Byltyr «Báıterek» ulttyq basqarýshy holdınginiń turǵyn úı blogy qaıta uıymdastyrylyp, úsh enshiles kompanııanyń biriktirilgeni belgili.
Osydan keıin naryqta jańa oıynshy – turǵyn úı qurylysynyń biryńǵaı operatory – «Qazaqstan turǵyn úı kompanııasy» AQ paıda boldy. Endi, mine, biryńǵaı operator qurylys salýshylardyń jaýapkershiligin arttyrýǵa nıetti. Ol úshin zańnamaǵa birqatar ózgeris engizýdi kózdep otyr.
Biryńǵaı operatordyń mindetine qurylys pen ony damytý ǵana emes, sondaı-aq memlekettik baǵdarlamalar boıynsha iske asyrylǵan turǵyn úıdi odan ári basqarý da kiredi. Al bıyl jyl sońyna deıin elimizde shamamen 17 mln sharshy metr turǵyn úı salynýy kerek.
Búginde Qazaqstan turǵyn úı kompanııasynyń qorjynynda el boıynsha 395 nysanda 22 myńnan astam páter bar. Qaıta uıymdastyrý kezinde olardyń bir bóligi «Báıterek development» AQ-tan berilgen bolatyn. Bular – qurylysyndaǵy aqaýlarǵa qatysty shaǵym jıi aıtylǵan ári ınjenerlik olqylyqtary kóp problemalyq nysandar. Úılerdiń kóbiniń kepildik merzimi ótip ketken. Jekelegen nysandar boıynsha qurylys salýshylar qarjylyq turǵydan dármensiz dep tanyldy nemese sot prosesinen ótýde. Klıentterge kómektesý úshin kompanııa problemalardy óz esebinen sheshedi.
– Jaqynda О́skemende qurylys tehnologııasynyń saqtalmaýynan deformasııalyq jikterdiń jarylýy boldy. Qaraǵandyda memlekettik baǵdarlama boıynsha paıdalanýǵa berilgen úılerdiń birinde shatyrǵa qatysty problemalar bar. Jaqyn arada bizge berilgen nysandarǵa aýqymdy tehnıkalyq tekserý júrgizýdi josparlap otyrmyz. О́ıtkeni bularǵa turǵyndar tarapynan shaǵym kóp túsedi. Árbir nysan boıynsha jeke sheshim qabyldanyp, tıisti jumystar júrgiziletin bolady, – deıdi «Qazaqstan turǵyn úı kompanııasy» AQ tehnıkalyq monıtorıng departamentiniń dırektory Ádiljan Qabyldın.
Bolashaqta mundaı jaǵdaılardyń aldyn alý úshin Qazaqstan turǵyn úı kompanııasy zańnamaǵa birqatar túzetý engizýdi josparlap otyr. Sondaı-aq qurylys prosesine qatysýshylardyń barlyǵynyń jaýapkershiligin qatańdatýǵa basa mán berilmek. Budan bólek kepildik mindettemeleriniń merzimin ulǵaıtý da josparda bar.
Búginde turǵyn úı qurylysy nysandary boıynsha tireý jáne qorshaý konstrýksııalaryna 10 jyl kepildik beriledi. Injenerlik jabdyqqa beriletin kepildik merzimi 3 jyldy quraıdy. Al qalǵandaryna nysan paıdalanýǵa berilgen sátten bastap bar bolǵany 2 jyl ǵana kepildik usynylady. Páterlerdiń bári birdeı satylyp ketpeıdi. Sondyqtan klıentter kepildik merzimi ótip ketken páterlerdi de satyp alyp júr.
– Biz klıentterimizdiń múddesin qorǵaımyz. Olardyń kópshiligi – halyqtyń áleýmettik osal toptaryna jatatyn adamdar. Onyń ústine olar bul turǵyn úıdi uzaq jyldar kútti ári kóptegen jyl boıy jaldaý aqysyn tóleıdi. Sondyqtan qurylys salýshylardyń salynyp jatqan úılerge ǵana emes, onyń odan keıingi sapasyna da jaýap berýi mańyzdy, – deıdi monıtorıng departamentiniń dırektory.