Shákárim atyndaǵy memlekettik ýnıversıtettiń «Abaı armany» klýbynda jazýshy, halyqaralyq «Alash» syılyǵynyń laýreaty Tursyn Jurtbaı qonaqta bolyp, «Qaıym Muhamedhanov jáne abaıtaný máseleleri» taqyrybynda dáris oqydy. Dáriske qalanyń zııaly qaýymy, ýnıversıtettiń professorlyq-oqytýshylyq quramy, stýdent-jastar qatysty.
«Búginde Alash ıdeıalary jańa qyrynan tanylyp keledi, – dedi Tursyn Jurtbaı qalyń qaýymmen kezdesý barysynda. Bizdiń mindetimiz – olardyń sol kezdegi ustanymyn búgingi urpaqqa jetkizý...». Kezdesý barysynda stýdentter de Tursyn Jurtbaıdyń shyǵarmashylyǵymen keńinen tanys ekendikterin aıta kele, «Qońyr qaz», «Júregimde – jumyr Jer», «Jer-besik», «Beıýaq» jınaqtary, roman-novellalary jastar arasynda eń kóp oqylatyn kitapqa aınalǵanyn málimdedi. Stýdentterdiń ádebıetti tereń túsinýine, zerttep oqýlaryna yqpal etip otyrǵan ýnıversıtet rektory, professor Sháripbek Ámirbekov aldaǵy ýaqytta da osyndaı keshterdiń, kezdesýlerdiń jıi uıymdastyrylýy qajettigin tilge tıek etti. Kezdesý sońynda Tursyn Jurtbaıǵa «Shákárim atyndaǵy memlekettik ýnıversıtettiń qurmetti professory» ataǵy berildi. Stýdentter osy jıyn arqyly ulttyq ıdeıa, alashtaný, Otanǵa degen qurmet taqyryptarynda kóptegen málimetter alǵandyǵyn aıtyp, pikirlerin ortaǵa saldy.
Raýshan NUǴMANBEKOVA,
jýrnalıst.
Semeı.