Taldyqorǵan qalasyndaǵy Nazarbaev Zııatkerlik mektebiniń 10 synyp oqýshysy Mahmut Omar eki birdeı halyqaralyq olımpıadadan top jardy. Jas matematık jaqynda ótken «Azııa – Tynyq muhıt aýmaǵy» olımpıadasy men «Jibek joly» XX matematıka dodasynan jeńimpaz atanyp, kúmis medalǵa ıe boldy.
Álem oqýshylary arasynda onlaın ótken bul jarysqa Argentına, Avstralııa, Reseı, AQSh, Kanada, Indonezııa, Japonııa, Qazaqstan, Koreıa, Qyrǵyzstan, Malaızııa, Meksıka sııaqty qyryqtan astam memleketten úmitkerler qatysqan eken. Al olardyń arasynan Mahmut óziniń ozyq ekenin dáleldep ekinshi orynǵa ıe boldy.
Aıtpaqshy, bul jeńis Mahmuttyń sońǵy kúnderdegi jalǵyz jetistigi emes. Daryndy oqýshy jaqynda ǵana «Elbasy medali» tósbelgisiniń ıegeri atanǵan edi. Bilimdi jastar arasyndaǵy úzdikterdi anyqtaýǵa arnalǵan básekede taldyqorǵandyq zııatker synaq kezeńderinen súrinbeı ótip, arnaıy tósbelgi taqty. Sondaı-aq, Nazarbaev Zııatkerlik mektebiniń 10-synyp oqýshysy Mahmýt Omar erikti retinde bilgenin úıretip júrgen talapty jas. Ol aptasyna eki ret aýyl oqýshylaryna «Matematıka akademııasy» kýrsynan sabaq ótedi eken. Oqýshylarǵa olımpıadalarǵa daıyndalýǵa kómektesip, qosymsha bilim beredi.
Al Mahmuttyń endigi armany – Garvard ýnıversıtetine oqýǵa túsý. Buǵan deıin halyqaralyq Math and Science olympiad, International Mathematics Competition, Bolgar olımpıadasy, «Shekarasyz matematıka» jarysy, Jáýtikov olımpıadasy jáne «Týımaada» olımpıadasynynan júldeli bolǵan jas matematıktiń joly bolsyn deımiz.
Almaty oblysy