Aqtóbe qalasyndaǵy №12 shaǵyn aýdanynda taǵy bir jańa densaýlyq saqtaý salasynyń nysany boı kóterdi. Jaqynda osy №3 qalalyq emhananyń saltanatty ashylýy boldy. Bul emhana №11 jáne №12, sondaı-aq, «Kóktem» jáne «Bolashaq» aýdandarynda turatyn 68,5 myń adamǵa joǵary sapaly medısınalyq qyzmet kórsetetin bolady. Olardyń 23 myńyn 15 jasqa deıingi balalar quraıdy. Buryn osy emhana ornalasqan «Sazdy» jáne «Bolashaq» shaǵyn aýdandaryndaǵy emdeý oryndary budan bylaı fılıal retinde jumys isteı beredi.
Jańa emhana aýysymyna 500 adamdy qabyldaıdy. Emhana osy zamanǵy ozyq medısınalyq tehnıkalarmen jaraqtandyrylǵan. Munda Fınlıandııadan jáne Vengrııadan shyǵarylǵan rentgen qondyrǵylarymen jabdyqtalǵan sáýlelik dıagnostıka bólimshesi bar. Teledıdarmen basqarylatyn rentgen apparaty, mammograf jáne flıýrografııalyq apparat jumys istep tur. Mamandardyń bólmeleri asqazan aýrýlaryn anyqtaıtyn beıneendoskopııalyq júıemen, ýltradybystyq zertteýler júrgizetin apparattarmen jaraqtandyrylǵan. Tis, kóz jáne LOR dárigerleriniń jumys oryndary avtomattandyrylǵan júıelermen qamtamasyz etilgen. Aýrýdy anyqtaý múmkindigin keńeıtý úshin emhanaǵa bıohımııalyq, gematogııalyq jáne ımmýnofermenttik zerthanalyq qondyrǵylar ornatylǵan.
Jańa emhanany paıdalanýǵa berýge bıýdjetten 1,2 mıllıard teńge qarjy jumsaldy. Onyń 800 mıllıon teńgesine qurylys jumystary júrgizilse, 400 mıllıon teńgesine medısınalyq qural-jabdyqtar satyp alyndy. Emhananyń bas dárigeri Jánibek Narmuhamedovtyń aıtýynsha, emdeý mekemesine qajetti maman dárigerler men medbıkeler tolyq qabyldanypty. Qazir munda 471 dáriger men medbıke jumys isteıdi. О́tken jyly M.Ospanov atyndaǵy Batys Qazaqstan memlekettik medısına ýnıversıtetin bitirgen úsh jas mamandy qabyldap, Almatyda óz salalary boıynsha mamandaný kýrsynan oqytyp alǵan.
Oblys ortalyǵyndaǵy jańa №3 qalalyq emhananyń saltanatty ashylýyna arnaıy kelgen oblys ákimi Arhımed Muhambetov ótken jyly densaýlyq saqtaý salasyn qarjylandyrýǵa 2,7 mıllıard teńge bólingenin, Shubarqudyq aýylynda 250 oryndyq aýrýhana, Aqtóbede 300 oryndyq eresekter aýrýhanasy, sondaı-aq, 9 dárigerlik ambýlatorııa paıdalanýǵa berilgenin atap ótti. Salany qarjylandyrý bıyl da arta túsetinin jetkizdi. Endi osy aýdanda 600 oryndyq orta mektep salynatynyn aıtty. Shaǵyn aýdan turǵyndary atynan sóz alǵan Amangeldi Esqalıev turǵyndarǵa qajetti áleýmettik máselelerdi sheshýdegi ıgi isteri úshin Elbasyna jáne óńir basshysyna rızashylyǵyn bildirdi.
Satybaldy SÁÝIRBAI,
«Egemen Qazaqstan».
Aqtóbe oblysy.