ASTANA. 6 maýsym. Búgin Almatyda ótip jatqan «tórttiktiń týrnırinde» Qazaqstan áıelder quramasy О́zbekstan komandasyn 10:0 etip utty. Bul týraly NewTimes.kz tilshisi habarlady.
Týrnır Almaty oblysynyń Talǵar qalasynda Halyqaralyq áýesqoı boks assosıasııasy (AIBA) quzyretindegi Búkilálemdik boks akademııasynda ótip jatyr. Oǵan О́zbekstan, Mońǵolııa, Reseı jáne Qazaqstan quramalary qatysýda.
Jarys keshe, 5 maýsym kúni Qazaqstan – Mońǵolııa jasaqtarynyń kezdesýimen bastaldy. Matchta qazaqstandyqtar 11:2 esebimen jeńiske jetti. Komandaǵa bul jeńisti 2012 jylǵy álem chempıonatynyń qola júldegeri Nazym Qyzaıbaı men Alına Turlybaeva (48 kg), Jaına Shekerbekova (51 kg), Dına Jolaman (54 kg), Oksana Koroleva (57 kg), Alýa Ábdiraıymova men Fırýza Sháripova (60 kg), Zarına Soloeva (64 kg), Darıǵa Shákimova (69 kg), 2012 jylǵy London Olımpıadasynyń qola júldegeri Marına Volnova men Anastasııa Rylına (75 kg) alyp berdi. Bizdiń qyzdardan tek Janna Basqaeva (57 kg) men Ulbosyn Álmenova (60 kg) ǵana utyldy.
Búgin qazaqstandyqtar sapynan Alına Turlybaeva (48 kg), Jaına Shekerbekova (51 kg), Sánııa Sultanqyzy men Janna Basqaeva (57 kg), Gúljan Úbbinııazova (60 kg), Azııa oıyndarynyń qol júldegeri Saıda Hasenova (64 kg), jastar arasyndaǵy álem chempıony Gaýhar Ermekbaı (69 kg) jáne Anastasııa Rylına (75 kg) qarsylastaryna eshqandaı múmkindik qaldyrǵan joq. Jekpe-jekterde Gúljan ǵana 2:1 esebimen jeńiske jetti. Al qalǵandary túgeldeı 3:0 degen eseppen utty.
Jarystyń birinshi kúni Reseı quramasy О́zbekstan qyzdaryn 7:3 etip súrindirdi.
Erteń bizdiń qyzdar Reseı komandasymen bettesedi.
Qazaqstan Boks federasııasynyń baspasóz qyzmeti atap ótkendeı, bul kezdesýler bıyl ótetin Azııa oıyndary men álem chempıonatyna daıyndyq bolmaqshy.
Damır Qojamqul.
Derekkóz: NewTimes.kz.
Foto: VKontakte.
Sýrette: Marına Volnova.