Qazaq halqy áý bastan «Kelini jaqsynyń keregesi altyn» dep bosaǵadan attaǵan jaýlyqty jannyń tárbıesi men kórgen-túıgenine mán bergen. Ǵasyrlardan kele jatqan osy úrdis búgin de óz mańyzdylyǵyn joıǵan joq. Oǵan Kóksý aýdanynyń Mámbet aýylynda ótken kelinder saıysy taǵy bir ret dálel boldy.
Saıysqa otbasynyń kórkin keltirip, jan-jaqtylyǵymen tanylyp júrgen kelinder qatysyp, baq synady. Is-shara barlyq sanıtarlyq talapty saqtaı otyryp ótkizildi.
Qazaqtyń ádet-ǵurpyn qurmettep, salt-dástúrin berik ustanatyn ınabatty qazaq kelinderin dáripteý maqsatynda uıymdastyrylǵan baıqaýda 25-35 jas aralyǵyndaǵy sheber de pysyq 10 kelin baq synady.
Qazaq kelini qaı kezden de otbasynyń berekesin keltirip, tatýlyǵyn bekemdeı bilgen. Ár úıdiń ónerli kelinderi ózderiniń shyqqan tegi men túsken shańyraǵynan maǵlumat berip tanystyrǵan bolsa, saıysta ózderiniń ónerlerin ortaǵa saldy. Qazaqy dastarqanyn jaınatyp, salt-dástúrge qatysty suraqtarǵa múdirmeı jaýap berdi.
«Otan otbasynan bastalady, otbasynda bala qandaı tárbıe alsa, óskende sondaı bolady, durys tárbıe alsa, durys tárbıeli, bilimdi, eline janashyr bolady, al burys tárbıe alsa, qandaı bolatyny aıtpasa da túsinikti. Osyndaı aýyz birlikte, uıymshyldyqta, berekede ómir súrip, elimiz ben jerimizdiń gúldenýine aıanbaı eńbek eteıik», dedi Kóksý aýdanynyń ákimi Marlen Kólbaev.
Jan-jaqty daıyndyǵymen kelgen kelinder ózderiniń erekshelikterimen tanylyp, kóptiń kóńilinen shyqty. Saıys qorytyndysy boıynsha bas júldeni Labasy aýylynyń kelini Ular Jylqybaeva, 1-oryndy Musabek aýylynyń kelini Álııa Arystan, 2-oryndy Qablısa aýylynyń kelini Shynar Jumaǵalı, 3-oryndy Jarlyózek aýylynyń kelini Janna Qalısaqarova jeńip aldy.
Saıys sońynda 9 bala tárbıelep otyrǵan Gúlzıra Bektemisovaǵa aýdannyń janashyr azamattary úıdiń kiltin syılady.
Jetisý oblysy