Arqalyq qalasyndaǵy oblystyq Dala ólkesi tarıhy mýzeıinde taǵylymdy tarıhtan syr shertetin kóne jádigerler jeterlik. Sondaı asyl dúnıeniń biri – Qazaqstannyń halyq aqyny, Abaı atyndaǵy Memlekettik syılyqtyń laýreaty Nurhan Ahmetbekovtiń dombyrasy.
Bul qundy jádigerdi mýzeıge aqynnyń balasy Málikzadanyń úıindegi Turaǵal ájemiz tapsyrǵan. Nurhan atamyz jazbashaǵa da, sýyryp salmaǵa da júırik, arqaly aqyn bolǵan. Tuǵyrly talant ıesi klassıkalyq shyǵys úlgileriniń jelisimen birneshe dastan jazdy. Máselen, «Myń bir tún» ertegisimen baılanystyrǵan «Qamarly zaman», «Alban Jupar hanym» atty shyǵarmalary el arasyna keńinen tanyldy. Sondaı-aq onyń ómirdegi tarıhı oqıǵalardy poezııa tilimen sóıletken «Esim seri», «Qarǵa», «Amangeldi» dastandaryn jurtshylyq áli kúnge deıin tamsanyp aıtady. Ásirese, aqynnyń ótken ǵasyrdyń 30-shy jyldaryndaǵy alapat ashtyq shyndyǵyn alǵashqylardyń biri bolyp jazǵan «Kúlándam» dastany – ádebıetimizdiń asyl qazynasyna qosylǵan súbeli týyndy deýge bolady. Aqyn osy shyǵarmasy jáne Kenesary men Naýryzbaıdy jyrlaǵany úshin sol jyldary biraz qýǵyn kórgen.
Nurhan Ahmetbekov zamandastary Omar Shıpın, Qashqynbaı Qazuly, Sát Esenbaev, Qutjan Qanjyǵalın, Álı Dosybaev, Ahmethan Ábiqaev, Moldahmet Tyrbıev, Maıtash Smaǵulov sekildi aqyndarmen tize qosyp, ulttyq aıtys óneriniń damýyna úlken úles qosty. 1943 jyly ótken respýblıkalyq aıtystyń jeńimpazy boldy.
Ardaqty azamat aqyndyqpen birge qyzmetti de qatar alyp, 1936-1946 jyldary Torǵaı óńirinde aýdanaralyq halyq teatryn uıymdastyryp, el ishindegi ónerli adamdardy toptastyryp, birneshe qoıylymdar sahnalady. Soǵys jyldarynda jalyndy jyrlarymen eldiń jigerin janyp, jeńiske degen úmitterin oıatty. Aıtýly aqynnyń búginge deıin «Tosyn tolǵaýy», «Amangeldi», «Jasaýyl qyrǵyny», «N.Ahmetbekov» tańdamaly shyǵarmalary sekildi birneshe kitaptary jaryq kórgen. Ult rýhanııatyna shuraıly shyǵarmalarymen ólsheýsiz úles qosqan Nurhan atamyzdyń qasıetti qara dombyrasy – barsha qazaq úshin baǵaly jádiger desek artyq emes.