Qazaq ulttyq qyzdar pedagogıkalyq ýnıversıteti Tarıh jáne shetel tilderi ınstıtýtynyń 1 kýrs magıstranty Aısana Anarbaı «Science and Technology» halyqaralyq ǵylymı jobalar baıqaýynda ekinshi orynǵa ıe boldy, dep habarlaıdy oqý ornynyń baspasóz qyzmeti.
«Oqýshylarǵa shet tilderin meńgertýde aýdıo-vıdeo materıaldardy qoldanýdyń tıimdiligi» taqyrybyndaǵy joba búgingi kúnde óte ózekti. Joba avtorynyń aıtýynsha, ǵylymı jumys mektep oqýshylarynyń birneshe tildi meńgerýde aýdıo jáne vıdeo materıaldardy qoldanýdyń tıimdiligin aıqyndaıdy.
– Basty maqsatymyz – oqýshylardyń tildik daıarlyǵyn arttyrýǵa septesý. Osy mindetti naqty júzege asyrý úshin pandemııa jaǵdaıynda túrli mýltımedııalyq quraldardy qoldana otyryp, tildik quzirettiligin damytýdy negizgi nazarǵa aldyq, – deıdi Aısana Anarbaı.
Jobada vıdeofragmentpen jumys isteý kezinde muǵalimniń barlyq oqýshylardyń qyzyǵýshylyǵy men ynta-yqylasyn arttyrý joldary qarastyrylǵan. Sonymen qatar tyńdalym, aıtylym, oqylym jáne jazylym sııaqty kommýnıkatıvtik qyzmettiń túrleri jan-jaqty túsindirilgen.
Jas izdenýshiniń ǵylymı jetekshisi Shetel tilderin oqytý ádistemesi kafedrasynyń meńgerýshisi Aqshaıym Jalalovanyń paıymdaýynsha, aǵylshyn tili sabaqtarynda aýdıo jáne vıdeo materıaldaryn paıdalaný oqýshylardyń tildi tez meńgerý qabiletin damytyp, bilim kókjıegin keńeıtedi.
Aıta keteıik, halyqaralyq baıqaýdy Akademık E.A. Býketov atyndaǵy Qaraǵandy ýnıversıteti men Túrkııanyń Atatúrik atyndaǵy Erzýrým ýnıversıteti birlesip uıymdastyrdy.
Sharanyń basty maqsaty – joǵary oqý oryndary arasyndaǵy korporatıvtik baılanystar men akademııalyq kollaborasııany damytý, bilim alýshylardyń ǵylymı qyzmette jáne shettildik daıarlyqta yntasyn arttyrý.
Konkýrsqa usynylǵan jumystar ǵylymı jańashyldyǵy, materıaldy baıandaýdyń tolyqtyǵy men logıkalyq rettiligi jáne alynǵan nátıjelerdiń praktıkalyq mańyzdylyǵy boıynsha saralanyp, zerdelendi.