Jeńil jolmen tabys tabýdy kózdegen áıel ózgeniń qaltasyna suǵanaq qolyn salýdy kásip etipti. Oblystyq polısııa departamenti baspasóz qyzmetiniń málimetine súıensek, qolynyń suǵanaǵy bar áıel bıylǵy 4-15 qańtarda fıtnes ortalyqtyń birinen birneshe ret aqsha urlapty.
«Atyraý qalalyq polısııa basqarmasyna Q.Sátpaev kóshesinde ornalasqan fıtnes ortalyqta jattyǵatyn 5 jigit qomaqty kólemde aqsha urlanǵany jóninde aryz túsirdi. Olarǵa keltirilgen qarjylaı shyǵynnyń kólemi 159 000 teńgeni qurady. Osyǵan oraı tekserý júrgizgen polısııa qyzmetkerleri urlyqqa qatysy bar 31 jastaǵy azamatshany anyqtap, ustady. Kúdikti aryzdanýshylardyń aqshasyn jymqyryp kelgen», dep habarlady departamenttiń baspasóz qyzmeti.
Qazir ustalǵan kúdiktige qatysty QR Qylmystyq Kodeksiniń 188-babynyń 1 jáne 3-bóligimen sotqa deıingi tergeý júrip jatyr.