Endigi úmit úkimette

Jambyldaǵy keıbir eski mektepter men aýrýhanalar jańadan salýdy qajet etedi

Jaqynda Bilim jáne ǵylym mınıstrligi men oblys ákimdigi arasyndaǵy 2014-2016 jyldarǵa arnalǵan bilim berý jáne jas­tar saıasaty salalaryndaǵy ny­sa­­naly ındıkatorlar men kórset­kishterge qol jetkizý jónindegi memorandýmǵa qol qoıyldy. Budan keıin Premer-Mınıs­tr­diń orynbasary Gúlshara Ábdi­halyqova men Bilim jáne ǵylym mınıstri Aslan Sárinjipov oblys ákimi Kárim Kókirekbaevpen birge M.H.Dýlatı atyndaǵy Taraz mem­lekettik ýnıversıtetinde, Taraz qalasyndaǵy №45 mektep-gım­nazııasynda boldy. Taraz qala­syndaǵy  №45 mektepte 2013-2014 oqý jylynan bastap joba­laý-baǵdarlaý tehnologııasy negizinde oqytý tájirıbelik alańy men «E-Learning» elektrondyq oqytý júıesi engizilgen. Úkimet múshelerin memlekettik-jeke seriktestik aıasynda ashylǵan 280 oryndyq «Múbárak-Móldir» balabaqshasynyń jumysy da tánti etti. Balabaqshada fızıologııa men logoped bólimderi bar. Sondaı-aq, taekvando men horeogra­fııa úıirmeleri jumys isteıdi jáne qazaq, orys, aǵylshyn tilderi oqy­tylady. Eń bastysy, Úkimet músheleri «máselesi bastan asqan» nysandarda da boldy. Mysaly, «Qumshaǵal» aýmaǵyna ornalasqan №19 mektep 1977 jyly 240 oqýshyǵa arnalyp salynǵan bolsa, búginde ol jerde 645 oqýshy oqyp júr. Al Baızaq aýdanyndaǵy sonaý 1939 jyldan beri jumys istep kele jatqan mektep kezinde 780 oqýshyǵa arnalyp salynǵan bolsa, qazir munda 1360 oqýshy bilim alýda. Oblystyq on­ko­logııalyq dıspanserdiń ǵıma­raty da sonaý 1956 jyly 135 adam­ǵa arnalyp salynǵan. Elge unaǵany, Úkimet múshe­leri oblysqa kelip máseleni óz kóz­derimen kórip, ondaǵy jaǵdaıdy mamandardyń óz aýyzdarynan estip ketýi bolyp otyr. «Sondyqtan endigi úmit Úkimette» deıdi olar. Kósemáli SÁTTIBAIULY, «Egemen Qazaqstan». Jambyl oblysy.