Almatylyq mektep oqýshysy Málıke Bekturova Fransııa astanasyndaǵy skrıpkashylar saıysynda talǵampaz qaýymdy tańǵaldyrdy
Skrıpkashylardyń Aleksandr Glazýnov atyndaǵy segizinshi halyqaralyq konkýrsyna Anglııa, Belgııa, Grýzııa, Qazaqstan, Qytaı, Latvııa, О́zbekstan, Fransııa jáne Ońtústik Koreıa sııaqty elderden elýge jýyq talapker kelip, Parıj konservatorııasynyń úlken konserttik zalyn kúı-dýmanǵa bóledi. Qazaqstandyq skrıpka óneriniń ókilderi osynaý kirpııaz baıqaýǵa alǵash qatysyp tursa da, olardyń sıqyrly aspaptaǵy quıqyljyǵan oıyny eýropalyq klassıkalyq mýzyka bilgirlerin birden baýrap aldy.
Bedeldi jıýrı birinshi oryndy Kúlásh Baıseıitova atyndaǵy respýblıkalyq mamandandyrylǵan mýzyka mektebiniń 6-synyp oqýshysy Málıke Bekturovaǵa berýdi biraýyzdan uıǵardy. Osy mekteptiń 10-synyp oqýshysy Nargız Mamedova júldeli úshinshi orynnyń dıplomymen marapattaldy.
Aıta ketsek, Málıke Bekturova budan buryn da Astana men Almatyda ótken birqatar halyqaralyq konkýrstardyń laýreaty atanǵan edi. Balǵyn jas skrıpkashy úlken sahnaǵa alǵash ret 7 jasynda shyǵyp, sol kezdiń ózinde kúrdeli birneshe kompozısııalardy minsiz oryndap, óz sheberligimen otandyq metrlerdi ǵana emes, sonymen birge, P.I.Chaıkovskıı atyndaǵy Máskeý konservatorııasynyń professory Vladıslav Igolınskııdi de súısindirgen bolatyn. Skrıpka boıynsha ustaz Quralaı Ahmetovanyń aıtýynsha, osy joly fransýzdyq maestrolar – Parıjdiń joǵary mýzyka mektebi oqytýshylarynyń tańdanýyna týra kelgen. Málıkeniń pesalardan, etıýdter men konserttik sololardan turatyn úlken baǵdarlamany tamasha oryndaǵany sonshalyq, zal oǵan: «Bravo!» dep qolpash bildirip, oryndarynan tik turyp qurmet kórsetken. Jas qyzdyń shetelge shyqqan betinde-aq munshalyq mártebeli mýzykalyq konkýrsta Qazaqstannyń namysyn qoldan bermeı, laıyqty qorǵaǵany qýantady. Sondaı-aq, sheteldik sarapshylar bizdiń jas talaptardyń kásibı deńgeıi Eýropadaǵy tanymal skrıpka mektebiniń óresinen bir de kem emestigin atap kórsetti.
Skrıpka oınaýdaǵy joǵary sheberlik mashyǵyna alǵys-marapat retinde konkýrsty uıymdastyrýshylar Málıkeni Monblandaǵy jazǵy halyqaralyq semınarǵa shaqyrdy. Onda skrıpka óneriniń professorlary, álemdik tulǵalar sheberlik synyptaryn ótkizedi. Sabaqtardan bólek, jas talanttardyń konsertteri men jeke óner keshteri josparlanǵan. Qazaqtyń daryndy skrıpkashy qyzy úshin bul da óz ónerin shyńdaýdyń tamasha múmkindigi bolmaq.
Qorǵanbek AMANJOL,
«Egemen Qazaqstan».
ALMATY.
Sýrette: Parıjdi tańdandyrǵan Málıke Bekturova.