Keshe Premer-Mınıstr Serik Ahmetovtiń qatysýymen «Samuryq-Qazyna» AQ kompanııalar tobynyń keńeıtilgen alqa májilisi ótti. Onda qordyń 2013 jylǵy qyzmeti qorytyndylanyp, osy jylǵy basym mindetter anyqtaldy.
«Samuryq-Qazyna» ulttyq ál-aýqat qory» aksıonerlik qoǵamy basqarmasynyń tóraǵasy О́mirzaq Shókeev: «Bıylǵy jyly biz «Qazaqstan joly – 2050: bir maqsat, bir múdde, bir bolashaq» atty Prezıdent Joldaýyndaǵy tapsyrmalardy is júzine asyryp, holdıngtiń aldyna qoıylǵan maqsattardy tolyqtaı oryndaýdy mindetimizge alamyz», dep bastady sózin. Sóıtip, Memleket basshysynyń jekeshelendirýdiń keshendi josparyn daıyndaý týraly tapsyrmasyn oryndaý maqsatynda, Qor 2014 jyldyń I toqsanynda jeke sektorǵa shyǵarylatyn kompanııalar tizimin Úkimetke usynatynyn aıtty. Qazirgi ýaqyttyń ózinde Qor atalǵan tizimge 80-nen astam kompanııany engizip úlgeripti.
Qor enshiles, baǵynyshty kompanııalardaǵy aksııalardy shyǵarý barysynda strategııalyq jáne portfeldik ınvestorlardy tartyp, olardy qarjy naryǵyna shyǵarýdy kózdep otyr. Bul «Halyqtyq IPO» baǵdarlamasyna da qatysty. Qor Úkimetpen birlese otyryp, bir aıdyń ishinde «Halyqtyq IPO» baǵdarlamasyn odan ári júzege asyrý boıynsha naqty usynystar engizetin bolady. Sondaı-aq, Qor tobynyń quzyrynan beıindi emes aktıvter men nysandardy shyǵarýdy aıaqtaımyz.
«2014-2015 jyldary 75 aktıv pen nysandy shyǵarý josparlanyp otyr. Jalpy alǵanda, beıindi emes aktıv pen nysandardy shyǵarý 5,7 mlrd. teńge kólemindegi shyǵynnan arylýǵa múmkindik beredi. Sonymen qosa, kompanııalardaǵy taǵy 156 beıindi emes aktıvterdi saqtaý jóni qaıta qaralatyn bolady, dedi О́.Shókeev.
Bul kúnde Qorda birtalaı jaqsy ózgerister bar kórinedi. Máselen, buryn Qor memleketten berilgen aktıvterge tek ákimshi bolyp kelse, endi belsendi ınvestorǵa aınalýy tıis eken. «Halyqaralyq tájirıbe kórsetkendeı, Khazanah, Temasek, Mubadala tárizdi jetekshi ulttyq ál-aýqat qorlary evolıýsııalyq damý kezeńinen keıin óziniń aksıoner retindegi qundylyǵyn arttyrý úshin belsendi ınvestorlarǵa aınalady. Qor qyzmeti eki baǵyt boıynsha shoǵyrlanady, birinshisi, barlyq deńgeıde bıznes-úderisterdiń operasııalyq tıimdiligin arttyrý arqyly turaqtanǵan kompanııalardyń tabysyn arttyrsa, ekinshisi, «startaptar» men jańa baǵyttardy damytý arqyly túsken tabysty portfeldi ulǵaıtýǵa jumsaıdy», dedi Qor basshysy.
«Samuryq-Qazyna» AQ ınvestısııalyq qyzmetinde de aýqymdy ózgerister jasap, jobalardy qarjylandyrý barysynda qaryzdyq kapıtal úlesin 54-ten 70 paıyzǵa deıin ulǵaıtýdy kózdep otyr. Jalpy alǵanda, Qor 2014 jyly quny 3,3 mlrd. AQSh dollary bolatyn 18 ınvestısııalyq jobany, sonyń ishinde ÚIID memlekettik baǵdarlamasy boıynsha 6 jobany aıaqtaýdy josparlap qoıypty.
Májilisti qorytqan Premer-Mınıstr Qorda atqarylyp jatqan jumystarǵa qanaǵattanatynyn aıta kelip, áli de qurylymnyń alǵa qoıǵan mindetteri kóp ekenine nazar aýdardy. «Memleket basshysy bıylǵy Joldaýynda Úkimetke, onyń ishinde «Samuryq-Qazynaǵa» aıryqsha tapsyrmalar júktedi. Olardyń qatarynda birinshi kezekte elimizdiń áleýmettik-ekonomıkalyq jaǵdaıyn kótere otyryp, basty mindetterdiń biri retinde shaǵyn jáne orta bıznesti damytý kerektigin mindettedi. Sondaı-aq, bıyl jeke menshik sektorǵa beriletin kompanııalardy anyqtap, olardyń naqtylanǵan tizimin jasaýdy tapsyrdy. Joǵaryda aıtylǵan ekonomıka men shaǵyn jáne orta bıznesti damytý osy sharaǵa baılanysty ekeni málim», dedi S.Ahmetov.
Úkimet basshysy bul jıynda da eldegi túrli salalarǵa ınvestorlardy tartý máselesine arnaıy toqtaldy. «Búgingi kúnde, otandyq jáne sheteldik ınvestorlarǵa degen kózqaras, bizdiń elde birdeı derlik. Kelgen ınvestorlarǵa barlyq jaǵdaıdy jasap, olardyń erkin jumys isteýine barlyq qolaılylyqtar qarastyrylyp otyr. Olar tek jaǵymdy áriptestik qatynas ornata bilse boldy», dep tolyqtyrdy sózin Premer-Mınıstr. Elbasynyń ózge de kún tártibinde turǵan tapsyrmalaryna toqtalyp ótken S.Ahmetov aýyl sharýashylyǵynan bastap, EKSPO-ǵa daıyndyq sharasyna deıin saralap shyqty. Munaı-gaz ben kólik salasynda júzege asyrylyp jatqan jobalar týraly áńgimeledi. Sóıtip, «Prezıdent Balqash JES qurylysyna kirisý jóninde birneshe ret tapsyrma bergen bolatyn. Bul sheshim negizsiz sozylyp ketti. Eger barlyǵymyz jumyla iske kirisip ketkende, ótken jyldyń kúzinde jobanyń qurylysyn bastap keter edik. Dúısenbige deıin sońǵy merzim berilip otyr. Biz kelisip sheshýimiz qajet. Osy kóktemde biz belsendi túrde qurylysty bastaýymyz qajet. Árıne, barlyǵy toqtap qaldy degim kelip otyrǵan joq. Jobanyń ınfraqurylymy salynyp jatyr», dedi Úkimet basshysy sóziniń sońynda.
Nurbaı ELMURATOV,
«Egemen Qazaqstan».