Premer-Mınıstr Asqar Mamınniń tóraǵalyǵymen ótken Úkimet otyrysynda Prezıdent Qasym-Jomart Toqaevtyń aǵymdaǵy jylǵy 26 qańtarda ótken keńeıtilgen Úkimet otyrysynda bergen tapsyrmalaryn oryndaý jónindegi sharalar qaraldy. Bul tapsyrmalardyń oryndalýy týraly Strategııalyq josparlaý jáne reformalar agenttiginiń tóraǵasy Qaırat Kelimbetov baıandady, dep habarlaıdy Egemen.kz.
Memlekettik josparlaý júıesine osy tásilderdi ázirleý kezindegi negizgi mindetterdiń biri onyń tıimdiligin kúsheıtý boldy. Máselen, birinshi deńgeıdegi qujattar eldiń uzaq merzimdi jáne orta merzimdi kezeńdegi damý paıymyn aıqyndaıtyn bolady. Qazaqstan 2050 strategııasy memleket damýynyń uzaq merzimdi paıymyn aıqyndaıtyn eldiń túıindi qujaty. Osyǵan baılanysty uzaq merzimdi qujatty iske asyrý úshin jalpyulttyq basymdyqtar quraly engiziletin bolady, ol Qazaqstan 2050 Strategııasynyń paıymyn neǵurlym qysqa aralyqtarda (2025 jylǵa deıin) iske asyrý úshin negizgi basymdyqtardy biriktiretin jáne aıqyndaıtyn biryńǵaı jáne ınklıýzıvti platforma bolady.
«Ulttyq damý jospary, aýmaqtyq damý jospary, sondaı-aq ulttyq qaýipsizdik strategııasy ortalyq jáne óńirlik deńgeılerde de memlekettik apparattyń maqsattary men mindetterin aıqyndaıtyn bolady. Aýmaqtyq damý jospary eldiń árbir óńiriniń básekelestik artyqshylyqtaryn ashýǵa baǵyttalatyn bolady», — dedi Q. Kelimbetov.
Onyń aıtýynsha, ulttyq jobalar quraly engiziletin bolady, ol jobalyq tásilge sáıkes barlyq sıpattamalarǵa ıe bolady. Ekinshi deńgeıdegi qujattar óńiraralyq máseleler boıynsha da, salalar men salalar arasyndaǵy máseleler boıynsha da júrgiziletin saıasatty aıqyndaıtyn bolady. Úshinshi deńgeıdegi qujattar iske asyrý qujattary bolady.
Memlekettik organdardyń, kvazımemlekettik uıymdardyń damý josparlary, О́ńirlerdi damytý josparlary joǵary turǵan qujattardyń mindetterin iske asyrý jónindegi tetikterdi kórsetetin bolady. Osylaısha, Qazaqstan – 2050 jalpyulttyq basymdyqtary men paıymyn oryndaýǵa toǵystyrylatyn úsh deńgeıdegi barlyq qujattar arasyndaǵy naqty ózara baılanys qamtamasyz etiledi. Osyǵan baılanysty, Úkimetten memlekettik josparlaý júıesin Úkimet qaýlysy túrinde bekitýi tıis.
«Jalpy, jalpyulttyq basymdyqtar úsh baǵyt: ınstıtýttardyń sapasy, azamattardyń ál-aýqaty jáne qýatty ekonomıka boıynsha 10 negizgi basymdyqty qamtıdy. Qazirgi ýaqytta Prezıdent Jarlyǵynyń jalpyulttyq basymdyqtar jónindegi jobasy memlekettik organdardyń kelisýinde tur. Jalpyulttyq basymdyqtar týraly Jarlyq jobasyn 2021 jylǵy 10 aqpanǵa deıin qol qoıýǵa engizý oryndy dep sanaımyz», — dedi ol.
2020 jyldyń qazan aıynan bastap agenttik Qazaqstannyń 2025 jylǵa deıingi ulttyq damý josparyn ázirleýge belsendi qatysty. Ulttyq damý josparynyń jobasy eldiń ekonomıkalyq ósýin jedeldetýge jáne halyqtyń ál-aýqatyn arttyrýǵa baǵyttalǵan orta merzimdi kezeńdegi eldiń jańa ekonomıkalyq baǵytynyń negizgi parametrlerin qalyptastyrady.
Bul rette Ulttyq Jospar memlekettik josparlaýdyń birinshi deńgeıiniń qujaty bola otyryp, tıisti salalarda ulttyq jobalardy ázirleý úshin bazıs jáne negiz bolady. Osyǵan baılanysty Q. Kelimbetov 2021 jylǵy 10 aqpanǵa deıin ulttyq damý josparyn bekitý týraly Prezıdent Jarlyǵynyń jobasyn engizý oryndy bolatynyn atap ótti.
Memlekettik josparlaý júıesiniń negizgi qujattarynyń biri Ulttyq jobalar bolady. Jobalardyń negizgi krıterııi nátıjesinde azamattardyń ómirin oń ózgertýdi qamtamasyz etetin eldiń búkil aýmaǵyna, ekonomıkasyna, áleýmettik júıesine yqpal etý bolady. Ulttyq jobalardyń tizbesin Qazaqstan Respýblıkasy Prezıdentiniń Jarlyǵymen bekitý oryndy dep atap ótti Strategııalyq josparlaý jáne reformalar agenttiginiń tóraǵasy.
Onyń aıtýynsha, jobalar tizbesin bekitý týraly Jarlyqtyń jobasyn Prezıdenttiń qol qoıýyna 2021 jylǵy 1 naýryzǵa deıin engizý mańyzdy, bul jobalardy ázirleý prosesin bastaýǵa múmkindik beredi.
«Úkimet aǵymdaǵy memlekettik baǵdarlamalardy odan ári jobalarǵa kóshirý maqsatynda olarǵa baǵalaý men taldaý júrgizýdi oryndy dep sanaımyz. SJRA osy másele boıynsha ádisnamalyq qoldaý kórsetýge daıyn. Atap aıtqanda, jobany Ulttyq jobalyq keńseniń turaqty qatysýymen ázirleýshi memlekettik organdar ázirleıtin bolady. Strategııalyq josparlaý jáne reformalar agenttigi jobalar boıynsha qorytyndy qalyptastyrý sheńberinde mundaı jobalardyń jalpyulttyq basymdyqtarǵa sáıkestigin qamtamasyz etedi», — dedi Q. Kelimbetov.
SDIAО́M sıfrlyq transformasııa ortalyǵy arqyly Data driven Government platformasy sheńberinde tolyq sıfrlyq jaraqtandyrýdy jáne ózara is-qımyldy qamtamasyz etedi. Qazirgi ýaqytta Agenttik Ulttyq jobalardy ázirleý boıynsha ádisteme daıyndaýda, ol jaqynada Úkimetke kelisýge jiberiledi. Jobalardy tez arada ázirleý qajettiligin nazarǵa ala otyryp, SJRA ádistemeni 2021 jylǵy 15 aqpanǵa deıin qaraýdy jáne kelisýdi usynady. Osyǵan baılanysty Agenttik Ulttyq ekonomıka mınıstrligimen birlesip, 2021 jylǵy 1 naýryzǵa deıingi merzimde ortalyq memlekettik organdar men jergilikti atqarýshy organdardyń basshylyǵy úshin birqatar semınarlar ótkizedi.
Q. Kelimbetovtiń aıtýynsha, memlekettik basqarý memlekettik josparlaý júıesine jańa tásilderdi tabysty ımplementasııalaýdyń negizgi bóligi retinde sanalatyny anyq. Osylaısha, memlekettik josparlaý júıesine jańa tásilderdi tabysty engizý maqsatynda «túbir júıeler» negizinde memlekettik basqarý júıesin reformalaý asa mańyzdy. Osy baǵyttaǵy transformasııanyń negizgi qaǵıdaty «adam ortalyǵy» bolady.
Jappaı sıfrlandyrý, onyń ishinde Data Driven Government platformasyn engizý arqyly memlekettik basqarý júıesin jaqsartýdyń negizgi elementine aınalady jáne tıisinshe memlekettik josparlaý júıesiniń tabysty jáne kelisilgen qyzmetin qamtamasyz etýge múmkindik beredi.
Osy jyldyń 29 qańtarynda Memleket basshysy Q. Toqaev Qazaqstan Respýblıkasynda memlekettik basqarýdy damytýdyń 2030 jylǵa deıingi tujyrymdamasyn maquldady, ony 2021 jylǵy 10 aqpanǵa deıin qol qoıýǵa engizý josparlanyp otyr. Memlekettik saıasatty qalyptastyrý jáne iske asyrý kezinde memlekettik apparat pen memlekettik qyzmetshiler memlekettik basqarýdyń 5 irgeli qaǵıdatyn basshylyqqa alatyn bolady. Bizdiń memleketimiz «halyq únine qulaq asatyn», tıimdi, qoǵamǵa esep beretin, kásibı jáne pragmatıkalyq bolýǵa tıis. Memlekettik basqarýdyń servıstik modeline kóshý úshin memlekettik apparattyń aldyna 9 negizgi mindet qoıyldy. SJRA osy tujyrymdamany iske asyrýdyń egjeı-tegjeıli josparyn taıaý arada, aǵymdaǵy jyldyń 1 naýryzyna deıin ázirleýdi tapsyrýdy usyndy. QR Prezıdenti janyndaǵy reformalar jónindegi Joǵary Keńestiń sheshimine sáıkes ulttyq sanaq bıyl júrgiziledi.
«2021 jylǵy ulttyq halyq sanaǵynyń jańalyǵy qazirgi zamanǵy sıfrlyq tehnologııalardy engizý jáne prosesti avtomattandyrýdyń engizilýi. Endi popýlıasııa týraly málimetterdi jınaý prosesi eki jolmen júzege asyrylady. Birinshi ádis sanaq.gov.kz arnaıy saıtynda ınternet-saýalnama júrgizý, ol vırtýaldy kómekshiniń kómegimen respondentterge ornalasqan jerine qaramastan ózdiginen sanaq júrgizýge jáne ózine jáne otbasy múshelerine sanaq paraqtaryn toltyrýǵa múmkindik beredi. Ekinshisi - qajetti sanıtarlyq normalardy saqtaı otyryp, dástúrli jappaı aralaý onlaın-rejımde sanaqtan ótpegen respondentter arasynda júrgiziletin bolady. Bul sharalardy qazan aıynda ótkizý josparlanǵan», — dedi SJRA tóraǵasy.
Jappaı aralaý kezinde ıntervıýerlerdiń elektrondyq planshetterdi paıdalanýy jańashyldyq, olar keıin tıisti óńirlerdegi mektepterge beriledi. Úı-úıdi aralaý a.j. 1-30 qazan aralyǵynda ótedi.
Ulttyq sanaqty ótkizý jónindegi is-sharalar josparyn iske asyrý maqsatynda QR Premer-Mınıstriniń birinshi orynbasary Á. Smaıylovtyń tóraǵalyǵymen arnaıy komıssııa qurý týraly ókim jobasy ázirlenip, múddeli memlekettik organdar men oblys ákimdikterine kelisýge jiberildi. Arnaıy komıssııanyń birinshi otyrysyn aǵymdaǵy jyldyń 10 aqpanynda ótkizý usynylady.
Reformalar jónindegi Joǵary Keńestiń tapsyrmalaryn iske asyrý maqsatynda mynadaı negizgi kúnderdi bekitý usynylady: 2021 jylǵy 10 aqpanǵa deıin Úkimet bekitken jalpyulttyq basymdyqtar, Ulttyq damý jospary týraly jarlyqtardy, Memlekettik basqarý tujyrymdamasyn QR Prezıdentine qol qoıýǵa engizý. Tujyrymdamany iske asyrýdyń egjeı-tegjeıli josparyn 2021 jylǵy 1 naýryzǵa deıin bekitken jón.
Ulttyq jobalardyń tizbesin Prezıdenttiń Jarlyǵymen 2021 jylǵy 1 naýryzǵa deıin bekitý, al jańa ulttyq jobalardy 2021 jylǵy 15 sáýirge deıin ázirleý, sondaı-aq memlekettik baǵdarlamalardy ulttyq jobalarǵa kóshirý turǵysynan olarǵa taldaý júrgizý usynylady.