Jas analar baıqaýy

Muhamedjan Tynyshpaev atyn­daǵy Aqtóbe kólik jáne kom­mýnıkasııa kolledjinde «Ana – otbasynyń altyn dińgegi» atty jas analar baıqaýy ótkizildi. 

Muhamedjan Tynyshpaev atyn­daǵy Aqtóbe kólik jáne kom­mýnıkasııa kolledjinde «Ana – otbasynyń altyn dińgegi» atty jas analar baıqaýy ótkizildi. Baıqaýdy Aqtóbe qalalyq ishki saıasat bóliminiń tapsyrysymen «Kontakt» zertteýler men jobalar ortalyǵy uıymdastyrdy. Sharanyń maqsaty otbasynyń tatýlyǵy men birligin saqtaı biletin jas analardy úlgi tutý, ulttyq salt-dástúrdi, ádet-ǵu­rypty nasıhattaý bolyp tabylady.

Buǵan deıin de bul ortalyq otbasy qundylyǵyn arttyrýǵa baǵyttalǵan sharalardy jıi uıymdastyryp kelgen eken. Ási­rese, olardyń ishinen «Jas otaý» baıqaýyn aıryqsha ataýǵa bolady. Bıyl bul baıqaýǵa sál ózgerister engizilip, oǵan bir jáne odan da kópbalaly jas analardy qatystyrý talaby qoıylǵan. Tilek bildirýshilerdiń arasynan on jas ana ǵana baıqaýǵa qatysýǵa joldama alǵan.

Qatysýshylar bes shart boıynsha synǵa tústi. «Tanystyrý» sharty boıynsha qatysýshylar otbasymen birge túsken qyzyqty sýretterdi usy­nyp, án jáne óleń arqyly ózin tanystyrdy. «Ata dástúr – asyl qazynamyz» atty shart boıynsha jas analar salt-dástúr boıynsha sahnalyq kórinis qoısa, «Otbasyma jaıǵan das­tarqan» shartynda túrli taǵam ázirledi. Jas analar baıqaýy qyzǵylyqty da tartysty ótti.

Baıqaý qorytyndysynda Aqtóbe polıtehnıkalyq kol­ledjiniń oqytýshysy Mahabbat Tólen­ǵalıeva birinshi oryndy ıelendi. Ekinshi oryn Muhamedjan Ty­nyshpaev atyndaǵy Aqtóbe kólik jáne kommýnıkasııa kol­ledjiniń oqytýshysy Gúl­baqyt Jandarbekovaǵa be­rildi, al Álııa Moldaǵulova atyn­daǵy Aqtóbe gýmanıtarlyq kol­ledjiniń oqy­týshysy Nurgúl Bıjanǵa úshinshi oryn buıyrdy.

Jeńimpazdarǵa arnaıy dıplomdar men baǵaly syılyqtar tapsyryldy.

Satybaldy SÁÝIRBAI,

 «Egemen Qazaqstan».

Aqtóbe.