Keshe Májilis Tóraǵasy Qabıbolla Jaqypovtyń tóraǵalyǵynda palata bıýrosy ótti. Onda palatanyń aldaǵy jalpy otyrysy kún tártibiniń jobasy naqtylandy, dep habarlady Májilistiń baspasóz qyzmeti.
Depýtattardyń talqylaýyna «Kásiptik odaqtar týraly» zań jobasy ilespe túzetýlerimen birinshi oqylymǵa shyǵarylatyn boldy. Kún tártibiniń jobasyna Ákimshilik quqyq buzýshylyq týraly kodeks jobasy ilespe túzetýlerimen ekinshi oqylymǵa qosylyp otyr. Salalyq komıtettiń baıandaýynsha, Kodeks jobasy ákimshilik zańnamany eleýli túrde reformalaýǵa, memlekettik organdardyń ákimshilik jazalardy qoldaný jónindegi ókilettikterin aıqyndaýǵa baǵyttalǵan.
Kodeks jobasyna sáıkes ákimshilik zańnama izgilendirý, sottarǵa túsetin júktemeni azaıtý jolymen reformalanady. Osyǵan baılanysty sottardyń jáne ákimshilik quqyq buzýshylyq týraly isterdi qaraýǵa ýákilettik berilgen organdardyń (laýazymdy adamdardyń) quzyreti qaıta qaraldy.
Osy kúni depýtattar ratıfıkasııalanatyn eki zań jobasyna qorytyndy ázirleý mezgilin naqtylaıtyn bolady. Olar: Esirtki, psıhotroptyq zattar men olardyń prekýrsorlaryn Keden odaǵynyń keden aýmaǵy arqyly ótkizý tártibi týraly kelisim jáne 2010 jylǵy 9 jeltoqsandaǵy Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly kelisimge ózgerister engizý týraly Hattama.