Sol kúni zalǵa jıylǵan jurtshylyq óner keshine ǵana emes, adamdardyń bir-birine jan jylýyn shashyp, qaıyrymdylyq nuryn syılaıtyn adamgershilik keshine kýá boldy. Ol – kásibı ánshilermen birge memlekettik qyzmetkerlerdiń 80-shi jyldardaǵy ánderdi shyrqaǵan qaıyrymdylyq sharasy bolatyn.
Sol kúni zalǵa jıylǵan jurtshylyq óner keshine ǵana emes, adamdardyń bir-birine jan jylýyn shashyp, qaıyrymdylyq nuryn syılaıtyn adamgershilik keshine kýá boldy. Ol – kásibı ánshilermen birge memlekettik qyzmetkerlerdiń 80-shi jyldardaǵy ánderdi shyrqaǵan qaıyrymdylyq sharasy bolatyn.
Taǵdyrdyń qıyndyǵyn eshkim de qalap almaıdy, al tap bolǵan soń kóterýge májbúrlik paıda bolady. Nebári 37 jastaǵy Elmıra Saparova da osy qıyndyqpen betpe-bet kelgen jan. Avtokólik qaqqan soń sal bolyp tósekke tańylǵan jas taǵdyrdy úsh jyldan beri jary baǵyp-kútýde. Jaryna degen janashyrlyqpen jáne eki uldyń as-sýyn daıyndaý úshin otaǵasynyń JShS-degi jumysynan qol úzýin bir jaǵy qaısarlyq desek, ekinshi jaǵynan onyń materıaldyq jetispeýshilikke ákelip tireri aıtpasa da túsinikti. Qazir aı saıyn 50 myń teńgege úı jaldap júrgen otbasynda mı jaraqaty, mı súıeginiń jabyq synyǵy, aýyr dárejedegi synyq dıagnozymen múgedek atanǵan Elmırany emdetýge qarjy joq. Kóptiń kómegimen Tashkent qalasyna baryp kelgenderine de úsh aıǵa jýyqtaǵan, ota jasatýǵa shaqyrǵanymen, qarjynyń joqtyǵy qolbaılaý.
Jergilikti «Qazaqstan-Aqtaý» telearnasynyń «Úmit sáýlesi» baǵdarlamasy negizinde nazarǵa usynylǵan bul áýletke jol ústinde oılamaǵan jerde múgedek atanǵan Elmıranyń shetelde emdelip, ota jasatyp, óz aıaǵynan basýyna járdem berý úshin Mańǵystaý oblystyq mádenıet basqarmasy kómek qolyn sozdy. Retro keshte 20 aýyl, qala ákimderi, memlekettik mekemeler basshylary 20 kásibı ánshilermen birlese óner kórsetip, án shyrqady. «Áý demeıtin qazaq joq» degen sóz bar, biraq áý degenniń bári ánshi emes ekeni anyq. Qyzmet arasynan ýaqyt taýyp, alys aýyldardan arnaıy Aqtaýǵa kelip sheneýnikterdiń án salýy táýelsiz el azamattarynyń bir-birine degen qamqorlyǵy, bir-birin qoltyqtan demeýi dep túsindik. El táýelsizdiginiń 22 jyldyǵy aıasynda, jańa jyl qarsańynda emdelý úshin qarjyny qaıdan tabamyn dep qınalǵan Elmıra úshin alǵash uıymdastyrylyp otyrǵan izgi shara keleshekte de jalǵasyn tappaq.
– Qarlyǵashtyń qanatymen sý sepkenindeı bolsa da, jetpesti jalǵap, taryqqandy taıap, azamattyq kórsetken uıymdastyrýshylarǵa rahmet aıtamyz. Jınalǵan qarjy otaǵa jetip qalar dep otyrmyz, endi Tashkentke jol júretin bolamyz, – deıdi otaǵasy Eldos.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.