Oblystyq J.Aımaýytov atyndaǵy mýzykalyq drama teatry kórermenderin kezekti 32-shi maýsymyna shaqyrdy. Indetke oraı jabylǵan óner ordasy bir jylǵa jýyq úzilisten keıin qaıta jumysyn bastady. Buǵan deıin áleýmettik jelilerde teatr ujymynyń túrli jobalary ótkizilip, jumys onlaın jalǵasqan-dy.
Al jańa teatr maýsymy Muhtar Áýezovtiń «Abaı joly» roman-epopeıasynyń jelisimen jazylǵan «Erte oıandym, oılandym» qoıylymymen ashyldy.
Kórermen qaýym sahnadan jas Abaıdy, aqynnyń balalyq shaǵynan erjetken ýaqytyna deıingi qoǵam bolmysyn, ondaǵy qaıshylyqtardy kóre alady. Týyndy jas Abaımen birge túńiltip, sol bir ýaqyttyń tartysty qatygezdigi, Qodar men Qamqanyń qıyn taǵdyry qınalta kúrsintedi.
Jas Abaı rólinde teatrdyń jas akteri Abzal Jaqyp oınady.
– Jas Abaı bolmysyn, ishki tebirenisin sahnadan berýge úlken rýhanı daıyndyqpen keldim. О́leńderin oqyp, «Qarasózderine» úńilip, oılanyp, tolǵaný qajet boldy, – deıdi ártis.
Qoıýshy rejısser Ádilet Aqanovtyń aıtýynsha, uly jazýshy qalamynan týǵan shyǵarma tilin sahnadan sóıletý úshin árbir ártis oılanýy, ótkenge úńilýi kerek. Qoıylymnyń sahnaǵa shyǵýyna teatr ujymy, barlyq ártis qatysqan. Qunanbaı qajy, Uljan, Zere analarymyz sekildi tulǵaly obrazdar kórinis tapty.
Tipti spektaklge kirispes buryn ártister Abaı atamyzdyń týǵan jeri Semeı eline baryp, ótkenniń estelik rýhanı shejiresimen tanysyp qaıtypty.
Qazir teatr repertýarynda Á.Orazbaevtyń «Bir túp alma aǵashy», A.Vampılovtyń «Metranpaj degen ne?», R.Otarbaevtyń «Ǵasyr qasireti», M.Baıdjıevtiń «Til tabysqandar» qoıylymy men D.Sovetqalıdiń «Qasqyr jáne jeti laq», sondaı-aq M.Qarttyń «Aldar kóseniń dúrbisi» atty ertegileri bar.
Naýryz aıynyń sońynda kórermender Shyńǵys Aıtmatovtyń «Jámıla» lırıkalyq dramasynyń premerasyn kútýde. Bıyl kórermen kóretin jaqsy, mazmundy shyǵarmalar jalǵasyn tappaq.
Al teatr maýsymynyń kesh ashylýynyń taǵy bir sebebi: teatr ǵımaratyna jóndeý jumysy ýaqytynda aıaqtalmady. Merdiger kompanııanyń sapasyz jumysy sotqa berilgen. Ǵımaratty jóndeýge «Jumyspen qamtýdyń jol kartasy-2020» memlekettik baǵdarlamasy aıasynda respýblıkalyq bıýdjetten 302 mln teńge bólingen.
PAVLODAR