Keshe Uly Otan soǵysynyń qaharmandary Májilis úıine kelip, ǵımaratta ornatylǵan Dańq taqtasyn kórdi. Onda Uly Otan soǵysynda erlikpen qaza tapqan Qazaq KSR Joǵarǵy Keńesiniń birinshi shaqyrylym depýtattarynyń esimderi altyn áriptermen oıyp jazylǵan.
О́skeleń urpaqqa beıbit ómir syılaǵan, keýdeleri orden men medaldarǵa toly ardagerlerdi Parlament qabyrǵasynda Májilis Tóraǵasy, “Nur Otan” HDP fraksııasynyń jetekshisi Oral Muhamedjanov qarsy alyp, quttyqtaý sóz sóıledi.
Ardagerler 1941-1945 jyldar ishinde 1418 kúnge sozylǵan surapyl soǵysta bastan keshken oqıǵalarymen bólisti, jastarǵa izgi tilegin jetkizdi.
Qurmetti qonaqtardyń ishinde Aıdarhan Báıken bar. Ol 17 jasynda óz erkimen áskerge alynyp, 1943 jyly mamyr aıynda jaýdan “til” ákelýdegi jasaǵan erligi úshin áıgili qolbasshy Baýyrjan Momyshulynyń qolynan Dańq ordenin alǵan. Osyndaı ekinshi ordendi 1944 jyly maýsym aıynda jaýdyń artıllerııalyq batareıasyn joıyp jibergeni úshin alǵan.
Surapyl soǵysta eren erlik kórsetken ózge de ardagerler ómir joldary men maıdandastary jaıly syr shertti. Astana qalalyq memlekettik fılarmonııasy merekelik konsert qoıyp, osy sharaǵa qatysqan 15 ardagerdiń árbireýine jalyndy jyldardyń ánin arnady.
Meımandar arnaıy jaıylǵan merekelik dastarqannan dám tatty. Beıbit ómirdi ornatqan asyl jandarǵa arnaıy syılyqtar tabys etildi. Soǵys qaharmandary parlamentshilermen birge eskertkishke fotosýretke tústi.
“Egemen-aqparat”.