Memleket basshysy Nursultan Nazarbaev «Bombarder» kompanııasynyń prezıdenti Per Bodýendi qabyldady, dep habarlady Prezıdenttiń baspasóz qyzmeti.
Kezdesý barysynda kompanııanyń Qazaqstandaǵy qyzmetiniń perspektıvalary, atap aıtqanda, eldegi kólik qyzmetiniń aıasyn keńeıtý jaıy talqylandy.
Memleket basshysy Davostaǵy Dúnıejúzilik ekonomıkalyq forým aıasyndaǵy sońǵy kezdesýden keıin kólik salasynda tyǵyz yntymaqtastyq ornatý jóninde qazirdiń ózinde naqty jumys júrgizilgenin atap ótti.
– Biz «Bombarder» tárizdi belgili kompanııanyń Qazaqstan naryǵyna kelýine múddelimiz. Osyǵan baılanysty taǵy bir otandyq «Eır Qazaqstan» áýe joly kompanııasyn qurýdy josparlap otyrmyz, ol bastapqy kezeńde ishki reısterdi atqaratyn bolady. О́zderińiz biletindeı, biz sondaı-aq BAE Systems kompanııasymen birlesip, «Eır Astana» áýe joly kompanııasyn qurdyq. Basqarýdyń osy tájirıbesin jańa kompanııa qurý kezinde de paıdalanýǵa bolady. Avıasııa salasyndaǵy yntymaqtastyqpen qatar, biz úshin kólik salasynyń ózge sektorlaryndaǵy jobalar da qyzyqty. Budan bólek otandyq ushqyshtar jáne elimizdegi tehnıkalyq qyzmet kórsetý ortalyqtaryna mamandar daıarlaý salasyndaǵy yntymaqtastyq asa mańyzdy, – dedi Nursultan Nazarbaev.
Qazaqstan Prezıdenti meılinshe tyǵyz yntymaqtastyq úshin respýblıkamyzda kompanııa ókildigin ashý jáne birlesken qyzmetti óńirlik deńgeıge kóshirý qajettigine toqtaldy.
«Bombarder» kompanııasynyń basshysy bul kezdesýdiń kólik salasyndaǵy túrli baǵyttardaǵy yntymaqtastyqty odan ári damytý úshin mańyzdy ekenin aıtty.
– Biz kólik qyzmetiniń sapasyn arttyrý jáne jalpy Qazaqstannyń kólik salasyn damytý úshin birlese jumys isteýge daıynbyz. Avıasııalyq tehnıkany jetkizý – birlesken qyzmetimizdiń shaǵyn ǵana bóligi ekenine sendirgim keledi. Biz óz tehnologııalarymyzdy engizýdi ári mol tájirıbemizdi qoldanýdy da josparlap otyrmyz. Buǵan qosa, Qazaqstannyń ushqyshtaryn oqytyp, ushaqtarǵa qyzmet kórsetetin servıstik ortalyqtar quryp, osy arqyly Qazaqstanmen uzaq merzimdi perspektıvada jumys júrgizetin bolamyz, – dedi P.Bodýen.