Mańyzdy máseleler únemi Úkimet nazarynda

Keshe Ortalyq kommýnıkasııalar qyzmetinde Úkimet otyrysynda qaralǵan máselelerge oraı qorytyndy baspasóz máslıhaty ótti. Oǵan Premer-Mınıstrdiń orynbasary – Indýstrııa jáne jańa tehnologııalar mınıstri Áset Isekeshev, Munaı jáne gaz mınıstri Uzaqbaı Qarabalın, Ekonomıka jáne bıýdjettik josparlaý vıse-mınıstri Marat Qusaıynov, Aýyl sharýashylyǵy mınıstri Asyljan Mamytbekov, Bilim jáne ǵylym mınıstri Aslan Sárinjipov, Indýstrııa jáne jańa tehnologııalar mınıstrliginiń Tehnıkalyq retteý komıteti tóraǵasy Birjan Qaneshev qatysty. Baspasóz máslıhaty barysynda Úkimet otyrysynda talqylanǵan máselelerge oraı ár mınıstr ózine qatysty taqyrypta baıandama jasady. Máselen, jylý-energetıka keshenin damytý, ınvestısııa tartý máseleleri, kóktemgi dala jumystarynyń barysy, tehnıkalyq retteýdi damytý jospary, sondaı-aq, Ulttyq biryńǵaı testileýge daıyndyq jumystary týraly aıtyldy. О́z kezeginde Á.Isekeshev Úki­met­tiń keshegi otyrysynda 2030 jylǵa deıingi janarmaı-energe­tı­kalyq keshenin damytý tu­jy­rym­damasy qarastyrylǵanyn atap ótti. Qujatty Memleket bas­shysynyń tapsyrmasyna sáıkes Indýstrııa jáne jańa tehnolo­gııalar mınıstrligi múddeli mem­le­kettik organdarmen birlesip ázir­legen. Sondaı-aq, ol búgingi tańda jahandyq syn-qaterlerge baı­lanysty energetıkadaǵy ınves­torlardyń oıyn erejelerin ózgertý qajettigi týyndap otyr­ǵanyna toqtaldy. «Qazirgi ýaqytta elektr energetıkasy salasynda jekeshelendirý júrip jatyr. Son­dyqtan salanyń damýyna qajetti qurylymdyq ózgertýler atalmysh tujyrymdamada kórsetilgen. Onda birneshe bloktar bar, máselen, elektr energetıkasy, ýran óndirisi, kómir ónerkásibi munaı-gaz sektory, dedi Á.Isekeshev. Munymen qosa, tujyrymdamada elektr energetıkasynyń nysandaryna ınves­torlar tartý qarastyrylǵan. Osy oraıda bul salany tartymdy etýdiń keshendi sharalary jasalǵan. Jylý-energetıka keshenin damytý sharalaryna oraı Munaı jáne gaz mınıstri de qosymsha baıandama jasap, óz salasynda qandaı jumystar atqarylyp jatqanyn jetkizdi. Bul ­rette mınıstr Qazaqstanda 2030 jyl­ǵa qaraı gaz óndirýdi 60 mlrd. tekshe ­metr­ge jetkizý josparlanyp otyrǵanyn atap ótti. Qazirgi maýsymda mańyzy artyp, qyzý jumys júrip jatqan salanyń biri – kóktemgi egis jaıy. Úkimet otyrysynda bul másele de keńinen talqylanyp, tyndyrylǵan jumystar jaıy pysyqtalǵan. Bul jóninde Aýyl sharýashylyǵy mınıstri A.Mamytbekov atap ótti. Mı­nıstr­diń málimetinshe, bıyl aýylsharýashylyq daqyldary 21,8 mln. gektarǵa egiledi dep josparlanýda. Búgingi jaǵdaı boıynsha, jazdyq dándi-da­qyldardy egý 9244,9 ga alqap­ta júrgizilgen. Sondaı-aq, ońtústik aımaqtarda júgeri men kúrishten basqa jazǵy dándi daqyldardy sebý aıaqtalǵan, batys pen shy­ǵys óńirlerdegi oblystarda jos­parlanǵannyń 79 paıyzy shamasynda júrgizildi. Al qazirgi naýqannyń biri – UBT tóńiregindegi qarbalas. Bul másele jaıynda Bilim jáne ǵylym mınıstri A.Sárinjipov baıandady. Mınıstrdiń aıtýynsha, UBT-ǵa ústimizdegi jyly 133 226 túlektiń 92 077-si qatysady. Synaqty 63 603 túlek qazaq tilinde, 28 447 túlek orys tilinde tapsyrady. Sondaı-aq, UBT formaty ózgermeıdi. Sonymen qatar, qaýipsizdik sharalaryn saqtaý, UBT-ny shynaıy jáne ashyq ótkizý úshin dástúrli túrde barlyq jerde tehnıkalyq quraldardy: 1108 symtetik dybysyn tunshyqtyrǵysh, 402 metall izdegish jáne 1585 kamera men beınekamera qoldaný jos­parlanyp otyr. UBT 2 maýsymnan bastap 8 maýsymǵa deıin 155 arnaıy jabdyqtalǵan pýnktterde ótedi. Barlyq pýnktterde shtabtar men memlekettik komıssııalar jumys isteıdi. Dınara BITIKOVA, «Egemen Qazaqstan».