti.

Koronavırýs indetiniń taralýyna qarsy kúres sharalary aıasynda aýdandyq aýrýhanaǵa jaqynda ǵana jyljymaly medısınalyq keshen berilgen bolatyn. Qazirgi tańda aýrý­hanada koronavırýs ınfeksııasymen em qabyldap jatqan naýqas joq. Yqtımal ekinshi tolqynǵa daıyndyq turǵysynda aýrýhana 200-ge jýyq pýlsoksımetr, 9 dana ókpeni jasandy tynystandyrý apparatymen qamtylǵan. 100 tósek­tik oryn ortalyqtandyrylǵan ot­te­gi núktesimen jasaqtalǵan. Me­­­­dı­­sınalyq uıymnyń qyz­met­­­ker­leri tarapynan koro­na­vı­rýs­­­qa qarsy opera­tıv­ti jospar daıar­­­­­­­­­landy. Dezınfeksııalyq eri­tin­dilerdiń, medısınalyq maq­­sat­ta­ǵy buıymdardyń, jeke qor­ǵa­nys quraldarynyń jáne dári-dármek qory tolyq jab­dyq­talǵan. Indetke shaldyqqan naý­qas­tarǵa medısınalyq kómekti kórsetý úshin 16 mobıldi top qurylǵan.

Túrkistan oblysy