Jaqynda Aqtóbe oblystyq telekommýnıkasııa dıreksııasy ǵımaratynda bes aýdandyq óndiristik telekommýnıkasııa torabynyń ókilderine sý jańa avtokólikterdiń kiltteri tapsyryldy. Avtokólikter óndiristik úderistiń sapasyn arttyrý jáne abonentterge jedel qyzmet kórsetý maqsatynda satyp alynǵan. Aýyldar arasyndaǵy oıqy-shoıqy joldarda jaqsy júretin «ÝAZ» markaly jeńil avtokólikterdiń kiltteri qoldaryna tıgen aýdandardan kelgen torap qyzmetkerleriniń qýanyshtarynda shek joq. Endi olar aýa raıynyń qandaı jaǵdaıynda da sapaly baılanys qyzmetin qamtamasyz ete alady.
Aqtóbe oblystyq telekommýnıkasııa dıreksııasynyń is basqarýshysy Danyshpan Kópjasarovtyń aıtýynsha, sońǵy eki jyl ishinde kásiporynnyń avtokólik sharýashylyǵyna qarqyndy jańartý júrgizilgen, bul dıreksııanyń óndiristik kórsetkishterine oń yqpal etken kórinedi. Qazir barlyq aýdandyq toraptar kóliktermen tolyq qamtamasyz etilgen. Dıreksııa birtindep barlyq eski avtokólikterdi jańasyna aýystyryp jatyr. Mysaly, byltyr – 17, bıyl 5 kólik satyp alynǵan eken. Ústimizdegi jyldyń aıaǵyna deıin taǵy birneshe kólik satyp alý kózdelýde. Bul kásiporynnyń turǵyndarǵa qyzmet kórsetý sapasyn burynǵydan anaǵurlym arttyrýǵa yqpal etedi dep kútilýde.
Satybaldy SÁÝIRBAI,
«Egemen Qazaqstan».
Aqtóbe oblysy.