Búgin, ıaǵnı 8 maýsym kúni Memleket basshysy Qasym-Jomart Toqaevtyń «Qazaqstan Respýblıkasynyń ákimshilik-aýmaqtyq qurylysynyń keıbir máseleleri týraly» Jarlyǵy kúshine enedi.
Osy tarıhı oqıǵa qarsańynda ótken apparattyq keńeste Qaraǵandy oblysynyń ákimi Jeńis Qasymbek jańadan qurylǵan oblystyń biri – Ulytaý óńirine qyzmet etýge baratyn áriptesteri aldynda sóz sóılep, olarǵa birlesip atqarǵan jumystary úshin alǵys aıtty.
О́ńir basshysy Jezqazǵan, Sátbaev, Qarajal qalalary jáne Ulytaý, Jańaarqa aýdandaryn meken etken turǵyndar úshin ózekti máselelerdiń sheshimin tapqanyn birlese atqarǵan jumystyń naqty jemisi dep baǵalady. Sonymen qatar ol jańa oblystyń bolashaǵy zor ekenin jáne onyń óńirdiń damýyna ıgi yqpalyn tıgizetinine senim bildiretinin atap ótti.
– Sizder jańa ómirge qadam basqaly tursyzdar. Osynaý sheshýshi sátte sáttilik tileımin, – dedi Jeńis Qasymbek.
Sondaı-aq óńir basshysy ákimshilik-aýmaqtyq bólinistiń eki oblystyń ekonomıkasyna qandaı áserin tıgizetini jónindegi suraqqa da egjeı-tegjeıli jaýap berdi. Eń aldymen ol óńirlerdi bólgennen Qaraǵandy oblysy da, Ulytaý óńiri de esh utylmaıtynyn atap ótti.
– Bıýdjetke túsetin salyqtar men respýblıkalyq jarna proporsıonaldy túrde bólinedi. Qaraǵandy oblysyna joǵary turǵan bıýdjetten túsetin salyqtar men transfertter aýmaqtyq jaǵynan Ulytaý oblysy qurylǵan aımaqtarǵa túsedi. Qalǵanynyń bári oblystardyń ózderiniń kirisi, – dep túsindirdi J.Qasymbek.
Budan bólek, ol qazirgi ýaqytta «Qazaqmys» korporasııasy Jezqazǵan qalasyna kásiporyndaryn qaıta tirkeýden ótkizip jatqanyn aıta kelip, jańa oblys pen Jezqazǵan qalasynyń damýyna ıgi yqpalyn tıgizetin alǵysharttardyń jetkilikti ekenine nazar aýdardy. «Eki óńir de ekonomıka qurylymy men halqynyń sany jaǵynan uqsas bolady», dep oı tujyrdy oblys ákimi.
Búginde Memleket basshysynyń tapsyrmasy boıynsha, Jezqazǵan óńirinde úsh iri joba qolǵa alynǵan. Sonyń ishindegi eń mańyzdysy – uzyndyǵy 43 shaqyrymdy quraıtyn «Úıtas-Aıdos» sý qubyryn qaıta jańǵyrtý. Bul joba júzege asqanda, burynnan beri qala turǵyndaryn qınap kele jatqan sapaly aýyz sýmen qamtamasyz etý máselesi oń sheshimin tabady.
Odan keıingi Jezqazǵan-Ulytaý óńiriniń halqyn tolǵandyryp kele jatqan iri máseleniń biri – jol problemasy. Bul turǵyda oblys ákimi uzyndyǵy 208 shaqyrym bolatyn «Qyzylorda – Jezqazǵan» joly jáne «Jezqazǵan – Qaraǵandy» tas jolynyń 513 shaqyrymyn qaıta jańǵyrtý josparlanǵanyn jetkizdi. Qazirgi ýaqytta Qyzylorda – Jezqazǵan baǵytynda merdigerdi anyqtaý boıynsha konkýrstyq rásimder júrgizilip jatyr eken. Al Jezqazǵan – Qaraǵandy joly boıynsha jobalyq-smetalyq qujattar ázirlený ústinde.
Apparat jıynyn qorytqan oblys ákimi Jeńis Qasymbek jańa Ulytaý oblysynyń qurylýy bir úıdiń balasyndaı, bir qoldyń salasyndaı óńirlerdiń ekonomıkalyq-áleýmettik turǵyda damýyna tyń serpin beretinin senimdi túrde málimdedi.
Al munyń aldynda Qaraǵandy oblystyq máslıhaty óziniń kezekten tys XIV sessııasyn ótkizip, Ulytaý oblysynyń qurylýyna baılanysty máslıhatty qaıta uıymdastyrý týraly sheshimdi talqylaǵan bolatyn. Osy qujatqa sáıkes, quramynda 26 depýtat bar Qaraǵandy oblystyq máslıhatyna jáne 12 depýtattan turatyn Ulytaý oblystyq máslıhatyna bólý arqyly Qaraǵandy oblysynyń máslıhatyn qaıta uıymdastyrý usynylyp, ol biraýyzdan qabyldandy. Aıta ketetin bir jaıt, ákimshilik-aýmaqtyq bólinis kezinde máslıhat depýtattarynyń turǵylyqty jeri men resmı tirkelgen mekenjaıyna nazar aýdaryldy.
Qaraǵandy oblysy