Taldyqorǵan qalasynyń avtoparkteri jańartylyp, qala turǵyndaryna aqpan aıynan bastap otandyq jańa avtobýstar qyzmet kórsetedi. Mundaǵy basty maqsat – taldyqorǵandyqtardyń jaıly, keń, ekologııalyq taza qoǵamdyq kóliktermen júrýin qamtamasyz etý. Bul týraly búgin oblys ákimi Amandyq Batalovtyń qatysýymen avtobýstardy testileýden ótkizý barysynda aıtyldy, dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Oblys ákimi birer jyl buryn Taldyqorǵandaǵy tozyǵy jetken qoǵamdyq kólikterdi jańartatyn ýaqyt kelgenin, bul rette otandyq avtobýstardyń múmkindikterin zerdelep kórý kerektigin aıtqan bolatyn. Osy tapsyrmaǵa sáıkes «SaryarqaAvtoProm» JShS-men kelisim jasalyp, jergilikti bıýdjetten «Jetisý» ÁKK arqyly 55 jańa avtobýs satyp alynbaq. Olar qarjylyq, zańdyq turǵydan barlyq talaptarǵa saı keletin qalanyń birneshe avtoparkterine 7 jylǵa lızıngige beriledi.
Jańa avtobýsty «SaryarqaAvtoProm» zaýytynyń ókili Aleksandr Soı tanystyrdy. Avtobýstyń kireberis baspaldaǵynda múmkindigi shekteýli jandar úshin pandýs qarastyrylǵan, al avtobýs ishinde qolarbaǵa arnalǵan oryn bar. Avtobýstyń oryndyqtary jaıly, ishi keń, arnaıy beınekameralar ornatylǵan. Ekologııalyq jaǵynan taza, ıaǵnı avtobýs gazben júredi. Kóliktiń barlyq múmkindikterimen tanysqan oblys basshysy A.Batalov uzyndyǵy 10,3 m bolatyn úlken avtobýstardy qalanyń negizgi kóshelerine júrgizý kerektigin aıtty, sebebi indet kezinde adamdar bir-birinen alshaq turǵany jón. Al ondaı múmkindik jasaý úshin avtobýstardyń ishi osyndaı keń bolýy tıis. Al odan kishi avtobýstar qosalqy kóshelerdiń baǵytynda júredi.
"Biz sizderge osyndaı jańa avtobýstardy 7 jylǵa lızıngige alyp beremiz. Bul ıgilikti sizder úshin emes, birinshi kezekte qala turǵyndary úshin jasap jatyrmyz. Al avtoparkke kólikterdiń ishin taza qalpynda saqtap, kútip ustaý mindeti júkteledi. Júrgizýshiniń jaýaptylyǵynan bastap kondýktorlardyń kıimine deıin biryńǵaı, joǵary talapqa saı bolýy kerek. Bizdiń Taldyqorǵan basqa qalalardan kem emes, sondyqtan biz qyzmet kórsetýdiń jańa deńgeıine shyǵýymyz kerek", - dedi A. Batalov.
Atap ótsek, Taldyqorǵanda qazir 26 baǵytta 196 avtobýs qatynaıdy. Olardyń kópshiliginiń bazasy eskirgen. Sondyqtan «Aqnar», «Jan el», «Saıman», «Taksopark», «Transtal» sııaqty jolaýshy tasymalymen aınalysatyn mekemelerdiń avtoparkteri úshin satyp alynatyn «SaryarqaAvtoProm» JShS-nyń 55 jaıly jańa avtobýsy qoǵamdyq kólik qatynasyn jaqsartýǵa múmkindik beredi dep kútilýde. Bul memekelerge qoǵamdyq kólikter 7 jylǵa lızıngige beriledi. Alynatyn avtobýstardyń 25-i – Yutong markaly, 27-si – PAZ markaly avtobýs.