Bilim jáne ǵylym mınıstrliginiń Vedomstvoaralyq komıssııasy mektep oqýshylaryn úshinshi toqsanda oqytý tártibine qatysty sheshim shyǵardy, dep habarlaıdy Egemen.kz
Buǵan deıin mınıstr úshinshi toqsannan bastap UBT jáne memlekettik emtıhan tapsyratyn pánder dástúrli formatta oqytylatynyn málim etken edi.
Ashat Aımaǵambetov mınıstrliktiń apparat otyrysynda: «Ásirese UBT jáne memlekettik emtıhan tapsyratyn pánder, sonymen qatar qıyndyq týdyryp otyrǵan pánder de dástúrli formatta oqytylady. Sondyqtan bul másele boıynsha sabaq kestesine deıin ádistemelik usynymdardy daıyndap, búgin jiberemiz. Úshinshi toqsannan bastap talqylanǵan tártip boıynsha jumys júrgizemiz», dep aıtyp ótti.
Búgingi baspasóz máslıhatynda mınıstr bul óte mańyzdy sheshim ekenin jáne bul oqý tártibi memlekettik emtıhan tapsyratyn balalarǵa da tikeleı qatysty ekenin basa aıtty.
"Mektep túlekteri jaıly aıtyp otyrmyn. Olarǵa bilim alýdyń mańyzy óte zor. Sol sebepti biz oqýshylardyń 70 paıyzy dástúrli formatta, al 30 paıyzy qashyqtan oqıtynyn aıtyp otyrmyz. Ásirese Ulttyq biryńǵaı testileýge baılanysty pánder dástúrli formatta oqytylady. Qalǵanyn qashyqtan oqytamyz», dedi mınıstr.
Ol sonymen qatar bul rette sanıtarlyq talaptar qalaı saqtalatynyn aıtyp ótti.
«Bir kabınet bolady. Qońyraý ártúrli ýaqytta soǵylady. Áleýmettik qashyqtyq saqtalady. Buǵan deıingi sanıtarlyq talaptar kúshinde qalady. О́zgeris joq. Biz Bilim jáne ǵylym mınıstrligi retinde balalardyń dástúrli formatta oqýyn qalaımyz. Alaıda basqa memlekettik organdardyń quzyretine jatatyn sanıtarlyq normalar taǵy bar», deıdi Ashat Aımaǵambetov.