Osy jyldyń sáýirinde Qazaqstanda 29 jasqa deıingi kásipkerlerdiń sany 211,9 myńdy qurady. Olar – naqty jumys istep turǵan naryq oıynshylary. Kórsetkish bir jyl burynǵy deńgeıden 36,4 paıyzǵa joǵary. Demek el jastary bızneske qaraı oıysa bastady degen sóz.
Finprom.kz-tiń esebinshe, bir jyl ishinde jumys istep turǵan jeke kásipkerlik sýbektileri 8,3 paıyzǵa kóbeıip, 1,2 mln-ǵa jetti. Ondaǵy jas kásipkerlerdiń úlesi 14,5 paıyzdan 18,2 paıyzǵa artty.
Jeke kásipkerligi bar jastardyń 109,1 myńy – erler, 102,8 myńy – áıelder. Erlerdiń sany bir jyl ishinde 24,7 paıyzǵa ulǵaısa, áıelder sany birden bir jarym ese ósti. Osylaısha, jumys istep turǵan jas kásipkerlerdiń jalpy sanyndaǵy áıelderdiń úlesin 43,7 paıyzdan 48,5 paıyzǵa deıin arttyrdy.
Sonymen qatar aýyl men qala kásipkerleriniń arasynda da aıyrmashylyq kóp. Máselen, qalalyq jerde jumys istep turǵan jeke kásipkerlik sýbektileriniń sany 158,4 myńdy qurady. Kórsetkish ótken jylmen salystyrǵanda 38,3 paıyzǵa joǵary. Al aýyldyń úlesine sektordaǵy barlyq jeke kásipkerliktiń tórtten bir bóligi ǵana tıesili. Dese de, olardyń sany 30,9 paıyzǵa nemese 53,4 myńǵa deıin óskenin atap ótken durys.
Jas kásipkerler negizinen kóterme jáne bólshek saýdada, sondaı-aq avtojóndeý salasynda shoǵyrlanǵan. Atalǵan baǵyttarda 73,6 myń jeke kásipker jumys isteıdi. Ondaǵy áıelderdiń úlesi – 49,9 paıyz nemese 36,7 myń jeke kásipkerlik. Odan keıingi orynda aýyl, orman jáne balyq sharýashylyqtary tur. Munda 15,4 myń jeke kásipkerlik bar. Onyń úshten biri áıelderge tıesili. Jastar kóp shoǵyrlanǵan salalardyń úshtigin óńdeý ónerkásibi qurap otyr. Mundaǵy jas kásipkerlerdiń sany 12,4 myńǵa jýyqtaıdy. Onyń 61,7 paıyzy – áıelder.
Bıznesten baq izdegen qyz-jigitterdiń negizgi bóligi Almaty (33 myń) jáne Nur-Sultan (24,7 myń) qalalarynda shoǵyrlanǵan. Al jas kásipkerlerdiń úlesi az óńirlerdiń úshtigi kelesideı: Soltústik Qazaqstan (2,6 myń), Pavlodar (5 myń) jáne Aqmola (5,5 myń).
Eldegi 17 óńirdiń altaýyndaǵy jas kásipkerlerdiń basym bóligin áıelder qurap otyr. Aıtalyq, Mańǵystaý oblysyndaǵy jastar ashqan jeke kásipkerlik sýbektileriniń 63,2 paıyzy áıelderge tıesili. Bul kórsetkish Shyǵys Qazaqstan oblysynda 62,3 paıyzǵa teń. Qaraǵandynyń kórsetkishi – 51,9 paıyz. Kerisinshe, áıelderdiń úlesi tómen óńirlerdiń qatarynda Soltústik Qazaqstan (39,2 paıyz) men Túrkistan (40,5 paıyz) oblystary bar.