Bul týraly Sıfrlyq damý, ınnovasııalar jáne aeroǵarysh ónerkásibi mınıstri málimdedi, dep habarlaıdy Egemen.kz.
«Sizdiń jyly jáne jaıly baspana týraly armanyńyzdy túrli kedergiler kúl-talqan etti me?! Rasymen, páterdegi bólmelerdi ózgertý nemese qosymsha qabyrǵa salý úshin biz úsh birdeı bıýrokratııalyq kedergige tap bolamyz (HQKO, TIB, ákimdik, sáýlet basqarmasy jáne t.b.). Osyǵan baılanysty áleýmettik jeliden deldaldyq qyzmetter týraly habarlandyrý tabýǵa bolatynyn bári biledi. Sebebi adamdar bıýrokratııadan qajyǵan. Nátıjesinde atalǵan úderis aınalasynda túrli korrýpsııalyq shemalar paıda boldy. Sıfrlyq transformasııa ortalyǵynda biz osy prosesti basynan aıaǵyna deıin taldap, normatıvti-quqyqtyq bazalardy zerttep, jan-jaqty qarastyrǵanda, myna jaǵdaıǵa kóz jetkizdik: eger qaıta qurý nátıjesinde úı qulaıtyn bolsa, qujattardy qabyldaıtyn HQKO qyzmetkeri de, ólshem jasaıtyn jumysshy da, sáýlet basqarmasy men ákimdik mamandary da jaýap bermeıdi! Iаǵnı bul kisiler - tehnıkalyq pasport berý prosesinde artyq adamdar. Sebebi barlyq jaýapkershilik tehjospardy jasaǵan lısenzııaly jobalaýshyǵa júktelgen. Bizdiń usynysymyz: bul prosesten memlekettik organdardyń qyzmetkerlerin alyp tastaý arqyly back-end bóligin memlekettik servısterge aýystyrý. Lısenzııaly jobalaýshyǵa (azamattyń kelisimimen) jyljymaıtyn múlikter bazasyna ózgeris engizip, tehjospar negizinde tehpasportty resimdeýge múmkindik berý», dep jazdy mınıstr áleýmettik jelidegi paraqshasyna. Baǵdat Mýsın kúni keshe ındýstrııa jáne ınfraqurylymdyq damý mınıstrimen jańa úderisti talqylaǵanyn aıtty. Onyń bul ıdeıasyn atalǵan mınıstrliktiń ókilderi de qoldaǵan. Endi shuǵyl túrde normatıvtik jáne tehnıkalyq máselelerdi sheshý ǵana qalǵanǵa uqsaıdy. «Eger memlekettik organdardyń qandaı bir úderisine reınjınırıng jasaý boıynsha usynystaryńyz ben qyzyqty ıdeıalaryńyz bolsa, dtc@mdai.gov.kz elektrondyq poshtasyna joldaı alasyzdar», dep túıindedi sózin jazba avtory.