Keńes ıdeologııasynan bosap shyqqan qazaq óneriniń qylqalamy egemendikke qol jetkizgeli erkin kósildi. Ulttyq beıneleý óneriniń órisi keńip, boıaýy túrlendi. Jańashyldyqqa jany qushtar qylqalam sheberleri azattyqtyń aspanyn qalaǵan túsimen boıady. Mine, sondaı daryndy sýretshilerdiń biri – Darııa Kalımova-Qasteeva.
Jaqynda kórkemónerden qýanysh tapqan óner ıesiniń «Ýaqyttyń shynaıy sabaqtastyǵy» atty kórmesi ótken bolatyn. Elordadaǵy saltanatty is-sharanyń biz de kýási bolǵan edik.
Áýeli betashar sóz memleket jáne qoǵam qaıratkeri, tanymal túrkitanýshy, fılologııa ǵylymynyń doktory, professor Myrzataı Joldasbekovke berildi.
«Búgingi ashylyp otyrǵan kórmeniń men úshin mańyzy zor. Sebebi Darııanyń ata-anasy Muhıt Kalımov pen Lıza Kalımovany burynnan tanımyn. Muhıt – qazaqtyń beıneleý óneriniń kórnekti ókili. Otbasyndaǵy árbir jan shyǵarmashylyq pen ónerge tunyp turǵan azamattar», degen ol, osynaý ıgi is-sharaǵa muryndyq bolǵan uıymdastyrýshylarǵa alǵysyn bildirdi.
О́z kezeginde Ulttyq mýzeı dırektorynyń orynbasary Nazgúl Kadrımbetova sýretshiniń shyǵarmashylyǵyna toqtalyp ótti.
«Gobelen – úlken eńbekti, sabyrlyqty qajet etetin, oıý-órnek kompozısııasy bar, sándik ónerdiń bir túri. Darııa hanym jasaǵan búgingi týyndylardan biz ana beınesin, áıel adamnyń obrazyn aıryqsha kóre alamyz. Bul kórme mýzeı qonaqtarynyń júreginen erekshe oryn alady dep senemin», dedi N.Kadrımbetova.
Odan keıin kesh ıesi el Táýelsizdiginiń 30 jyldyǵyna oraı Ulttyq mýzeı dırektorynyń atynan arnaıy sertıfıkatpen marapattaldy.
Arnaıy kórsetilgen syı-sııapattan soń Darııa Kalımova-Qasteevanyń anasy, belgili sýretshi-kesteshi Lıza Kalımova óziniń jyly lebizin bildirdi.
Kórmege Darııa Kalımova-Qasteevanyń óz týyndylarymen qosa, ákesi, ataqty qazaqstandyq sýretshi Muhıt Kalımovtiń jumystary da qoıylǵan eken.
Aıta keteıik, Muhıt Kalımov – portrettiń sózsiz sheberi. Qazaqtyń ataqty tulǵalarynyń portretterin beıneleıtin tarıhı taqyryptarǵa úlken mán bere bilgen sheber.
Osyndaı ónerli otbasynda dúnıege kelgen Darııa Kalımova-Qasteeva sándik-qoldanbaly ónerdi, ıaǵnı gobelendi tańdady. Onyń gobelenderi tegistikpen, syzyqtardyń belgili bir ótimdiligimen jáne ashyq, qanyq tústermen erekshelenedi.
Kóptegen shyǵarmasynan qazaq áıeliniń beınesi kórinedi. Áıel taǵdyrynyń fılosofııalyq obrazy «Betashar» jáne «Ana» sııaqty keremet týyndylarynda ashylady. Al jastyq pen symbat beıneleri «Kóktem» jáne «Arfaly qyz» shyǵarmalarynda kezdesedi. Batık pen gobelenge tán dekoratıvtilik dástúrli keskindeme men klassıkalyq ulttyq mánerde salynǵan sýretter de kórinedi. Onyń shyǵarmalary tegistik gúl kontrasstarymen úılesip, gúl, taýys jáne Almaty aportyn kórsetedi. Týyndylary jaǵymdy tústermen aıshyqtalǵan. Áıel energııasymen úndesetin meıirim men mahabbat, úmit pen sulýlyq biriktirilgen.
Atalǵan kórmeni qala turǵyndary men qonaqtary 10 qazanǵa deıin Ulttyq mýzeıge kelip, tamashalaı alady.