ASTANA. 27 mamyr. Eýrazııalyq ekonomıkalyq odaq aıasynda ortaq elektr energetıkasy naryǵyn qurý týraly halyqaralyq kelisimge 2019 jyldyń 1 shildesine deıin qol qoıylady. Bul týraly Bnews.kz tilshisine bergen suhbatynda Indýstrııa jáne jańa tehnologııalar vıse-mınıstri Baqytjan Jaqsalıev málimdedi.
«Qazirgi ýaqytta Keden odaǵy men BEK aıasynda yntymaqtastyqtyń barlyq baǵyttary boıynsha, onyń ishinde elektr energetıkasy salasynda da yqpaldasý úderisteri júrgizilip jatyr», - deıdi B.Jaqsalıev.
Mınıstrdiń orynbasarynyń aıtýynsha, úsh eldiń elektr energetıkasy salasy tarıhı turǵydan alǵanda yqpaldasqan. Degenmen, qazirgi ýaqytta ortaq elektr energetıkasy týraly sóz qozǵaý áli erteleý. Oǵan sebep – elektr energetıkasy naryqtary modelderiniń ár túrli bolýynda.
«Qazaqstanda yryqtandyrylǵan elektr naryǵy bolsa, Belarýste memlekettik satylas biriktirilgen kompanııa, al Reseıde elektr energııasy men qýattar naryǵy torapty baǵany belgileıdi. Jyl ishinde sarapshylar elektr energetıkasy salasyndaǵy máselelerdi qarastyrdy. Qatarlas jumys isteıtin elektr energetıkasy júıeleriniń negizinde odaqtyń ortaq elektr energetıkasy naryǵyn kezeń-kezeńmen qurý boıynsha qol jetkizilgen kelisimder, ustanymdardyń barlyǵy kelisildi», - dedi B.Jaqsalıev.
Onyń aıtýyna qaraǵanda, 2015 jylǵyń 1 shildege deıin ortaq elektr energetıkasy naryǵyn qurý tujyrymdamasy ázirlenedi. 2016 jyldyń 1 shildesine deıin ortaq naryqty qurý baǵdarlamasy jasalady.
«Baǵdarlama is-sharalaryn iske asyrýdy aıaqtaǵannan keıin odaqqa múshe memleketter 2019 jyldyń 1 shildesine deıin ortaq elektr energetıkasy naryǵyn qurý týraly halyqaralyq kelisimge qol qoıady. Onda jelilerdi qoldanýdyń biryńǵaı erejeleri de qarastyrylady», - dedi vıse-mınıstr.
Qazirgi tańda 2019 jylǵa deıin odaqqa múshe memleketterdiń ishki qajettilikterin qamtý úshin elektr energııasyn qoldaný sharttarynda tehnıkalyq múmkindikter aıasynda memleketaralyq almasýdy iske asyrý úshin jelilerge kedergisiz qoljetimdilikti qamtamasyz etý týraly sheshim qabyldanǵan.
Murat Aıtqoja.
Derekkóz: Bnews.kz.
Foto: 168.am.