Keshe elimizdiń Syrtqy ister mınıstri Erlan Ydyrysov Eýroparlament delegattarymen kezdesti.
Syrtqy saıasat vedomstvosynyń basshysy men EO parlamenttik delegasııasy arasynda ótken kezdesýden shyǵyp, jýrnalıstermen júzdesken depýtat Elızabet Ieggle Qazaqstan EO-nyń Ortalyq Azııadaǵy mańyzdy áriptesi sanalatynyn jetkizýmen qatar, Qazaqstan úshin EO-nyń da saýda jáne ınvestısııa jónindegi negizgi áriptes el ekenin alǵa tartty. Biz eki aradaǵy qarym-qatynastardyń tereńdeýin jáne nyǵaıa túsýin qalaımyz. Osy rette 2013 jyly Qazaqstan Prezıdenti Nursultan Nazarbaev pen Eýrokomıssııa Prezıdenti Joze Manýel Barrozý áriptestikti odan ári tereńdete túsý jaıynda kelissózder júrgizýge kelisken bolatyn. Ol 1999 jyly qol qoıylǵan Áriptestik pen yntymaqtastyq týraly kelisimdi almastyrýy tıis. Biz úshin áriptestik pen yntymaqtastyq jónindegi jańa kelisim boıynsha kelissózderdiń alǵa jyljýy elde ashyq demokratııalyq qoǵam ornatýdaǵy saıası reformalardyń júrgizilýine, oppozısııa men azamattyq qoǵamnyń ómir súrýine baılanysty, degen depýtat ári qaraıǵy oıyn bylaı dep jalǵady:
«Qazaqstannyń turaqtylyǵy men ári qaraıǵy damýy úshin myqty ınstıtýttardyń qurylýy, zań ústemdigi bılik júrgizip, azamattar quqyqtarynyń saqtalýy, myqty memlekettik basqarý júıesiniń halyqaralyq standarttarǵa saı ómir súrýi mańyzdy. Mine, osyndaı mańyzdy máseleler tóńireginde áńgime órbitý maqsatynda biz qazaqstandyq áriptesterimizben kezdestik». Osylaı degen Elızabet Ieggle sóziniń sońynda EO-nyń Qazaqstandaǵy azamattyq qoǵam damytýdaǵy jumystardyń júrgizilýin jáne bılik pen azamattyq qoǵam arasyndaǵy únqatysýdyń júzege asyrylýyn qoldaıtyndyqtaryn jetkizdi.
Anar TО́LEÝHANQYZY,
«Egemen Qazaqstan».