Bıylǵy Joldaýda múmkindigi shekteýli azamattar úshin Qazaqstan kedergisiz aımaqqa aınalý tıistiligi atap kórsetilgeni belgili. Osy sanattaǵy jandardy belsendi ómirge tartý, olardyń ózderin qoǵamnyń paıdaly múshesi retinde seziný kózqarasyn qalyptastyrý jónindegi Elbasynyń tapsyrmalary «Nur Otan» partııasy oblystyq fılıalynda ótken jıynnyń basty arqaýyna aınaldy.
Aımaq basshysy, fılıal tóraǵasy Samat Eskendirov kirispe sózinde «Kedergisiz bolashaq» jobasy tórt baǵyt boıynsha júzege asyrylatynyn atap kórsetip, qoǵam aldyndaǵy paryzdy belsendilikpen óteýge shaqyrdy. Jumyspen qamtýdy úılestirý jáne áleýmettik baǵdarlamalar basqarmasynyń basshysy Asqar Saqypkereev taǵdyrdyń tálkegine ushyraǵan jandardy turaqty jumysqa ornalastyrý sharalary jóninde baıandady. Búginde oblysta tirkeýge alynǵan múgedekterdiń sany 29 myńǵa jýyq bolsa, 5 myńnan astamy jumysqa jaramdy. Bulardyń 40 paıyzdaıy jumysqa tartylǵan. Byltyr olardy ońaltý maqsattaryna 243 mıllıon teńge jumsalypty. Bıyl 69 jarymjan adam eńbekke aralasý múmkindigine ıe bolǵan. «Áleýmettik taksı» qyzmeti úlken suranysqa ıe. Bilim basqarmasynyń jetekshisi Sholpan Karınova mektep jasyndaǵy múgedek balalar jaıyn áńgimeledi. Olardyń sany – 2053. 7 ońaltý mektep-ınternatynda 59 logoped jumys isteıdi.
Samat Saparbekuly tıisti oryndarǵa bul baǵyttaǵy jumystardy kúsheıtýdi, nuroatandyqtar tarapynan turaqty jumyspen qamtamasyz etý jaıyna erekshe nazar aýdarýdy tapsyrdy. Biryńǵaı qabyldaý kúni engizilgeli 107 múgedek jannyń ótinish-tilekteri qaralyp, 48 adam jumysqa ornalastyrylǵan. Alaıda, júrgizilgen tekserister qorytyndysy problemalardyń kóptigin ańǵartady. Máselen, 2,5 myń nysannyń úshten biri múgedekter úshin qoljetimsiz ekeni, jekemenshik ıeleri pandýs ornatýǵa qulyq tanytpaıtyny anyqtalǵan.
Basqosýda bul baǵyttaǵy jergilikti memlekettik organdardyń jumysyn ózara úılestirýdiń, onyń ishinde bıznes pen qoǵamnyń jaýapkershiligin arttyrýdyń mańyzy atap kórsetildi.
О́mir ESQALI,
«Egemen Qazaqstan».
Soltústik Qazaqstan oblysy.