«Qazposhta» aýylǵa kóńil bóle bastady

Bizder buǵan deıingi maqa­lalarymyzda «Qazposhta»AQ-tyń jumysyna syn aıtyp júrdik. Bizdiń óńir ǵana emes ózge aımaqtardaǵy tilshilerimiz, jergilikti avtorlyq ornyqty da baısaldy syn aıtty. Ondaı synǵa aýyldardaǵy poshta baılanysy, gazet-jýrnaldardyń oqyrmanǵa ýaqtyly jetkizilmeýi sebep bolǵan-dy. Byltyr oblys­ta 52 aýyldyq poshta bólimshesi jabylyp qaldy. Aýdandyq posh­ta bólimderinde shalǵaıdaǵy aýyldarǵa poshta aparatyn birdi-ekili ǵana eski, ábden tozǵan kólikter bar. Janar-jaǵarmaıdy únemdeý maqsatynda aptasyna bir-eki ret qana jolǵa shyǵady. Poshtashylardyń eńbekaqylary az. Qysy-jazǵy arnaıy kıimder, qol sómkeler qajet-aq. Aýyldarǵa gazetter aptasyna 3 ret barady. Avtobýs júrgizýshilermen shartqa otyryp gazetter jiberiledi. Aýylǵa «Qaz- poshta» AQ-tyń kómegi aýadaı qajet dedik. Jýyrda ótken elimiz Par­lamenti Májilisiniń Darıǵa Nazarbaeva basqaratyn Áleý­mettik-mádenı damý komıtetiniń otyrysynda «Qazposhta» AQ-tyń jumysy syn tezine ilikken edi. Endi, mine, poshta jumysyna jan bitip, aýyldarǵa qaraı buryla bastady. Oblystaǵy «Qazposhta»AQ oblystyq fılıaly dırektorynyń orynbasary Nıkolaı Voronsovtyń aıtýynsha, endi, óńirdegi poshta baılanysynyń jumysyn jandandyrý maqsatynda aýyldarǵa baratyn jyljymaly kóshpeli poshta bólimsheleri qyzmet kórsetetin bolady. Iаǵnı, jańa zaman posh­ta kólikteri arnaıy baılanys quraldarymen, noýtbýktermen, elektr qýatymen jabdyqtalady. Kóshpeli poshta júıeleri ar­qyly merzimdi basylymdar, eńbekaqy, zeınetaqy, taǵy basqa da áleýmettik járdemaqylar, hat-habarlar shalǵaı aýyldarǵa ýaqtyly jetkiziledi. – Kólikter alyp qýanyp jatyrmyz. Endi shalǵaıdaǵy aýyldar osy jyljymaly kólikterdiń qyzmetin paıdalana alady, – deıdi Ertis jáne Baıanaýyl aýdandyq poshta bólimsheleriniń basshylary Tóleýǵazy Mýsın, Ahat Karıpolla. – Jańa kólik­ter turǵyndarǵa da, poshta qyz­metkerlerine de qolaıly. Posh­ta bólimsheleri jabylyp qalǵan aýyldardaǵy qarttarǵa zeınetaqylary, turǵyndardyń gazet-jýrnaldary ýaqtyly jet­kiziledi, – deıdi N.Voronsov. Sóıtip, endi, oblystaǵy 52 shal­ǵaı aýyl – «Qazposhta» AQ-tyń jańartý baǵdarlamasy arqasynda poshta qyzmetiniń jaqsylyǵyn kórmekshi. Sonymen qatar, ob­lystaǵy Ekibastuz qalasynyń aýyldaryna jetý úshin Aqtoǵaı, Baıanaýyl, Ertis, Sharbaqty, Maı, Ýspen aýdandaryndaǵy aýdandyq bólimshelerge jańa qyzmettik kólikterdiń kiltteri tabystaldy. Farıda BYQAI, «Egemen Qazaqstan. Pavlodar oblysy.