«Qaragóz» qaıta oraldy

Kóńil túkpiriniń kóleńkesinde jyldar boıy jatyp qalyp umytylǵan bir qımas asylyń aldyńnan kenet jarq etip shyǵa kelse, qýanasyz ǵoı. Jaqynda dál osyndaı qýanysh sezimin biz de bastan keshtik. Bizdiń bul jolǵy qımasymyz ótken ǵasyrdyń jetpisinshi jyldary elimizdiń óner álemin dúr silkindirgen áıgili «Qaragóz» ansambli edi. Qolymyzǵa osy, kezinde gúl-gúl jaınaǵan ónerpaz top jaıynda ja­zylǵan kitap tıdi. «Esińde me «Qaragóz» ansambli?» dep atalady eken ol. «Iá, esimizde!» dep kúńgir ete tústi kókiregimizden saǵynyshty bir ún. Iá, ıá, bizdiń býynnyń da ol kezde on jeti-jıyrmalardaǵy gúl-gúl dáýreni. Qazaq óneri men mádenıeti kókteı qaýlap, kúnde bir jańalyǵyn súıinshilep jatqan kez. «Atamannyń aqyry», «Qyz Jibek» fılmderi. «Gúlder» men «Dos-Muqasan» ansamblderi birinen soń biri dúrkireı shyǵyp, rýhymyzdyń mereıin marqaıta dýlatqan shaqtar-aı deseıshi! Olar, ásirese, stýdent qaýymnyń, jalpy jastardyń kózaıymyna aınalyp edi-aý. Solarmen birge sol kezderde alystaǵy Jezqazǵannan, sonaý Betbaqtyń dalasynda orǵı shapqan jezkıiktiń jalt etken janaryndaı bolyp, jarq ete qalǵan syrly da muńdy, sulý sazdy ánderimen myń-myńdaǵan júrekterdi jaýlap alǵan, qazaq óneriniń órdegi jaılaýyna ózine ǵana tán, jan baspas jasylyn qaýlatqan «Qaragóz» ansamblin qalaı umytarmyz? Sodan beri de qyryqtan asa jyl ótipti-aý. Sol «Qaragózdiń» qaıtadan jańǵy­rýyna bel sheshe kirisip júrgen belgili kásipker, ónerli azamat, Jańaarqanyń týmasy Jańabaı Sátjanov bergen jańaǵy jádiger kitapty aqtarystyra paraqtap, bul kúnde ańsarǵa aınalǵan ansambldiń ónerdegi jolymen birqy­dyrý tanysyp óttik. «Qaragózdiń» óner ólkesindegi jylnamasy yqsham bolǵanymen, shyǵarmashylyq murasy baı, tarıhy shaǵyn desek te, taǵylymy shyraıly kórindi. Árıne, ulttyq qun­dylyǵymyzǵa aınalǵan óner ujymy­nyń sol bir tamasha ánderi dúnıege qalaı kelip edi, olardy jurtshylyqqa jetkizýdegi ansambl músheleriniń jankeshti eńbegi qandaı boldy degen suraqtar búgingi zamandastardy da qyzyqtyrary anyq. Onyń ústine «qaragózdikterdiń» talaı júrekti tebirentken ánderi áli kúnge deıin jan terbep, el ıgiligine qyzmet etip, rýhanı suranysty ótep júrgenin qaıda qoıamyz? 1970 pen 73-tiń aralyǵyn qamtyǵan bar bol­ǵany úsh jylda qazaqtyń óner kógi­nen quıryqty juldyzdaı aǵyp óte shyqqan án aqtańgerlerin eli sa­ǵynýy zańdy. 2007 jyly, araǵa 35 jyl salyp «Qaragóz» ansambliniń jańar­ǵan quramynyń konsertteri Qaraǵandy, Jezqazǵan, Sátbaev, Abaı qalalary men Shet, Jańaarqa aýdandarynda zor tabyspen ótti, al oblystyq «Qazaqstan-Qaraǵandy» telearnasy arqyly qalyń qaýymǵa kórsetildi. Bul oqıǵa súıikti óner ujymynyń kórermen-tyńdarmanmen qaıta qaýyshýynyń jaqsy da jarasymdy nyshanyndaı bolǵan-dy. Mine, endi sol jaǵymdy jaıdyń jalǵasyndaı bolyp «Qaragóz» vokaldy-aspapty ansambliniń oryndaýyndaǵy ánder albomy jaryq kóripti. Qumarta tyńdadyq, qulaǵymyzdyń quryshy qandy. Eser emes, eskektegen esti ánder. Burynǵy kóz kórgen jaqyn tanystaı syralǵy ánder jańa óńdeýde syry men syny ústemelene jarqyraı túsipti. Bul – birinshisi. Ekinshi albom jazylý ústinde eken. Osyndaı súıinishti jaǵdaılardy qazaq estradasyna «Qaragózdiń» qaıtyp oralýy dep súıinshilegenimiz oryndy bolar. Deı tursaq ta, otandyq estrada tarıhynda altyn áriptermen jazylary sózsiz, shyǵarmashylyq qoltańbasy daý­syz daralanǵan «Qaragóz» ansambliniń bastaý-bulaǵy qandaı edi, alǵashqy án qanatty aqjoltaı qarlyǵashtary kimder? О́ner ujymy ómirge qalaı keldi? Úlkendi-kishili sahnalarǵa qalaı jol saldy? Olardyń ómirdegi qulshynysy, ónerdegi umtylysy, arman-ańsary, maqsat-muraty, taǵdyr-taýqymeti qandaı boldy? Mine, bul jaılardyń kópshilikke beımálim qyrlary barshy­lyq. Ol da kópti tolǵandyrady, ony bilýge qumarlar da az emes. Osy turǵy­dan alǵanda ansambldiń úsh jyldyq ǵumyrnamasyn baıandaıtyn kitaptaǵy estelikter, aıǵaqty fotoderekter mol maǵlumattardy qamtyp, «qaragózdik» án áleminiń aıdynyna qaıyq salýy qýanarlyq ta quptarlyq ıgi is bolyp shyqqan eken. Alpysynshy jyldardyń orta tusy men jetpisinshi jyldardyń ekinshi jartysy. Sol bir jyldary álem jas­tary lıverpýldyq tórttiktiń, ıaǵnı «Bıtlzdiń» áýen-yrǵaǵymen terbele tolqyp turǵan edi. Estrada áýezine Keńester eliniń jastary da áserlenbeı qoımady. Jastyqtyń qyzý ańsar-yntyǵy qoısyn ba, shirkin! Máskeý men Lenıngrad, Kıev pen Rıgada bastalǵan vokaldy-aspapty ansambl­der uıymdastyrý úrdisi keń-baıtaq eldiń túkpir-túkpirine tez-aq tarap úlgerdi. Attaryn ǵana atasaq es­teri­ńizge túser. «Veselye rebıata», «Samosvety», «Poıýshıe gıtary», «Verasy», «Pesnıary», taǵy-taǵy tolyp jatqan basqalary. Sol ýaqytta álemdik úrdisten shet qalmaǵan Qazaqstanda «Dos-Muqasan», «Serper», «Aıgúl», Túrkimenstanda «Gýnesh», О́zbekstanda «Iаlla», Grýzııada «Orero», Qyrǵyzstanda «Arshan», t.s.s. ansamblder dúnıege kelipti. Sóıtip, sonaý qart Eýropadan bastaý tartyp, berisi qyzyl Máskeýde jalǵasqan osy sherýli úderispen jetpisinshi jyldardyń basynda estradanyń dúmpý-dúrmegi jyraqtaǵy Jezqazǵanǵa jetýi, álbette, súıinerlik jaqsylyq nyshany edi. Osy jaǵdaıda búginde áni men sáni ańyzǵa aınalǵan, óner tarıhymyzdyń altyn tórinen ardaqty ornyn alǵan «Qaragóz» ansambliniń qurylýy da bir qyzyq hıkaıa, ári zańdy qubylys-tyn. Jezqazǵandyq daryndy jastar júregindegi móldir jylǵa jol tappaı qalmady. Tolǵaǵy jetkende tolqyn atqan ishtegi shabytty kúı, qushtarly tilek syrtqa aǵyndap aqtaryldy. Sol izgi tilek, ańsarly armannyń oryndalýyna múmkindik týǵyzyp, ónerpaz órenderdiń basyn qosqan jer Jezqazǵandaǵy metallýrgterdiń Mádenıet saraıy edi. Osynaý orda olardyń taǵdyr­laryn toǵystyrdy, talanttaryn juǵystyrdy. Estelik áńgimelerge zeıin qoıa paıymdasaq, ansambldi alǵash uıymdastyrýda oshaqtyń úsh butyndaı ustyndy uıytqylyq jasaǵan úsh jigittiń eńbegi eren bolǵanǵa uqsaıdy. Onyń biri sol kezde Mádenıet saraıyndaǵy kórkemónerpazdar úıirmesiniń jetekshisi bolyp júrgen jas tokar Sálimjan Seıilov edi. Ol tańǵy shyqtaı taza daýysty táp-táýir ánshiligimen qosa elgezektigine baǵyp barlyq uıymdastyrý jumystaryn óz moınyna júktep, tap-tuınaqtaı etip atqaryp otyrdy. Ekinshisi Bolman aqynnan bata alǵan Bolat Esmuqanov – osy tusta ol da jumysshy, jańa qanattanyp kele jatqan jas kompozıtor, ánshi, ári dombyra, syrnaı, baıan, gıtara sııaqty aspaptardyń bárinde oınaı beretin segiz qyrly seriniń ózi-tin. Úzdik shyqqan úshinshi saıypqyran týǵannan beri taýqymetpen taıtalasqan taǵdyrly talant, kóz janary kórmese de, janynyń janary jaryqqa toly jasyn bolmys, keıinnen dúıim qazaqqa tanylǵan dúldúl óner ıesi, ózgeshe órnekti sazger, órgek ánshi Jaqsygeldi Seıilov bolatyn. Ansambldiń ataǵyn shyǵarǵan altyn arqaýly tini, tanymaldyǵyna jol ashqan qydyr qanatty quty, «Qaragózdiń» qany men jany da Jaqsygeldi bolyp edi desek, osy jarym yrysty ázız arýaqqa eshkim kópsine qoımas. Áýeli úsheýiniń ómirdegi dostyǵy, kóńilderiniń hoshtyǵy óner mereıin asyryp, ansambldi dúnıege ákeldi. Oǵan qazaqy rýhty «Qaragóz» degen tamasha atty tańdap qoıdy. Olaı etý­ge alǵashqy konserttiń betasharynda «Qaragóz» ániniń naqyshty náshpen aıtylýy da sebep bolmaı qalǵan joq. Kórermendi birden baý­rap, bári dýyldap qoshtaı ketken ánniń quıqyljyǵan áserli yrǵaǵy keıin talaı konsertteriniń betashary bolǵan-dy. Ansambldiń mýzykalyq aspaptarynyń alynýyn da oıda joqta ońtaıymen sáti túsken oraıly oqıǵa desek, quba-qup. Birde Jezqazǵanǵa estrada álemindegi áıgili Rınat Ibragımov jetekshilik etetin tatar ansambli kele qalsyn. Elektr gıtarasynyń tań­syq ári qat kezi. Konsertten keıin Sálim­jan, Jaqsygeldi, Bolat úsheýi bir­deı gıtaraǵa qyzyǵýshylyq tanytyp, mańynan aınalsoqtap ketpeı Rınatty aınaldyrsyn. Sodan ne kerek, qazaq jastarynyń jan kúıin ol da túsingen bolar, eki gıtarany 700 somǵa satýǵa sheshim qabyldaıdy. Muny estisimen ózine júgire barǵan Sálimjannyń meselin qaıtarmaı, kombınat kásipodaq komıtetiniń tóraǵasy Zeınolla Mákishev qajetti somany taýyp beredi. О́nerge umtylǵan jas­tar osylaısha gıtaraly bolyp, zor qýanyshqa bólenip, óner jolyndaǵy alǵashqy qadamdy bastaýǵa múmkindik alǵan eken. Aspaptardyń ataqty ansamblden saýǵalanýy da jaqsy yrym bolǵany kúmánsiz. Uıytqy top osyndaı bolǵanda, ansambldiń qalǵan músheleri de táńiri bergen talant-darynnan áste quralaqan emes-ti. Bas-gıtarada oınaǵan Ábý Túsipbekov, rıtm-gıtaradaǵy Qoıshyqara Ámiralın, ásirese, halyq ánderin qulpyrta quıqyljytqan ánshi Kamal Qazymbetova, myń buralǵan bıshi Maııa Sarybaeva, konserttik baǵdarlamany júrgizýshiler Dámen Jolaýshınova, Muhambedııa Ahmetovterdiń árqaısysy ansambldiń ataǵy sharyqtaýyna ynty-shynttarymen úles qosty, jan-jigerlerin aıanyp qalmady. Bulardyń bári biri stýdent, biri jumysshy, osy qasıetti óńirde hám qalada týyp-ósken jezqazǵandyq armanshyl jastar bolatyn. «Qaragóz» olardyń sol bir jastyq shaqtaǵy aıaýly taǵdyryna, al qyryq jyl ótkende qımas estelikke, ómirleriniń eń bir jarqyn ónegesine, jarq ete túsken juldyzdy sátterine aınaldy. 1970 jyldyń 17 qańtary. «Qaragóz­dikterdiń» óner shejiresi bastaý alǵan, tasqa basylyp este qalǵan kúnniń biri osy. Joǵaryda aıtqan úsh úzdiktiń ónerdegi syılastyǵynan týǵan ansambl bul kúni proletarıattyń uly kósemi V.I.Lenınniń 100 jyldyǵy qarsańynda Qaraǵandy qalasynda ótken kórkemónerpazdardyń oblystyq baıqaýynda alǵash ret halyq aldyna, úlken sahnaǵa shyqty. Tyrnaqaldy tusaýkeser synaqqa alyp shyqqan týyndy – Bolat Esmuqanovtyń «Saǵynysh» áni. Ony ansambl solısi saz daýysty Sálimjan Seıilov oryndapty. Eki kúndik básekeli baıqaýda «Qaragóz» ansambli jeńimpaz dep tanylady. Ansambldiń aty áıgilenip, Jaqsygeldi ánderiniń de baǵy ashyldy. Sóıtip, úlken ónerge joldama alady, aldarynan aq jol ashylady. Osy bir kúnderden bastap «Qaragóz» el aýzynda, jurt nazarynda bolady. Qazaqtyń belgili aqyny, án-kúı dese júregi búlkildeı jyrlap turatyn Ǵalym Jaılybaı: «Qaragózdiń» basqa ujymdardan bir aıyrmashylyǵy – olar negizinen ózderi shyǵarǵan ánderin oryndaıtyn. Buǵan negiz bolǵan nárse ansambldiń jetekshisi Jaqsygeldi Seıilov pen aǵaıyndy Bolat jáne Ahmedııa Esmuqanovtardyń óte daryndy sazger bolýy edi» deıdi. Qyrǵyz aǵaıyndar aıtpaqshy, abdan oryndy paıym. Ataqty ansambldiń alǵashqy bastaý kezeńindegi aıshyqty máneri áli de jurttyń jadynda. Sol jyldardaǵy jastar, jalpy, zamandastar «qaragózdikterdiń» ǵajap ánderiniń áýenderine birden-aq áserlene elitip, tánti bolǵany kóz aldymyzda. Jaqsygeldiniń «Ana týraly ballada», «Ákeler týraly oı», «Kezdesý», «Nege solaı?», «Jezkıik», Bolattyń «Saǵynysh», «Mahabbat muńy», «Sen kináli emessiń», «Oıanǵan mahabbat» ánderi aı mańdaılary jarqyrap sol kezdegi hıt ánderdiń aldyńǵy qatarynda júrgenin de eshkim ótirik deı almas. Bul ánder jańa ǵasyrdyń tabaldyryǵynan da jeldeı esken jezkıiktershe erkin attap, bolashaqqa bet aldy. Shyn máninde de, sol bir órgek te sergek ári sulý sazdy, taý mu­rat­ty, taza rýhty ánder ár býyn ur­paq­qa bala kezderinen-aq «ana degen táńir­ge syıynýdy» úıretti, «ákelerdiń arqasynda shalqyp júrgenin» sanasyna sińirdi. Al eseıe kele «Nege solaı?» dep kúızelgende «mahabbattyń muńy» «kezdesýdi» ańsaıtyn «saǵynysh» sazy ekenin taǵy «Qaragózdiń» ánderinen uǵyp, túsinip, dátke qýat taýyp edi. Qazir qarap otyrsaq, osy bir jigitterdiń óner jolyndaǵy taǵdyr-talaıyna erekshe baqyt buıyrǵanyn ańdaımyz. Ánderiniń sózderin Amanjol Shamkenov, Tumanbaı Moldaǵalıev, Kákimbek Salyqov, Saılaýhan Nákenov syndy qazaq óleńiniń marǵasqalary jazdy. Olar osy aqyn aǵalarymen dostyq, ózgeshe syılastyq qarym-qatynasta boldy. Amanjol Shamkenov pen Sálimjan Seıilov komsomol jetekshisi Jibek Ámirhanovanyń sharapatymen Germanııaǵa barǵan týrıstik saıahat kezinde tanysady. Aqyn aǵa sonda Sálimjanǵa «Jaılaý kúni» atty óleń kitabyn syılaıdy. Sonaý alman elinde júrip syrlas bolǵan aqyn men ánshiniń kóp kúngi oı-tolǵamdary bolashaqtaǵy «Qaragózdiń» repertýa­ryna engen tamasha ánderdiń týýyna negiz boldy. Ásirese, eshqashan kónermes «Ana týraly balladany» áli kúnge deıin tebirenbeı tyńdaıtyn jan joq shyǵar. Jaqsygeldi men Bolattyń syrshyl sazgerligin jyr tumasy Tumaǵań da jaqsy kórip unatty, olardyń áýenderine ondaǵan óleńderdi arnap turyp jazdy. Sóıtip, J.Seıilovtiń «Áke daýysy», «Kezdesý», B.Esmuqanovtyń «Sen kináli emessiń», «Oıanǵan mahabbat», «Mahabbat muńy» sııaqty ánderiniń tanymaldyǵyna tek Tumaǵańa tán tartymdylyq syılady. Sonymen birge, aqjúrek aqyn aǵanyń ómirden ozardan az ǵana buryn: «Qaragóz» ansambliniń múshelerimen tyǵyz shyǵarmashylyq baılanysta bolǵanymdy saǵynyshpen eske alamyn» dep eljireı aıtýynyń ózi qandaı ǵanıbet. Al tyńdaǵan saıyn qaı-qaısymyz da keń dalaǵa syımaı keterdeı tolqı áserlenetin, týǵan jerdiń tarpań talanttaryn qımaı qushtarlanatyn «Jezkıik» she?.. Osy án Jaqsygeldini qazaqtyń taǵy bir jaqsysy Kákimbek aǵa Salyqovqa baýyr etip tabystyrdy. Sekseninshi jyldardyń aıaq kezinde kózi kórmese de, kókiregi kóregen, ónerdegi óren júırik inisiniń Máskeýge kelip kásipodaqtardyń Ortalyq Keńesi uıymdastyrǵan saıysta «Jezkıikti» qara syrnaıymen bezildetip «Altyn belginiń» ıesi atanǵanyn osy aqjoltaı Kákeń kýálandyrady. Taǵy bir ǵajapty aıtsaq, óziniń de osy attas áni bola tura, mýzyka áleminiń metri Nurǵısa Tilendıevtiń kóńili Jaqsygeldiniń «Jezkıigine» qulaǵan, ataqty sazgerge jańa nusqa unaǵan. Ulylyǵy ǵoı, Nuraǵań bedelimen de baspaı, ishtarlyq ta jasamaı, kóptiń kózinshe keremet rızashylyǵyn bildirip, jańa «Jezkıiktiń» jolyn ashqan eken, deıdi. Sol zamatta-aq jeldeı esip, aq bókenshe zaýlaǵan án tóresi qazaq dalasyna tarap ketedi. Oǵan da sekem almaǵan sezim suńqary Nuraǵamyz Jaqsygeldiniń ánder jınaǵyna aq bataly alǵysózin jazýy qandaı ulaǵat deseńizshi! «Qaragóz» alǵashqy qadamdarymen-aq Jezqazǵannyń mádenı ómirin gúldendirip jiberedi. Jas óner ujymy 1970 jyldyń 13 jeltoqsanynda halyq aldyna alǵash ret derbes konserttik baǵdarlamamen shyǵady. Al 1971 jyl ansambl úshin shyǵarmashylyq shabyttyń sharyqtaǵan jyly bolypty. Olar qalanyń bas saraıynyń sahnasynda aqpan-naýryzda úlken-úlken úsh konsert beredi. Odan ári qanattaryn keńge jaıa túsip jazǵa qaraı Qaraǵandy, Temirtaý, Saran, Shahtınsk qalalary men Telman aýdanyn aralap, óner kórsetedi. Tamyzda tamashany jalǵastyryp Jezdi men Jańaarqa aýdandarynyń aýyldaryn túgel sharlap shyqqan eken. Bir aıdyń muǵdarynda myń shaqyrymnan astam jol júrip jurtty baýraıdy, ánsúıer júrekterdi jaýlaıdy. Bulardyń úlgisine erip tek Jańaarqa jeriniń ózinde ǵana ondaǵan ansamblder qurylady. Ýaqyt ótken saıyn «Qaragóz» qanat­tana beredi. Repertýary túrle­nip, Eskendir Hasanǵalıevtiń, Áset Beıseýovtiń ánderimen tolyǵyp moly­ǵady. 1972 jyldyń aqpanynda ansambldiń konsertin Qaraǵandy teledıdary jazyp alyp kórsetedi. Al osy jyldyń kúzinde alǵash Almatyǵa sapar shegip, Qaraǵandy oblysynyń atynan Keńes Odaǵynyń jartyǵasyrlyq mereıtoıyna arnalǵan án merekesinde júlde oljalaıdy, búkil respýblıkaǵa attary áıgilenedi. Qazaq radıosynyń altyn qoryna ánderin qaldyrady. «Qaragózdiń» óner ólkesindegi osyndaı qutty qadamdaryna rııasyz qýanǵandar qatarynda Ilııa Jaqanov, Eskendir Hasanǵalıev sııaqty sanatty sazger­ler de bar edi. Olar ansambldiń aıaq aly­syn, daryn-deńgeıin joǵary ba­ǵa­lady. Sondaı-aq, vals koroli Shámshi Qaldaıaqov, ataqty sazgerler Ábilahat Espaev, Áset Beıseýovter Jaqsygeldiniń tabıǵı talantyna shyn júrekterimen úlken bastaryn ıdi. Máskeýlik belgili ánshiler Lev Leshenko men Valentına Tolkýnovalar da ol salǵan ánderdi súıip tyńdaǵan kórinedi. О́ner aıdynyndaǵy úsh jyl nemese otyz alty aı. Osy ýaqyt ishinde «qaragózdikter» óz attaryn otandyq estrada tarıhyna altyn áriptermen jazyp úlgeripti. Peshenesi solaı bolypty, «Qaragóz» tarady, onyń músheleri taǵdyrdyń san taraý soqpaqtaryna tústi. «Qaragózdiń» jalǵasyndaı bolyp Jezqazǵanda ile-shala «Ulytaý», odan keıin araǵa jyldar salyp «Jezkıik» ansamblderi ómirge kelgen bolatyn. Onyń quramyna Jaqsygeldi Seıilov, Bolat Esmuqanovtarmen qatar jańadan Ahmedııa Esmuqanov, Mara Esmuqanova, Ǵalym Muhamedın, Ahat Baıbosynov, Baǵdat Sámedınova sııaqty daryndy jandar qosylyp, án kórigin laýlatady. Odan keıin de qanshama jyl qara syrnaıy men syrly áninen ajyramaǵan Jaqsygeldi jalpaq eline keńinen tanylyp baryp ómirden ótken-di. Biraq sol Jaqań da, «Qaragóz» de, «Qaragózdiń» ánderi de umytylmady. Ol ánderdi keıin ánshiler, toptar jańǵyrta aıtyp júr. «Qaragóz» ánderi halyqtyń júreginde qaldy. Rýhanı aınalystan túsken joq. О́ner janashyry, eljandy azamat Álıhan Baımenov: «Qaragóz» – qazaq estradasyndaǵy erekshe qubylys» dese, sol sóz naǵyz aqıqat. Demek, «Qaragózdiń» qaıta jań­ǵyrýy ýaqyt talaby eken. О́tken jyl­­dan bastap osy ıgi isti azamattar qol­ǵa aldy. Joǵaryda aıtqanymyzdaı, án albomdary shyǵarylyp, kishigi­rim konsertter qoıylyp, úlken baǵ­dar­lama ázirlený ústinde. Kózaıym «Qaragózdiń» prodıýseri Jańabaı Sátjanov, kórkemdik jetekshisi ózimizge belgili Bolat Esmuqanov. Ánshi Mara Esmuqanova men tanymal sazger ánshi Ahmedııa Esmuqanovtardyń da ańsarǵa aınalǵan ansambldi ómirge qaıta ákelýdegi eńbekteri zor. Buıyrtsa, jańǵyrǵan jańa «Qaragózdiń» Almaty, Astanadaǵy úlken konsertteri odan soń óńirlerde jalǵasyp, óner mereıin asyrmaq. Kóz jazyp qalǵan aıaýly asylymen qaıta jolyqqanda adam qýanýshy edi ǵoı. Sizderge súıinishti habardy jetkizýge asyqqan jaıymyzdy túsingeısiz. «Qaragózdiń» qaıtyp oralǵanyna qýanaıyq, aǵaıyn... Qorǵanbek AMANJOL, «Egemen Qazaqstan». Almaty.