EKSPO-2020: Qazaqstannyń ulttyq kúni atalyp ótti

Halyqaralyq kórmede eli­miz­diń ulttyq kúni Qazaqstan Res­pýb­lıkasynyń Týyn kóterý rásimimen bastaldy. EKSPO-nyń Al Wasl Plaza ortalyq alańynda ótken saltanatty is-sharaǵa Premer-Mınıstr Asqar Mamın men BAÁ Toleranttyq jáne qatar ómir súrý máseleleri jónindegi mınıstri, EKSPO 2020 Dubai kórmesiniń bas komıssary sheıh Nahaıan bın Mýbarak ál Nahaıan qatysty.

Úkimet basshysy sondaı-aq qa­zaq­standyq saýda-ınvestısııalyq forýmǵa qatysty. Onda Qazaqstan men BAÁ-niń memlekettik organ­darynyń, iskerlik ortalarynyń, ult­tyq holdıngteri men damý ıns­tı­týttarynyń 100-ge jýyq ókili bas qosty.

– Búgingi tańda Qazaqstan men Birikken Arab Ámirlikteri ara­syn­daǵy qarym-qatynas sapaly jańa deńgeıge kóterildi. 1991 jyldan bastap BAÁ Qazaqstan ekonomıkasyna 4 mlrd dollardan astam ınvestısııa saldy. Qazaqstanda BAÁ kapıtaly bar 250-den astam kompanııa jumys isteıdi. Jahandyq ekonomıkada saqtalyp otyrǵan syn-tegeýrinderge qaramastan, elderimizdiń yntymaqtastyǵy nyǵaıa túsýde, – dedi A.Mamın forýmnyń plenarlyq sessııasynda sóılegen sózin- de.

Úkimet basshysy ekijaqty qa­rym-qatynas úshin mańyzdy oqı­ǵa­lardyń biri – bıylǵy qazan aıyn­da ekonomıkanyń basym sala­larynda jobalardy damytý bo­ıynsha uzaqmerzimdi strategııalyq seriktestik ornatý tý­raly úki­met­aralyq kelisimge qol qoıý bolǵanyn atap ótti. Qujat Qa­zaqstan ulttyq ekonomıka­synyń energetıkalyq, agroóner­ká­siptik, kólik-logıs­tıkalyq, farma­sev­tıkalyq jáne qar­jy sektor­laryndaǵy jobalar­dy iske asyrýǵa baǵyttalǵan, ınves­tısııalardyń jalpy kólemi 6 mlrd dollardan asady.

Forýmnyń plenarlyq sessııasynda Energetıka mınıstri Maǵzum Myr­zaǵalıev, «Samuryq-Qazyna» AQ Bas­qarma tóraǵasy Almasadam Sátqalıev, BAÁ Energetıka jáne ınfraqurylym mı­nıstri Sýheıl ál-Mazrýı, BAÁ Mem­le­kettik mınıstri Ahmed Alı ál-Saıeh jáne ózge de tulǵalar sóz sóıledi.

Birikken Arab Ámirlikteri Energetıka jáne ınfraqurylym mınıstri Sýheıl ál-Mazrýı eki el arasyndaǵy ekonomıkalyq qarym-qatynasty joǵary baǵalady. Ol jańa ınvestısııalar energetıkalyq jáne ınfraqurylymdyq sek­tor­larǵa baǵyttalǵanyn jáne eki el arasyndaǵy birlesken jumystyń jańa kezeńiniń bastalǵanyn atap ótti. Mınıstr sondaı-aq BAÁ-niń álemniń 30-ǵa jýyq elinde júrgizgen jobalarynyń nátıjesinde jańar­tylatyn energııa sektorynda úlken tájirıbesi baryn basa aıtty. BAÁ men Qazaqstan arasyndaǵy munaıdan bólek saýdanyń jalpy kólemi 2016 jyldan 2020 jylǵa deıin 246 mln dollardan 470 mln dollarǵa ulǵaıǵanyn aıtqan Sýheıl ál-Mazrýı bul eki el arasyndaǵy áriptestik pen dostyqtyń ósip kele jatqanyn kórsetedi dedi.

Qazaqstannyń Energetıka mınıstri Maǵzum Myrzaǵalıev BAÁ-men ener­getıkalyq sektordaǵy jańa kelisimder Qazaqstanda tutynylatyn energııanyń jalpy kólemindegi jańartylatyn energııa kózderiniń úlesin 2030 jylǵa qaraı 3%-dan 15%-ǵa deıin arttyrý men Qazaqstannyń kómirge táýeldiligin 70%-dan 40%-ǵa deıin tómendetý boıynsha alǵa qoıylǵan maqsattarǵa qol jetkizýge yqpal etetinin málimdedi.

Al BAÁ-niń memlekettik mı­nıs­tri Ahmed Alı ál-Saıeh sońǵy onjyl­dyqta elder arasyndaǵy eki­jaqty qarym-qatynasta oń ózge­rister bolǵanyn aıtyp, kelesi ke­zeńde ekonomıkalyq jáne ınvestı­sııalyq yntymaqtastyqty odan ári keńeıtýdiń múmkindikteri bar ekenin atap ótti.

Forým qorytyndysy boıynsha «Samuryq-Qazyna» AQ men Abu Dhabi Developmental Holding Company (ADQ) táýelsiz qory arasynda strategııalyq yntymaqtastyq týraly kelisimge, sondaı-aq Qazaq­standa jalpy qýattylyǵy 4 GVt bolatyn kún jáne jel elektr stansalaryn salý boıynsha ınvestısııalyq qujattarǵa qol qoıyldy.

Qazirgi ýaqytta ámirlikter kompanııa­lary Qazaqstanda jalpy quny 3,5 mlrd dollardan asatyn 11 iri ınvestısııalyq jobany iske asyrýǵa qatysyp jatyr. Premer-Mınıstr A.Mamın Dýbaı qalasyna sapary aıasynda «QazTrade saýda saıasatyn damytý ortalyǵy» AQ sıfrly kórmesimen tanysyp, EKSPO 2020 Dubai kórmesiniń taqyryptyq pavılondaryn aralady, sondaı-aq ol BAÁ jetekshi kompanııalarynyń basshylyǵymen kelissózder júrgizdi.

Qazaqstannyń ulttyq kúni EKSPO aýmaǵynda dúnıejúzilik kórme qonaq­taryna arnalǵan merekelik konsertpen aıaqtaldy. N.Tilen­dıev atyndaǵy «Otyrar sazy» aka­de­mııalyq folklorlyq-etno­gra­fııalyq orkestri, opera ánshisi Marııa Mýdrıak, «Astana balet» ujymy men Qazaqstannyń basqa da ártisteri kórer­menge qazaq dalasynyń sazdy áýenin, mádenıetin, ulttyq mýzykasyn tanys­tyrdy.

Dýbaı,

Birikken Arab Ámirlikterinen