Qazaqstanda ǵaryshqa alǵashqy adamnyń ushqanyna 60 jyl tolýyna oraı «Ǵaryshty Sharlaımyn Juldyzdy Tańdaımyn» aksııasy bastaldy, dep habarlaıdy Egemen.kz Aqparat jáne qoǵamdyq damý mınıstrliginiń baspasóz qyzmetine silteme jasap.
Aksııa «Qaıyrymdy ister marafony» ulttyq jobasy aıasynda volonterlerdiń bastamasymen ótýde. Joba qazaqstandyq ǵaryshkerler ómirinen alynǵan faktilerdi, sondaı-aq qazaqstandyq ǵarysh baǵdarlamasynyń praktıkalyq mańyzdylyǵyn nasıhattaýǵa baǵyttalǵan.
Qazaqstandyqtar áleýmettik jelilerdegi paraqshalarynda otandyq ǵaryshkerler men ulttyq ǵarysh baǵdarlamalary týraly qyzyqty faktilerdi #ǴaryshtySharlaımynJuldyzdyTańdaımyn heshtegimen ornalastyrady.
Aksııany qoldaý maqsatynda «Qaıyrymdy ister marafonynyń» áleýmettik jelilerdegi resmı paraqshalarynda qazaqstandyq ǵaryshkerler, ǵalymdar men ǵarysh salasynyń qaıratkerleri týraly aqparattyq faktiler men áńgimeler jınaqtalǵan basylymdar serııasy jarııalanady. Aksııaǵa bastaýysh synyp oqýshylary da qatysady. Olarǵa #ǵaryshkerlerkúni heshtegimen Ǵaryshkerler kúnine arnalǵan sýret baıqaýy ótkizildi.
Esterińizge sala keteıik, «Qaıyrymdy ister marafony» jalpyulttyq jobasy osy jyldyń aqpan aıynda Memleket basshysy Qasym-Jomart Toqaevtyń bastamasymen Qazaqstan Táýelsizdiginiń 30 jyldyǵyn atap ótý aıasynda bastalǵan bolatyn. Jobanyń mańyzdy mindetteriniń biri - qaıyrymdylyqqa beı-jaı qaramaıtyn azamattar men uıymdardy biriktirý jáne bolashaqta qoǵam men adamdardyń ómirin jaqsy jaqqa ózgertetin jomarttyq pen meıirimdilik ıdeıasyna negizdelgen qoǵamdastyq qurý.