Parlament Májilisinde ótken jıynda Ishki ister mınıstri Qalmuhanbet Qasymov Shý dalasyndaǵy qarasora týraly másele kóterdi. Bul týraly «KTK» telearnasy habarlady.
«Shý alqabynyń problemasyn tez arada sheshýimiz kerek. Árıne, 140 myń gektar jerdi qorshap tastaý múmkin emes. Alaıda, odan taralatyn esirtki barlyq jerge ketip jatyr. Muny sheshýdiń eki joly bar: Biri - alqaptyń kózin qurtý, ekinshisi – ol jerdi sharýashylyqta paıdalaný», - dedi jıynda Ishki ister mınıstri Q. Qasymov.
Shý dalasymen kúrese almaı otyrǵan mınıstrge depýtattar aqyl-keńesterin aıaǵan joq. Máselen, Parlament Májilisiniń depýtaty Darıǵa Nazarbaeva alqapty farmasevtıkalyq uıymdardyń qaramaǵyna berip, ol jerge zaýyt salýdy usyndy. О́ıtkeni, shetelden mıllıondaǵan qarjyǵa satyp alynatyn psıhotropty dári-dármekterdi osynda ósetin qarasoradan-aq daıyndaýǵa bolady eken. Bul esirtki shóbinen jasalatyn preparattar búginde Izraılde, Kanada men Eýropa elderinde qaterli isikke qarsy qoldanylady.
«Kóknárdi medısınada paıdalanýǵa bolady. Odan kezinde maı jasaǵan jáne 25 myń túrli ónim shyǵarylǵan. Onymen kúresýdiń ornyna ony basqarýǵa berip, zaýyttardy salyp, osy kóknárdi adamdardyń paıdasyna jasaýǵa múmkinshilik bar», - dedi halyq qalaýlysy Darıǵa Nazarbaeva.
Jıyn barysynda Ishki ister mınıstri Q. Qasymov nashaqorlardy daladan emes, qaladan izdeý kerek degendi aıtyp saldy. Ol memlekettik qyzmetkerlerdiń bárin jumysqa alarda jappaı testten ótkizý kerek dep sanaıdy. Mundaı tekserýge oqýshylar men stýdentter de ilinýi múmkin.
Elimizde 40 myńnan astam adam esirtkige táýeldi. Olardyń basym bóligi áıelder eken. Depýtattar nashaqorlardy emdeıtin dáriler Shý dalasyndaǵy shópten jasalsa, bul «statıstıka áldeqaıda tómendeıdi» degen senimde...
Baqytbek Keneshuly.
Derekkóz: «KTK» telearnasy
Foto: Ras.kz.