Senat depýtattary Súıindik Aldashev pen Baqtybaı Shelpekov Mańǵystaý oblysynda bilim berý jáne densaýlyq saqtaý salalaryn damytýǵa arnalǵan baǵdarlamalardyń iske asyrylý barysymen tanysty, dep habarlady joǵarǵy Palatanyń baspasóz qyzmeti.
Beıneý aýdanyna arnaıy barǵan senatorlar jergilikti orta mekteptiń jańa korpýsynyń qurylys jumystaryna nazar aýdardy. Jańa nysan bilim ordasynyń syıymdylyǵyn taǵy 312 orynǵa kóbeıtedi. Depýtattar bul jumystyń mańyzdylyǵyn atap ótip, jańa korpýs úsh aýysymmen oqytýdy joıýǵa múmkindik beretinin, ıaǵnı muǵalimder men oqýshylar úshin bilim berý prosesi neǵurlym yńǵaıly bolatynyn aıtty.
Sonymen qatar senatorlar aýdandyq emhanada bolyp, medısına qyzmetkerlerimen kezdesti. Qazirgi tańda emhana júktemesiniń shamadan tys kóp bolýy aýdandaǵy mańyzdy máselelerdiń biri bolyp otyr. Naqty aıtqanda, bastapqyda tórt myń adamǵa eseptelgen emhana qazir on bes myńnan astam naýqasqa qyzmet kórsetedi. Sondyqtan kezdesý barysynda taǵy bir emhana salý máselesi kóterildi. Depýtattar qazirgi qalyptasqan jaǵdaıda aýdan turǵyndary da, dárigerlerdiń ózderi de zardap shegetinine nazar aýdaryp, aımaq basshylyǵyna atalǵan túıtkildi tez arada sheshýdi qolǵa alý qajettigin aıtty.
Sondaı-aq Súıindik Aldashev pen Baqtybaı Shelpekov jergilikti sút kombınatyna bardy. Búginde atalǵan kásiporynda jylyna 430 mıllıon tekshe metr sút ónimderi óndiriledi. Aldaǵy ýaqytta 1 mlrd teńge ınvestısııalaý arqyly kombınattyń óndiristik qýatyn arttyrý josparlanyp otyr.