«On (bir) jyl mektep partasynda...»

Aldaǵy dúısenbi kúni elimiz boıynsha mektep bitirýshiler Ulttyq biryńǵaı test boıynsha synaq tapsyryp, alǵan bilimderin dáıekteıdi. Bul tásilmen emtıhan alǵaly da 10 jyldyń júzi boldy. Osy ýaqyt ishinde 1 mıllıon 335 myń mektep bitirýshi synaqqa qatysqan eken. Birden aıtaıyq, UBT-ǵa qatysý erikti. Onda 4 pánnen, naqtylaı tússek, oqytý tili (qazaq jáne orys), Qazaqstan tarıhy, qazaq tili, orys tilinde oqıtyndar úshin nemese orys tili, qazaq tilinde oqıtyndarǵa, matematıka jáne tańdaý páni belgilengen. Ekisi kúni bastalatyn emtıhan 9 maýsymda aıaqtalady. Ústimizdegi jyly elimiz mektepterin bitirgen 133 myń 266 túlektiń 92077-si qa­tysady. Onyń 63603-i qazaq tilinde, 28447 mektep bitirýshi orys tilinde UBT tapsyrady. Jaýapty naýqandy ótkizý jumys­­­­­­taryna ázirlik jan-jaqty qarastyrylǵan. Ony 1700 azamat qadaǵalaıtyn bolady. UBT 155 arnaıy jabdyqtalǵan pýnkt­­terde ótkiziledi. Onyń 107-si aýdan ortalyqtarynda bolsa, 48-i oblystyq, Astana men Almaty qalalarynyń joǵary oqý oryndaryna ornalasqan. Ulttyq joǵary oqý oryndary­na túsý úshin konkýrsqa qatysýdyń shek­tik deńgeıi –70 baldy qurasa, bilim, aýyl sharýashylyǵy ǵylymdary jáne ve­terınarııa mamandyqtaryna ke­min­de – 60 bal, jalpy medısına baǵy­ty bo­ı­ynsha – 55 bal, al basqa joǵa­ry oqý oryndaryna, onyń ishinde aqyly bóli­mine ótý baly – 50 bal bolyp ­bel­gilen­gen. Aǵymdaǵy jyly «Altyn belgige» úmitkerler 4491-di qurapty. Olar UBT-ǵa qatysyp, óz bilimderin dáleldese, osy bıik marapatqa ıe bolady. Gazet oqyr­mandarynyń deni bıyl bólingen memlekettik tapsyrys qansha eken degen suraqty jıi qoıýda. Oǵan berer jaýap, barlyq granttyń sany – 34165, onyń ishinde – 500 grant syrttaı oqý bólimine, joǵary oqý oryndarynyń daıarlyq bólimine – 2530 grant, Qazaqstan-Brıtan tehnıkalyq ýnıversıtetine – 200, Nazarbaev Ýnıversıtetine – 545 oryn qarastyrylǵan eken. Sonymen, «On jyl mektep partasynda...» dep, on jyl emes 11 jyl mektep partasynda otyryp, balalyq bal dáýrenimen qosh aıtysqan túlekter endigi jerde bilim synaǵyn jaqsy tapsyryp, biri joǵary oqý oryndaryna joldama alsa, ekinshileri eńbek maıdanyna sap túzep shyǵatyn bolady. Súleımen MÁMET, «Egemen Qazaqstan».