Astana qalasynyń ákimi Jeńis Qasymbek elordada salynyp jatqan medısınalyq nysandardyń barysy týraly aıtty. Sońǵy on jylda qalada bosaný sany 35% kórsetkishke artqandyqtan, akýsherlik stasıonarlarǵa túsetin kúsh edáýir kóbeıgen. Osy máseleni sheshý úshin qalada árqaısysy 250 orynǵa arnalǵan eki perınataldyq ortalyq salynady, dep habarlaıdy Egemen.kz.
Qala ákiminiń aıtýynsha, alǵashqy perınataldyq ortalyq «Samuryq-Qazyna» qorynyń qarajaty esebinen salynady. Qazirgi qurylys jumystary júrip jatyr, nysandy 2027 jyly paıdalanýǵa berý josparlanǵan. Al ekinshi ortalyq boıynsha bıyl jobalaý jumysy aıaqtalyp, 2028 jyly paıdalanýǵa beriledi dep kútiledi.
Sıfrly medısına: MedTech ekojúıesin damytý nege mańyzdy?
Jedel medısınalyq járdemdi damytý aıasynda jaqyn ýaqytta №2 qalalyq kópbeıindi aýrýhana janyndaǵy qabyldaý-dıagnostıkalyq kesheniniń qurylysy aıaqtalady. Bul medısınalyq kómektiń jyldamdyǵyn arttyryp, stasıonarlyq kómektiń basty nysanyna aınalmaq. Sol sııaqty «Samuryq-Qazyna» qorynyń qoldaýymen Saryarqa aýdanynda №3 jańa kópbeıindi qalalyq aýrýhananyń jobalaý jumysy jalǵasyp jatyr.
Bıyl medısına qyzmetkerleriniń eńbekaqysy ósedi
Balalarǵa kórsetiletin jedel medısınalyq kómekke de erekshe nazar aýdarylady. Bıyl 15 aqpanǵa deıin Ulttyq shuǵyl medısınany úılestirý ortalyǵynyń bazasynda Nura jáne Esil aýdandary úshin balalarǵa arnalǵan travmatologııalyq pýnkt jumysyn bastaıdy. Bul oń jaǵalaýdaǵy balalar travmpýnktine túsetin júktemeni azaıtyp, medısınalyq kómektiń sapasyn arttyrady.
«Jalpy alǵanda, elordada densaýlyq saqtaý salasyna qatysty 11 jańa nysannyń qurylysy josparlanǵan. Olardyń qatarynda respýblıkalyq ortalyqtar, kópsalaly aýrýhanalar, emhanalar jáne qosalqy jedel járdem stansalary bar», dedi Jeńis Qasymbek.