Talısman men logotıptiń aınalasynda tutas saıasat bar

Elimizge EKSPO-2017 halyqaralyq mamandandyrylǵan kórmesin ótkizý mártebesi buıyrǵan sátten-aq oǵan ázirliktiń birden bastalyp ketkeni aıan. Sonyń ishinde logotıp tańdaý, bolashaq kórmeniń arhıtektýrasynyń nobaıyn jasaý syndy jumystar halyqaralyq deńgeıdegi baıqaýlardyń nátıjesinde iske asty. Mysaly, byltyr logotıp tańdaý barysynda otandyq jáne álemdik dızaınerler 56 túrli jumys usynǵan bolatyn. Sonyń ishinde jasyl, kógildir, qyzǵylt sary tústerdi kórkemdik sheshimmen biriktirgen «Jel energııasy» jobasy EKSPO-2017 kórmesiniń logotıpi bop bekitildi. Jýyrda «Astana EKSPO-2017» aksıonerlik qoǵamy kórmeniń talısmanyna (maskot) baıqaý jarııalady. Osy baıqaýdyń barysy týraly aksıonerlik qoǵamnyń Marketıng jáne jurtshylyqpen baılanys departamentiniń dırektory Ásel QOJAQOVAǴA jolyǵyp suraqtar qoıǵanbyz. – Ásel hanym, sizder­diń saıttaryńyzdan aksıo­nerlik qoǵamnyń Maskot joba-dızaınyna baıqaý jarııalanǵanyn baıqap qaldyq. Baıqaýdyń qandaı erekshe sharttary bar? – Iá, mamyr aıynyń 20-sy men maýsymnyń 20-syna deıingi aralyqta úmitkerler baıqaýǵa óz jobalaryn úki­lep qosa alady. Maskot de­gendi keıbireýler uqpaı qalyp jatyr. Bul kádimgi talısman. Ol birinshiden, «Bolashaqtyń energııasy» atty kórmeniń taqyrybyn aıshyqtap turýy ári bir kórgen adam Astanada ótetin kórmege qatysty talısman ekenin tanyp alatyndaı bolýy kerek. Ekinshiden, kórme ótkizetin el mádenıetiniń erek­sheligi eskerilýi tıis. «Kórme ótkizetin el» dep otyr­ǵan sebebimiz baıqaýǵa otan­dyq dızaınerler ǵana qatys­paıdy. Alys-jaqyn shetel dızaınerleri men ózimizdiń dızaınerler qatysyp, olardyń jobalary sarapqa salynady. Úshinshiden, talısmanda bizdiń logotıptiń jasyl, kógildir jáne qyzǵylt sary tústeri kórinis berýi tıis. Talısman jansyz zat bolýy da, jandy zat bolýy da múmkin. Mysaly, óz elimizde ótken Azıadanyń talısmany Irbı barysy bolsa, Ýnıversıada úshin suńqar tańdap alyndy. Jalpy, keıbir elderde belgili bir úlken sharalardyń talısmany adam keıpinde de kórinis beredi. Biz bul turǵyda dızaınerlerge naqty bir shekteýler qoıyp otyrǵanymyz joq. Olar jobalaryn shyǵarmashylyq erkindikpen usyna alady. Bastysy ol jobalar biregeı ári qaıtalanbaıtyn, ıaǵnı, túsiniktirek aıtsaq, osyǵan deıin ony eshkim paıdalanbaǵan bolýy shart. Sondyqtan onyń jaýapkershiligin joba avtory óz moınyna alady. Al halyqtyq daýyspen bir joba-talısman tańdap alynǵan soń onyń avtorlyq quqyǵy bizdiń aksıonerlik qoǵamǵa ótedi. – Baıqaýdyń halyq­ara­lyq dárejede ekenin atap óttińiz. Endi osyny tara­tyń­qyrap berseńiz. Buny ha­lyqaralyq deńgeıde ja­saýdyń syry nede? Otan­dyq dızaınerlerdiń kórme talısmanyn jasap shyǵarýǵa qaýqary jetpeı me? – Otandyq dızaınerlerdiń sheberlikterine bizdiń eshqandaı kúmánimiz joq. Maqsatymyz – 2017 jyly ótetin kórmege qyzyǵýshylardyń sanyn art­tyrý. Onyń ishinde dızaı­nerlerdi tartý. Biz eshkimniń ónerine shekteý qoımaımyz. Kásibı dızaınerler, tipti, sol mamandyqqa oqyp jatqan stýdentter de qatyssyn, baǵyn synasyn. Bul jerde bir avtordyń baǵy janatyny belgili. 20 maýsymnan soń Úkimet basshysynyń tóraǵa­lyǵymen memlekettik komıs­sııa jobalardy sarapqa sa­lyp, jeti jobany tańdap ala­dy. Al eń sheshýshi daýys ha­lyqta. Biz arnaıy veb-saıt jasaıtyn bolamyz. Sonda tutas álem halqy daýys be­redi. Daýys berý onlaın reji­minde júrgizilmek. Iаǵnı, daýys berý ashyq túrde ótedi, bári kórinip turady. Saıtqa qosymsha daýys berýdiń utqyr (mobıldi) túrin de jasaımyz. Sosyn tamyz aıynyń sońynda sheshim shyǵady da, jeńimpaz anyqtalady. – Osy kúnge deıin qansha jumys tústi? Olardyń ara­syn­da sheteldikter bar ma? Jeńimpaz jobanyń avto­­ry­men kelisimsharttar jasa­la ma? – Qazirgi tańda qorjy­ny­myzda onshaqty joba bar. Olardyń ishinde ızraıldik jobalardyń da bar ekenin atap ótýge bolady. Túrli tujyrymdamalar kórinis tapqan qyzyq jumystar usynylǵan. Áli talaı jumystar usynylady dep oılaımyz. Al jeńimpaz jobanyń avto­rymen aksıonerlik qoǵam kelisimshart jasaıtyn bolady. Ol ózi jasaǵan talısmannyń brendbýgyn, ıaǵnı, jasalý joldaryn, fırmalyq túsin, ony paıdalaný erejelerin tutas sýrettep, kompanııa atyna ótkizedi. Bul óz kezeginde fırmanyń menshigine aınalyp, ári qaraı aksıonerlik qoǵamnyń fırmalyq stılin de beıneleýi múmkin. – Talısman otandyq taýar aınalymyna shyǵaryla ma? – Árıne. Bul talısman keıin de túrli formada qoldanyla beredi dep oılaımyz. Mysaly oıynshyqtar, kádesyılar túrinde kórinis berýi múmkin. Ol bizdiń demeýshilerimizge, áriptesterimizge de satyla bastaıdy. Jalpy aıtqanda, logotıp pen talısmannyń aınalasynda tutas saıasat bar ekenin aıtqym keledi. – Áńgimeńizge rahmet. Áńgimelesken Marat AQQUL, «Egemen Qazaqstan».