Abý-Dabıde aıqasady
Qazaqtyń qaısar uly Damır Ismaǵulov UFC-degi óziniń kezekti jekpe-jegin 30 qazanda Birikken Arab Ámirlikteriniń astanasy – Abý-Dabı qalasynda ótkizedi.
Reseıdiń Orynbor oblysynda týyp-ósken 30 jastaǵy qandasymyz 2014 jyldan beri osy sport túrin janyna serik etip keledi. Sol aralyqta 21 kezdesý ótkizip, tek bireýinde ǵana utyldy. О́zge básekelerdiń barlyǵynda qarsylastaryn sypyra utty. 10 jekpe-jekti merziminen buryn aıaqtady. Damır 2017 jyly Reseıdegi M-1 uıymynyń altyn belbeýin ıelenip, sol ataǵyn birneshe ret sátti qorǵady. Sodan keıin álemdegi eń beldi promoýshen – UFC-men kelisimshartqa otyrdy. Osy uıymnyń muryndyq bolýymen ótken jarystarda tórt ret oktagonǵa shyǵyp, barlyq básekede jeńiske jetti. Endi ol reseılik Magomed Mýstafaevpen kúsh synasady.
Magomed 33 jasta. Daǵystannyń týmasy aralas jekpe-jekten ótetin jarystarǵa 2011 jyldan beri úzdiksiz qatysyp keledi. Sol kezden beri 18 ret aıqas alańyna shyǵyp, 14 kezdesýdi óz paıdasyna sheshti. Sol saıystardyń barlyǵynda ol aıqyn basymdyq tanytty.
«Barys» taǵy da utyldy
Qurlyqtyq hokkeı lıgasynda (QHL) kúsh synasyp júrgen Nur-Sultannyń «Barysy» kezekti týr oıynyn Ombynyń «Avangardymen» ótkizdi.
Máskeý oblysy aýmaǵynda ornalasqan «Arena Balashıhada» ótken match bir mınýt únsizdikpen bastaldy. Osylaısha, hokkeıshiler osydan 13 jyl buryn dúnıeden ozǵan Alekseı Cherepanovqa taǵzym etti. Asa daryndy oıynshy 2008 jyldyń 13 qazanynda «Avangard» pen «Vıtıaz» klýbtary arasyndaǵy báseke barysynda kenetten júregi toqtap, qaıtys bolǵan edi. Ol nebári 19 jasta bolatyn.... Al matchtyń ózine keletin bolsaq, alǵashqy shaıba oıyn bastalǵannan 33 mınýttan keıin soǵyldy. Bul goldyń avtory – Korben Naıt. 40-mınýtta Alekseı Emelın mergendik tynytsa, 50-mınýtta Nıkıta Mıhaılıs esep aıyrmasyn qysqartty. Biraq odan árige qonaqtardyń áli jetpedi. 51 jáne 59-mınýttarda «Avangardtyń» oıynshylary taǵy eki ret nysanany dál kózdedi. Esep – 4:1.
Qazirgi kezde «Barys» turaqty birinshiliktiń jarys kestesinde 14 upaımen 18-orynda keledi. О́ziniń kelesi kezdesýin jerlesterimiz 15 qazanda Mytıshıde Qytaıdyń «Kýnlýn Red Star» klýbymen ótkizedi.
Japonııada saıysqa túsedi
27 qazanda Japonııanyń Kıtakıýsıý qalasynda kórkem gımnastıkadan álem chempıonaty bastalady. Myń buralǵan sulýlar jınalatyn saıysta qazaqstandyq sportshylar da baq synaıdy.
Kúnshyǵys elinde elimizdiń eń úzdik gımnasshylary óner kórsetedi. Solardyń arasynan Eljana Tanıevany erekshe atap ótýge bolady. Bul kúnderi Máskeýdegi Irına Vıner-Ýsmanova atyndaǵy Kórkem gımnastıka ortalyǵynda jattyǵyp júrgen ol bıyldyń ózinde birqatar halyqaralyq týrnırde mol oljaǵa kenelip, maıtalman mamandardyń nazaryn ózine aýdardy. Kúni keshe ǵana Reseı astanasynda ótken Olympico Cup týrnırinde qazaqtyń daryndy qyzy úsh qola medaldi ıelendi. Jekelgen saıysta Eljanamen qatar, Dilnaz Baılenova da óz ónerin ortaǵa salady. Al toptyq básekede Aıdana men Daıana Shaıahmetovalar, Mılana Býdnık, Alına Chernysheva, Aısulý Myrzaǵalıeva jáne Saǵına Muratqyzy syndy gımnasshylar baq synaıdy.
Ulttyq komandamyzdyń bas bapkeri Álııa Iýsýpovanyń aıtýynsha, bizdiń sportshylardyń daıarlyǵy jaqsy. Qazaqstannyń tanymal gımnasshylary arasynan Sabına Baqatova ǵana jaraqatyna baılanysty dúbirli dodadan shet qalyp otyr.