Júrekke ájim túspeıdi

Tarazdyq kardıohırýrgter eýropalyq áriptesterimen birge júrek soǵysynyń jıiligin qalpyna keltirýge baǵyttalǵan ota jasady

Taraz qalasyndaǵy «Júrek» kardıohırýrgııalyq klınıkasynda Avstrııa, Vengrııa dáriger-professorlarynyń qatysýymen júrek jumysyn elektrofızıologııalyq zertteý jáne radıotolqyndy ablıasııa (hırýrgııalyq jolmen aǵzanyń bir bóligin alyp tastaý) jasaýǵa arnalǵan tuńǵysh sheberlik synyby ótkizildi. Kardıohırýrgııalyq je­tistiktiń bul túrimen ota jasatý úshin naýqastar buryn arnaıy kvotamen Astana, Almaty qalalaryndaǵy ulttyq ǵylymı ortalyqtarǵa qaralatyn. En­di mundaı táýekelder «Jú­rek» kardıohırýrgııalyq klı­­nı­ka­synda medısınalyq kepildendirilgen kómek negizinde tegin jasalatyn boldy. Bul emniń ereksheligi – naýqasqa arıtmııadan tolyq emdelýge jáne dári-dármekterge táýel­dilikten birjola qutylýǵa múm­kindik beredi. Júrek soǵysynyń jıiligin qalpyna keltirýge baǵyttalǵan bul ádis Eýropa elderinde 20 jyldan beri qoldanylyp keledi. Sondyqtan, mamandardyń tili­men aıtqanda, «radıojıilik ablıasııasy» dep atalatyn ota­ny álemdik medısına úshin jańalyq deýge bolmaıdy. Degenmen, oń­tústik óńirde al­ǵash ret jasalyp otyrǵan em túrin qoldaný úshin klınıka qyzmetkerleri biliktilikterin shyńdap, birqatar tájirıbelik synaqtardan ótti. Shetelderde tájirıbesin shyń­­dap, biliktilik kýrstarynan ótken kardıohırýrg Tımýr Ashırov: «Negizi, bizdiń maqsat – kardıologııalyq aýrýlardan bolatyn ólim-jitimdi azaıtý. Ol úshin jambyldyqtardy Almaty men Astanaǵa sabyltpaı, bar­lyq kardıologııalyq jáne kar­dıohırýrgııalyq kómekti dúnıejúzilik standartqa saı deńgeıde ózimizde kórsetýimiz kerek. Sondyqtan, bizdiń basty mindet júrekterge jańa ómir syılaý, – deıdi. Búginde 90 adamǵa arnalǵan klınıka kardıohırýrgııa salasynda medısınalyq kómek kórsetýde. Osy aýrýhana ashyl­ǵan ótken jyldan beri 12 aorto­koronarlyq shýnttaý, 43 koronografııa, 17 stentteý otalary jasaldy. Emdelýshilerdiń bar­lyǵynyń da densaýlyqtary jaqsy. Kósemáli SÁTTIBAIULY, «Egemen Qazaqstan». Jambyl oblysy. ––––––––––––– Sýretterde: júrekke kar­dıo­hı­­rýrgııalyq ota jasaý sáti.