Tórt boksshymyz alǵashqy jekpe-jeginde-aq jeńilip, jer shuqyp qalǵan edik. Búgin eńsemiz qaıta tiktelip, endi tórt boksshynyń tileýin tilep otyrǵan jaıymyz bar. Keshe Qazaqstan quramasynyń kóshbasshylary Ábilhan Amanqul men Qamshybek Qońqabaev ketken eseni qaıtaratyndaı qalypta óner kórsetti.
75 kıloǵa deıingi salmaqta judyryqtasqan Ábilhan Amanqul ózbekstandyq Fanat Qahromonovpen kezdesken bolatyn. Tartysty jekpe-jektiń birinshi raýndynda tóreshiler jeńisti ózbek boksshysyna berdi. Taǵy da keshegi ssenarıı qaıtalana ma dep alańdadyq. Alaıda ekinshi raýndta tez esin jıǵan Ábilhan qarsylasyn nokdaýnǵa jiberip, basymdyqty kúsheıte tústi. Úshinshi kezeńde de qarsylasyna birneshe soqqy darytqanynyń nátıjesinde, tóreshiler jeńisti biraýyzdan Amanqulǵa berdi. Endi shırek fınalda Ábilhan Brazılııanyń ókili Ebert Konseısan Soýzamen qolǵap túıistiredi. Kezdesý 1 tamyzǵa josparlanǵan.
«Bul meniń Olımpıadadaǵy birinshi kezdesýim bolǵandyqtan qıyn soqty. Jalpy, Olımpıadada jekpe-jek ońaı bolmaıdy. Jeńiske jetkenime qýanyshtymyn. Shırek fınaldaǵy qarsylasymmen buǵan deıin kezdespegenbiz. Qarsylasymnyń qandaı ekenin rıng kórsetedi. Árıne, quramadaǵy jigitterdiń jeńilisi kóńil kúıimizge kádimgideı áser etti. Ne degenmen, olar myqty sportshylar ǵoı. Biz – bir komandamyz. Mundaıda bosańsý durys emes dep oılaımyn. Biz ne úshin kelgenimizdi bilemiz. Olımpıada bala kezden armanymyzǵa aınalǵan. Birinshi orynda eldiń namysyn abyroımen qorǵaý mańyzdy», dedi Ábilhan.
91 kılodan joǵary salmaqta rıngke shyqqan Qamshybek Qońqabaev Mysyr eliniń ókili Esrı Mustafamen kezdesip, aıqyn basymdyqpen utty.
Qamshybektiń shırek fınaldaǵy qarsylasy reseılik Ivan Verıasov bolmaq. Eger de Amanqul men Qońqabaev jeńiske jetse, jartylaı fınalǵa joldama alady.
Qazaqstandyq sadaqshy Ilfat Abdýllın 1/16 aınalymda nıderlandyq Stıv Vıdjlermen kezdesip, 6:4 esebimen jeńiske jetti. Ázirge Ilfat Abdýllınniń 1/16 aınalymdaǵy qarsylasy anyqtalǵan joq.
Tokıo Olımpıadasynyń jartylaı fınalyna deıin jetken tennısshi Elena Rybakına álemdik reıtıngte 12-orynda turǵan shveısarııalyq Belında Benchıchpen kezdesken-di. Tartysty kezdesý 2 saǵat 44 mınýtqa sozylyp, Benchıch 7:6, 4:6, 6:3 esebimen jeńiske jetti. Shynynda qazaqstandyqtar Rybakınanyń jeńisine senimdi edi. Beısenbiniń basty saıysy tennıs bolyp, el-jurt Elenaǵa qarap eleńdegen-di... Endi Elena Rybakına Olımpıadanyń qola júldesine talasady.
Bul kúni sý dobynan Qazaqstan erler quramasy Tokıo Olımpıadasynda kezekti ret jeńildi. El quramasy toptyq synnyń kezekti kezdesýinde Ispanııa quramasyna qarsy oınady. Eki qurama arasyndaǵy kezdesý 16:4 (3-0, 6-0, 11-2, 11-4) esebimen ıspanııalyqtardyń paıdasyna sheshildi. Oıyn barysynda Qazaqstan quramasynan Dýshan Markovıch, Srjan Výksanovıch (2) jáne Mıhaıl Rýdaı kózge tústi. Endi ulttyq qurama jigitteri 31 shildede Chernogorııa komandasymen kezdesedi.
Tokıo Olımpıadasynda akademııalyq esýden jartylaı fınal aıaqtaldy. Qazaqstan sapynan atalǵan sanat boıynsha jarys jolyna Vladıslav Iаkovlev shyqty. Nátıjesinde, otandasymyz óz tobynda besinshi bolyp márege jetti. 30 shilde kúni qazaqstandyq sportshy D fınalyna qatysady. D tobyna qatysýshylar ózara 19-24 oryndardy sarapqa salady.
Keshe Olımpıada qalashyǵyna Olımpıada chempıony Olga Rypakova bastaǵan qazaqstandyq sportshylardyń ekinshi legi ornalasty. Jeńil atletıka, erkin kúres, áıelder kúresi, kórkem gımnastıka, ashyq sýda júzý men bessaıystan synǵa túsetin sportshylar el namysyn oıdaǵydaı qorǵaıdy degen senim bar. Endeshe qomaqty júldeniń de aýyly alys bolmaýy kerek.