Búgin Qazaqstan Respýblıkasynyń Mádenıet jáne sport mınıstri Aqtoty Raıymqulova Prezıdent janyndaǵy Ortalyq kommýnıkasııalar qyzmetinde onlaın brıfıng ótkizdi, dep habarlaıdy Egemen.kz.
Mınıstr Memleket basshysynyń tapsyrmasyna saı Qazaqstan Respýblıkasy Úkimetiniń osy jyly 27 qarashadaǵy № 801 qaýlysymen Memlekettik Týdy, Eltańbany jáne Gımndi paıdalaný (ornatý, ornalastyrý) qaǵıdalaryna engizilgen ózgerister jaıly aıtty.
Prezıdent Qasym-Jomart Toqaev 27 qazanda memlekettik rámizderdi paıdalanýǵa arnalǵan qoldanystaǵy Zańnyń qaǵıdalaryn qaıta qaraý týraly tapsyrma bergen edi.
Aqtoty Raıymqulova ózgertýler engizilgennen keıin azamattarymyz úshin endi Memlekettik Týdy paıdalaný aıasy zańnama turǵysynan keńeıgenin jetkizdi.
«Birinshiden, Týdy jeke jáne zańdy tulǵalar kez kelgen ǵımaratta, onyń ishinde balkonda, saltanatty is-shara ótetin orynda patrıottyq sezimin, otandastaryn qoldaý maqsatynda paıdalana (ornatý, ornalastyrýǵa) alady.
Ekinshiden, jeke tulǵalar engizilgen ózgeriske sáıkes Memlekettik Týdy kez kelgen ǵımaratta (bir nemese kóp qabatty) ekstererli nusqada ornalastyrý kezinde ǵımarattyń sáýlet ereksheligine qaramastan paıdalana alady.
Úshinshiden, budan bylaı jeke tulǵa ǵımaratta ornalasqan Memlekettik Týdy túnde jaryq quraldaryn qoldanbaı paıdalana alady. Táýliktiń qarańǵy ýaqytynda jaryqtandyrý talaby zańdy tulǵa men memlekettik organdarǵa ǵana qatysty qoldanylady.
Jalpy joǵaryda kórsetilgen ózgertýler Týymyzdyń qoldanylý aıasyn edáýir keńeıtedi. Onyń qoǵamdaǵy patrıotızm rýhyn nyǵaıtýǵa baǵyttalǵan sımvoldyq kapıtalyn jańasha uǵynýǵa múmkindik beredi»,-dedi mınıstr.
Sonymen qatar Mınıstr elimizde ótkizilip kele jatqan «Meniń Týym, meniń Otanym!» aksııasy jaıly da aıtty.
«Memlekettik rámizder, vedomstvolyq jáne olarǵa teńestirilgen ózge de nagrada geraldıkasy máseleleri jónindegi respýblıkalyq komıssııasynyń ótken jyly 23 qazandaǵy hattamasyna sáıkes Nur-Sultan, Almaty, Shymkent qalasy men barlyq oblys ákimdigi jyl saıyn «Meniń Týym, meniń Otanym!» aksııasyn ótkizip keledi. Bul aksııanyń maqsaty turǵyndar arasynda memlekettik rámizderdi dáripteý jáne patrıotızmge tárbıeleý»,-dedi Aqtoty Raıymqulova.