Keshe oblys ákimi Qyrymbek Kósherbaev Jańaqorǵan aýdanyna baryp, sý tasqyny qaýpi týyndaǵan aýyl turǵyndarymen kezdesti. Tıisti organ basshylarymen selektorlyq baılanys arqyly kóshpeli májilis ótkizip, olardyń baıandamalaryn tyńdady jáne Jańaqorǵan men Aral aýdandary aralyǵyndaǵy jaǵdaıdy únemi baqylaýda ustaýdy tapsyrdy. Bıyl jaýyn-shashyn mol, Shardara sý qoımasy toldy, al Kóksaraı 1,5 apta ishinde tolyp qalady, sondyqtan eshbir jaýapty tulǵa qazir demalysqa shyqpaıdy, dedi oblys basshysy. Qarajat jaǵy tolyq sheshildi.
Sondaı-aq, osy jıynda oblys basshysy aýdan ákiminiń orynbasary Qarjybek Búrkitbaevqa qatań eskertý jasady. Esterińizde bolsa, birneshe kún buryn Jańaqorǵan aýdanyndaǵy úılerdiń aýlalaryn sý alǵan kezde turǵyndar abdyrap qalǵan-dy. Der kezinde arnaıy tehnıkalary bar mamandar kelip kómek kórsetti. Degenmen, zalaldy joıý barysynda jaǵymsyz oqıǵa oryn aldy. Jergilikti turǵyn kóshedegi sýdyń saldarynan kólikpen júrý múmkin emes ekendigin aıtyp, shaǵymdanǵan. Oǵan Q.Búrkitbaev: «Ol bizdiń sharýamyz emes, sen ony óziń jónde», dep dóreki jaýap qaıtarǵan.
Osy oqıǵa boıynsha Q.Kósherbaev Jańaqorǵan aýdanynyń ákimi Sultanbek Táýipbaevqa orynbasaryna qatań eskertý jasaýdy tapsyrdy. «Aýdan ákiminiń orynbasary Q.Búrkitbaevqa qatań eskertý jasalsyn. Qansha kúrdeli másele bolsa da memlekettik qyzmettiń etıkasyn saqtaý – bizdiń paryzymyz», delingen nusqamada.
Erjan BAITILES,
«Egemen Qazaqstan».
Qyzylorda oblysy.