Avtobýsqa minseń – aqysyz Wi-Fi
Qoǵamdyq kólikterdiń qyzmetin tutynatyn Túrkistan qalasynyń turǵyndary budan bylaı tegin ınternetti qoldana alady. Beeline kompanııasy 3G Wi-Fi - roýterlerdi – búkil álemdik jelige qosylý qurylǵylaryn qalalyq avtobýstarǵa ornata bastady. Iаǵnı, avtobýsqa mingen túrkistandyqtardyń ushqyr ınternetke kirip, qajetti málimetine qol jetkizýge múmkindigi bar. Búgingi kúni arnaıy qurylǵymen jabdyqtalǵan birneshe qoǵamdyq kólik qalada júr. Mamandardyń aıtýynsha, aldaǵy ýaqytta olardyń sany da artpaq. Internetke qosylý úshin Wi-Fi qoldaný múmkindigi bar smartfon, planshet nemese noýtbýk qajet. Qala turǵyndary mundaı erekshe avtobýstardy syrtyndaǵy ásem jarnamalary arqyly bilse, ishine kirgen soń tóbege ilingen arnaıy kodty terip, qyzmetti tutyna alady.
– Qandaı baılanys operatoryna qosylǵanyna qaramastan barlyq júrginshiler ınternetke tegin qosyla alady. Beeline Qazaqstan kóliktegi ýaqytty tıimdi ótkizýge, jańalyqtardy qarap, poshtany tekserýge, aýa raıyn bilip, áleýmettik jelilerde sóılesýge jáne súıikti kitabyńyzdy oqýǵa shaqyrady. Túrkistan qalasynyń turǵyndary bizdiń bastamamyzdy baǵalaıdy jáne Beeline ınterneti júrginshiler arasynda joǵary suranysqa ıe bolady dep úmittenemiz, – deıdi Beeline Qazaqstan kompanııasynyń Shymkent bólimshesiniń dırektory Asqarbek Qazbekov.
Baspasóz máslıhaty barysynda qala ákiminiń orynbasary Dáýren Táńirbergenovtiń ınternet jelisi budan bylaı tek avtobýstarda ǵana emes, halyq kóp jınalatyn aıaldamalarǵa, saıabaqtarǵa da ornatylsa degen usynysy kópshilik tarapynan qoldaý tapty.
Sala mamandary jýrnalıster men blogerlerdiń suraqtaryna keń kólemdi jaýap berdi. Sodan soń, Wi-Fi qurylǵysy ornatylǵan avtobýspen qalany aralap, ǵalamtorǵa enip, jobamen tanysty.
«Wi-Fi Bus» respýblıkalyq jobasy bastapqyda «synaqtyq rejim» retinde Petropavl qalasynda júzege asqan. Keıinnen jobaǵa Kókshetaý jáne Túrkistan qalalary enipti. Aldaǵy ýaqytta bastama Shymkent, Qaraǵandy, Oral, Qostanaı, Atyraý jáne elimizdiń basqa da qalalarynda iske aspaq.
Qaırat ZAINIShEV.
TÚRKISTAN.