ASTANA. 8 maýsym. Keshe Býdapesht qalasynda fýtboldan Qazaqstan quramasy Vengrııa komandasymen joldastyq kezdesý ótkizip, 0:3 esebimen utylyp qaldy. Bul týraly Sports.kz habarlady.
Oıyn madıar jankúıerlerine ulttyq komandanyń Eýropa birinshiliginiń irikteý matchtaryna qanshalyqty daıyn ekenin kórsetýge tıisti bolsa, Qazaqstan quramasy úshin onyń jańa jattyqtyrýshy Iýrıı Krasnojanmen bolashaǵy qalaı qalyptasatynyn baıqatýy kerek edi.
Qazaqstandyqtardyń starttyq quramy pálendeı jańalyq bolyp kóringen joq. Oıynshylardy alańǵa komanda kapıtany Andreı Fınonchenko bastap shyqty. Olar kezdesýdiń 3-mınýtynda-aq buryshtama berý quqyǵyna ıe boldy. Aıyp dobyn Fınonchenko ortaǵa jetkizdi. Ony Sergeı Hıjnıchenko ádemi qımylmen qaqpaǵa urýǵa tyrysty. Biraq nátıje shyqpady. Vengerler buǵan sol qanattan jaryp ótý arqyly jaýap qaıtardy. Mıhaı Korhýt sonyń ekpinimen aıyp alańyna dop asyrdy. Ony qonaqtar qaıtaryp úlgerdi. Al osy dopty Adam Dıýrcho qaıtadan aıyp alańyna jetkizgende, Balınt Vecheı basymen qaqpaǵa urdy. Áıtkenmen, soqqy týra barǵan joq.
Alań ıeleriniń qysymy osydan bastap arta tústi. Sol qysymǵa shydamaǵan Renat Abdýlın men Valerıı Korobkın aqyry eskertý alyp tyndy. Munyń arǵy jaǵy alǵashqy golǵa ulasty. Vengerler buryshtamadan dop bergende, qorǵanystyń orta shebindegi Aleksandr Kıslısyn óziniń «baǵymyndaǵy» Tamash Prıshkınnen kóz jazyp qaldy. Sol-aq eken madıar shabýylshysy Andreı sıdelnıkov qorǵaǵan qaqpanyń toryn búlk etkizdi. Osylaısha oıynnyń 26-mınýtynda esep ashyldy.
Munyń artynan qazaqstandyqtar shabýylǵa kóshti. Sol alaquıyn barysynda aıyp alańyna aptyǵa kirgen Korobkın qaqpaǵa jerletip dop baǵyttady. Onysy qaqpashy Danıel Rozsanyń qolynan tabyldy. Sosyn Marat Haırýllın aıyp dobyn urdy. Alaıda, bul dop qaqpadan edáýir alshaq ketti. Al taım sońynda Prıshkın taǵy da óziniń bar ekenin baıqatyp ótti. Onyń aıyp alańyna alyp kirgen dobyna Roland Varga sál jetpeı qaldy.
Qazaqstan fýtbolshylary ekinshi taımnyń basyn da shabýylmen ótkerdi. Bul óz kezeginde vengerlerdi de údere kóterdi. Olar birinshi bolyp buryshtama dobyn da berdi. Buryshtan jetken dop Abdýlınniń aıaǵynana Sıdelnıkovtiń qolyna bardy. Osy tusta Korobkınniń júıkesi taǵy da syr berip qoıdy. Osydan ekinshi márte eskertý alǵan ol alańnan ketýge májbúr boldy. Munymen de tynbady. Osyǵan baılanysty berilgen aıyp soqqydan vengerler 63-mınýtta vengerler ekinshi goldaryn soǵyp ketti. Áýeli Varga dopty «qabyrǵadan» asyryp tastady. Ony Sıdelnıkov ustap qala almady. Ala baýyr dop qaqpanyń ishinen bir-aq shyqty.
Budan keıin Krasnojan jasaǵan birneshe almasýshylyq ta komandanyń jaǵdaıyn jaqsartqan joq. Buǵan kerisinshe, qonaqtar oıynnyń eń sońynda, 90-mınýtta óz qaqpalaryna úshinshi dopty ótkizip aldy. Ony Konstantın Engel óz toryna qaraı súńgitip jiberdi.
Damır Qojamqul.
Derekkóz: Sports.kz.
Foto: Sports.kz.