Premer-Mınıstr Asqar Mamınniń tóraǵalyǵymen ótken Úkimet otyrysynda salyqtyq jáne kedendik ákimshilendirý máseleleri qaraldy, dep habarlaıdy Egemen.kz.
«Bıznesti qoldaý úshin ótken jyly Qazaqstanda 700 myńnan astam zańdy tulǵalar men jeke kásipkerlerdi qamtı otyryp, salyqtyq yntalandyrýdyń aýqymdy sharalary iske asyryldy», — dedi A. Mamın.
Qazirgi kezde mıkro jáne shaǵyn bıznes sýbektilerin tekserýge 3 jyldyq moratorıı jalǵasyp jatyr (2023 jylǵy 1 qańtarǵa deıin) jáne arnaıy salyq rejımderin qoldanatyn ShOB sýbektileri tabys salyǵynan bosatyldy. Bul sharalar kásipkerlerge 3 jyl ishinde óz bıznesin keńeıtip, damytýǵa shamamen 400 mlrd teńge jumsaýǵa múmkindik beredi.
Memleket basshysynyń tapsyrmasy boıynsha bıylǵy 1 qańtardan bastap erikti túrde qoldanylatyn bólshek salyqtyń jańa arnaıy salyq rejımi engizildi. Salyq mólsherlemesi alynǵan kiristiń 3% kóleminde belgilengen. Úkimet osy rejımdi qoldaný úshin qyzmet túrleriniń tizbesin anyqtady. Tizbede pandemııa kezeńinde karantındik shekteý sharalary qoldanylǵan qyzmet túrleri qarastyrylǵan. Rejım ShOB sýbektilerine salyq júktemesin azaıtýdy qamtamasyz etý jáne bıýdjetke tólemder men salyq tóleý tártibin ońtaılandyrý úshin daǵdarysqa qarsy shara retinde 2 jylǵa eseptelgen.
Jeke tulǵalardyń salyq mindettemelerin oryndaýyn jeńildetý úshin bıylǵy jyldan bastap múlik pen jerge salynatyn salyqtar biryńǵaı tólemge biriktirilip, kóppáterli turǵyn úılerdiń menshik ıeleri úshin jer salyǵy alynyp tastaldy.
Úkimet basshysy Qarjy mınıstrligine Sıfrlyq damý mınıstrligimen birlesip, salyqtyq ákimshilendirýdiń aqparattyq júıelerin jańǵyrtý jáne olardy basqa memlekettik organdarmen zamanaýı ádisterdi, sonyń ishinde blokcheın men úlken derekterdi qoldana otyryp ıntegrasııalaý jóninde pármendi sharalar qabyldaýdy tapsyrdy.
«Salyq tóleýshiler men bızneske yńǵaıly bolý úshin ázirlengen “E-Salyq Azamat” (salyq ámııany) jáne “E-Salyq Business” tegin mobıldi qosymshalaryn belsendi túrde ilgeriletý kerek. Memleket basshysynyń tapsyrmasy aıasynda Qarjy mınıstrligine jeke kásipkerler úshin onlaın-BKM men POS-termınaldardy paıdalaný kezinde eseptilikti avtomatty túrde toltyrý máselesin sapaly túrde pysyqtaý qajet», — dedi A. Mamın.
Premer-Mınıstr Memleket basshysynyń tapsyrmasyn oryndaý aıasynda osy jyldyń naýryz aıynyń sońyna deıin Shekaradaǵy zańsyz saýda aınalymyna qarsy is-qımyldyń keshendi josparyna usynystar daıyndaý qajettigin atap ótti.
Bıyl Reformalar jónindegi Joǵary keńestiń otyrysynda (bıylǵy 29 qańtarda) qaralǵan ShOB qoldaý jónindegi qosymsha sharalardy iske asyrý maqsatynda Premer-Mınıstr bıylǵy 1 naýryzǵa deıin salyq zańnamasyna qajetti túzetýler daıyndaýdy tapsyrdy.
«Usynylyp otyrǵan ózgerister 500 myńǵa jýyq jaldamaly qyzmetkerdi resmı jumysqa tartýǵa, eńbekaqy tóleý qoryna júktemeni azaıtýǵa, salyq mindettemelerin oryndaý tártibin jeńildetýge jáne respýblıka ekonomıkasyna jańa ınvestısııalar tartýǵa múmkindik beredi», — dedi A. Mamın.